ၸမ်ထိုင်ၶၢဝ်းဢွၵ်ႇဝႃႇ လႄႈ ပွႆးႁူင်းၾႆးမိၼ် လိူၼ် 12 မႃးယဝ်ႉလႄႈ ၽူႈၵွၼ်းၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ပိုၼ်ၽၢဝ်ႇႁၢမ်ႈသိုဝ်ႉၶၢႆၸုတ်ႇ/ လဵၼ်ႈမူၵ်ႇတႅၵ်ႇ ပဵၼ်ၶေႃႈၸီႉသင်ႇ ၼႂ်းပိုၼ်ႉတီႈ ဝႃႈၼႆ။
လိၵ်ႈပိုၼ်ၽၢဝ်ႇ ဢွၵ်ႇဝႆႉဝႃႈ “ ၸွမ်းဝဵင်း၊ ပွၵ်ႉ/ ဢိူင်ႇလႄႈ ဝၢၼ်ႈ ႁၢမ်ႈသိုဝ်ႉၶၢႆ ၸုတ်ႇမူၵ်ႇတႅၵ်ႇ ဢၼ်တေႁဵတ်းႁႂ်ႈၵူၼ်းမိူင်း တူၵ်းၸႂ် တိုၼ်ႇသၢၼ်ႈ။ သင်ဝႃႈ ၽႂ်/ ၵေႃႉလႂ် ပူၼ်ႉပႅၼ်ၶေႃႈႁၢမ်ႈသေၶၢႆ၊ ၸုတ်ႇၼႆၸိုင် တေဢဝ်လိူင်ႈၸွမ်းၼင်ႇ ပၵ်း ပိူင်ဝၢၼ်ႈမိူင်းမီးဝႆႉၼၼ်ႉ” ဝႃႈၼႆ။
ၵဵဝ်ႇၵပ်းလွင်ႈၼႆႉ ၼင်ႇႁိုဝ် ၵူၼ်းၼႂ်းပွၵ်ႇ/ဢိူင်ႇ၊ ဝၢၼ်ႈၽႂ်မၼ်း ပေႃးတေလႆႈႁပ်ႉႁူႉၵၼ်ဝႆႉ လူင်ႈၼႃႈ။ ယူႇတီႈၽူႈၵွၼ်း ၸႄႈဝဵင်းတူၼ်ႈတီး လႆႈႁဵတ်းလိၵ်ႈၸီႉသင်ႇ ပၼ်ၾၢင်ႉထိုင် ၽူႈၵွၼ်းပွၵ်ႉ၊ ဢိူင်ႇ ၼႂ်း ၸႄႈဝဵင်းတူၼ်ႈတီး ယဝ်ႉ ဝႃႈၼႆ။
ဢူးၽိဝ်းမိၼ်းထၢႆႉ ၽူႈၵွၼ်းၸႄႈဝဵင်းတူၼ်ႈတီး လၢတ်ႈတီႈသိုဝ်ႇၶၢဝ်ႇ Eleven ဝႃႈ “ ၼႂ်းၸႄႈဝဵင်းတူၼ်ႈတီးၼႆႉ ဢမ်ႇပၼ် ၶႂၢင်ႉတႃႇသိုဝ်ႉၶၢႆ မူၵ်ႉတႅၵ်ႇ။ ယွၼ်ႉဝႃႈ တေႁဵတ်းႁႂ်ႈၵူၼ်းမိူင်းတူၵ်းၸႂ် တိုၼ်ႇသၢၼ်ႈ။ ၸင်ႇလႆႈဢွၵ်ႇလိၵ်ႈၸီႉသင်ႇဝႆႉ။ ပၵ်းပိူင်တႄႉၵေႃႈ မီးဝႆႉယဝ်ႉ။ သင်ဝႃႈ ၽူႈလႂ်ပူၼ်ႉပႅၼ်ပၵ်းပိူင် ၶေႃႈၸီႉသင်ႇၸိုင် တေပၼ်တူတ်ႈတၢမ်ႇ ၸွမ်းၼင်ႇမၢႆမီႈ မတ်ႉတႃ 188 ။ ၵူၺ်းၵႃႈ မိူဝ်ႈၽွင်းၶၢဝ်းပွႆးဢွၵ်ႇဝႃႇ၊ လိူၼ်သိပ်းသွင်မူၼ်း လႄႈ ပွႆးပၢင်ပီႈၼွင်ႉၸၢဝ်းပဢူဝ်းၸိူဝ်းၼႆႉတႄႉ ၶဝ်လႆႈႁဵတ်းၸွမ်းၶေႃႈပၼ်ၶႂၢင်ႉလႄႈ မီးၶႂၢင်ႉၸုတ်ႇမူၵ်ႇတႅၵ်ႇလႆႈယူႇ။ ၵူၺ်းၵႃႈ တေလႆႈၸုတ်ႇတီႈၼႂ်းပၢင်ပွႆးၵူၺ်း။ တွၼ်ႈ တႃႇတၢင်းၼွၵ်ႈပွႆးတႄႉ ႁၢမ်ႈဢမ်ႇပၼ်ၶႂၢင်ႉၸုတ်ႇ” ဝႃႈၼႆ။
ၼႂ်းဝဵင်းတူၼ်ႈ တီးၼႆႉ တင်းမူတ်းမီး 22 ပွၵ်ႉ လႄႈ ၼႂ်းၸႄႈဝဵင်းတူၼ်ႈတီးသမ်ႉ မီးဝဵင်းဢေးတႃႇယႃႇ၊ ဝဵင်းတူၼ်ႈတီး၊ ဝဵင်း ယွင်ႁူၺ်ႈလႄႈ ဝဵင်းၵျွၵ်ႉတလူင်း။ ယူႇတီႈၽူႈၵွၼ်းၸႄႈဝဵင်း လႆႈဢွၵ်ႇလိၵ်ႈပိုၼ်ၽၢဝ်ႇၸီႉသင်ႇ ထိုင်ၽူႈၵွၼ်းပွၵ်ႉ/ ဢိူင်ႇ ၵႂႃႇ ၼင်ႇႁိုဝ် ၵူၼ်းမိူင်းပေႃးတေလႆႈႁပ်ႉႁူႉၵၼ် ဝႃႈၼႆ။
ၼၢင်းယိင်းၶမ်း ၵူၼ်းၼုမ်ႇတူၼ်ႈတီး လၢတ်ႈဝႃႈ “ ဝဵင်းတူၼ်ႈတီးမၼ်းၵေႃႈၸိုဝ်ႈသဵင် လိုဝ်းယွၼ်ႉပွႆးဢွၵ်ႇဝႃႇ ပွႆႇလိူၼ် 12 ၵူၺ်း။ ၶၢဝ်းၼၼ်ႉၵူၺ်း ပိူၼ်ႈၸုတ်ႇမူၵ်ႇတႅၵ်ႇၵၼ် မႃးပၢၼ်သိုပ်ႇပၢၼ် တေႃႇယၢမ်းလဵဝ်။ သင်ဝႃႈ ႁၢမ်ႈ၊ ဢိုတ်းဢမ်ႇပၼ် ၸုတ်ႇမူၵ်ႇတႅၵ်ႇၶၢဝ်းၼႆႉၼႆ ႁိုဝ်တေၵႂႃႇမီးၾၢင်ႁၢင်ႈပွႆးယဝ်ႉၶႃႈလႃႇ” ဝႃႈၼႆ။
ပွႆးႁူင်းၾႆးမိၼ် ပီၼႆႉ တေတႄႇဝၼ်းတီႈ 4-12/11/2019။ ပီပူၼ်ႉႁဵတ်းပွႆး 10 ဝၼ်း၊ ၵူၺ်းပီၼႆႉ တေႁဵတ်း 9 ဝၼ်းၵူၺ်း ယဝ်ႉ လႄႈ ၵူၼ်းၵႃႉ လႄႈ ၸုမ်းႁူင်းၾႆးမိၼ်ၶဝ် မႆႈၸႂ်တေမီးလွင်ႈတုမ်ႉတိူဝ်ႉၵူႈၾၢႆႇၾၢႆႇ။
