ၶွမ်ႊပၼီႊထႆးတင်းမၢၼ်ႈ ႁူမ်ႈၵၼ် သူင်ႇႁႅင်းၵူၼ်း ၾၢႆႇဢိၼ်ႊၵျိၼ်ႊၼီႊယႃႊလႄႈ ၶိူင်ႈၸၢၵ်ႈ ရူတ်ႉၵႃး ၶဝ်ႈၼႂ်းပိုၼ်ႉ တီႈပွၵ်ႉ 3 ဝၢၼ်ႈမိူင်းၵူၵ်းတႂ်ႈ ၸႄႈဝဵင်းမိူင်းသၢတ်ႇ။
လုင်းၸၢႆး ၵူၼ်းမိူင်းၵူၵ်း လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝၼ်းတီႈ 28/9/2019 ၼၼ်ႉ ၶဝ်ဢဝ်ၵႃး 10 လေႃႉ 7 လမ်း၊ ရူတ်ႉ မႄႈၶူဝ်း/ ၸၢၵ်ႈထုၺ်ႇလိၼ် 1 လမ်းလႄႈ ၸၢၵ်ႈၼိုတ်ႈလိၼ် 1 လမ်း မႃးဝႆႉတီႈ ပွၵ်ႉ 3 မိူင်းၵူၵ်းတႂ်ႈဝႆႉယဝ်ႉ။ လွင်ႈ ဢၼ်ၶဝ်မႃး ၵူတ်ႇထတ်းၼႃႈလိၼ်ၼၼ်ႉ ႁဝ်းၶႃႈၵူၼ်းမိူင်း ဢမ်ႇလႆႈႁူႉၸွမ်းၶႃႈ၊ ဢမ်ႇပွင်ႇၶၢဝ်ႇလၢတ်ႈ သင်မႃးတီႈၵူၼ်း မိူင်းသင်သေဢိတ်း” ဝႃႈၼႆ။
ၶွမ်ႊပၼီႊဢၼ်တေမႃးၶုတ်းထၢၼ်ႇႁိၼ်တီႈမိူင်းၵူၵ်းသေ တင်ႈႁူင်းၾႆးၾႃႉ တႃႇ သူင်ႇႁႅင်းၾႆးၶၢႆပၼ်ၶႄႇၼၼ်ႉ ပဵၼ် ၶွမ်ႊပၼီႊထႆး သႃႁႃၵွၼ်း ဢိၼ်ႊဝႅတ်ႊမႅၼ်ႊ (မႁႃၶျူၼ်း) ဢၼ်ပဵၼ်ၶွမ်ႊပၼီႊ ဢွၼ်ႇတႂ်ႈၶွမ်ႊ ပၼီႊ Mai khot coal company ႁူမ်ႈၵၼ်တင်း ၶွမ်ႊပၼီႊသူၺ်ႇယေႇၵၢၼ်ႇ (Golden Lake Co.,Ltd) ၸဵမ်ၸိူဝ်းၼႆႉ တေႁူမ်ႈၵၼ်သေၶုတ်း။
လုင်းၸၢႆး လၢတ်ႈဝႃႈ “ တေပဵၼ် 2 ၶွမ်ႊပၼီႊၼႆႉ တေႁူမ်ႈၵၼ်သေၶုတ်း။ ဢွင်ႈတီႈဢၼ်ၶဝ်တေမႃးၶုတ်းၼၼ်ႉ တေ ပဵၼ်ၾၢႆႇတၢင်းၸၢၼ်းမိူင်းၵူၵ်း။ တၢင်းၵႂၢင်ႈပိုၼ်ႉတီႈတေၶုတ်း တေမီးမွၵ်ႈ 3,000 ဢေႊၶိူဝ်ႊပၢႆ။ မိူဝ်ႈဝႃး ဝၼ်းတီႈ 1/10/2019 ႁဝ်းၶႃႈ ၵႂႃႇႁူပ်ႉၶဝ် ၸွမ်းတၢင်း မိူဝ်ႈၽွင်းၶဝ်တိုၵ်ႉၵူတ်ႇထတ်းၼႃႈလိၼ်ယူႇၼၼ်ႉ ဢၼ်ႁဝ်းၶႃႈ လႆႈၵႂႃႇဝႃႈ ၶဝ်မိူဝ်ႈဝႃး ၼၼ်ႉ သူၶဝ်ႈမႃးၵေႃႈ သူဢမ်ႇပွင်ႇႁဝ်းၵူၼ်းပိုၼ်ႉတီႈ ၵမ်းၼႆႉ ၶွမ်ႊပၼီႊသူၺ်ႇယေႇၵၢၼ်ႇၶဝ်ၼၼ်ႉ မႃးယွၼ်းတွင်း ပၢၼ်ႇၶိုၼ်း ၶဝ်ဝႃႈ ဢမ်ႇၸၢင်ႈႁဵတ်းႁိုဝ် ထၢင်ႇဝႃႈ ၶဝ်ၸႅင်ႈၸူးၵူၼ်းဝၢၼ်ႈသဵင်ႈယဝ်ႉၼႆဢေႃႈ။ ႁဝ်းၵေႃႈဝႃႈ ႁဝ်းဢမ်ႇလႆႈ ႁူႉသင်။ ၶဝ်ၵေႃႈ ၶိုၼ်းလၢတ်ႈဝႃႈ တေႁႂ်ႈပေႃႈလဵင်ႉၶဝ် မႃးထူပ်း” ဝႃႈၼႆ။
တေႃႈလဵဝ် ရူတ်ႉၵႃးတင်း ၽူႈလူင်ႉလႅၼ်ႇၾၢႆႇဢိၼ်ႊၵျိၼ်ႊၼီႊယႃႊၼၼ်ႉ လႆႈဢွၼ်လူင်းမႃးၵူတ်ႇထတ်းၵၼ် လွင်ႈတေ ၶုတ်း ထၢၼ်ႇႁိၼ်တီႈမိူင်းၵူၵ်းၼႆႉယဝ်ႉ ဝႃႈၼႆ။
“ လႆႈႁၼ် ဢဵၼ်ႁႅင်းၶဝ် လူင်းမႃး မွၵ်ႈႁူဝ်ၵူၼ်း ႁိမ်း 10 ၼႆႉ၊ ၽူႈဢွၼ်ႁူဝ်မႃးတႄႉ ပဵၼ်ၶွမ်ႊမၼီႊသူၺ်ႇယေႇၵၢၼ်ႇ၊ ၽူႈ လူင်ႉလႅၼ်ႇ ဢိၼ်ႊၵျိၼ်ႊၼီႊယႃႊၸိူဝ်းၼၼ်ႉတႄႉ ၵမ်ႈၼမ် ပဵၼ်ၵူၼ်းၸၢဝ်းထႆး။ ထၢၼ်ႇႁိၼ် ဢၼ်ၶဝ်တေဢၢၼ်း ၶုတ်းၼၼ်ႉ တေမီးတၢင်းၾၢႆႇၸၢၼ်းမိူင်းၵူၵ်း။ ဢၼ်ႁဝ်းၶႃႈ ၵူၼ်းမိူင်းၵူၵ်းယူႇၼႆႉသမ်ႉ ၾၢႆႇႁွင်ႇတၢင်း ႁဵတ်းၼႆၵူၺ်းၶႃႈ ၸမ် ၵၼ်ၶႃႈဢေႃႈ။ ႁဝ်းၶႃႈတႄႉ ဢမ်ႇၶႂ်ႈႁႂ်ႈၶုတ်းၶႃႈ ပေႃးၶုတ်းၵေႃႈ တေတုမ်ႉတိူဝ်ႉ လွင်ႈယူႇသဝ်းၵိၼ်သၢင်ႈ၊ သၽႃႇဝ သိင်ႇ ဝႅတ်ႉလွမ်ႉလႄႈ ပၢႆးယူႇလီၵူၼ်းမိူင်းၶႃႈဢေႃႈ” ၵူၼ်းမိူင်းၵူၵ်း ပိုၼ်ႉတီႈၵေႃႉၼိုင်ႈတႄႉ လၢတ်ႈၼႄၼင်ႇၼႆ။
မိူင်းၵူၵ်းၼႆႉ ယူႇၼႂ်းၸႄႈဝဵင်းမိူင်းသၢတ်ႇ ၼႂ်းၵႄႈမိူင်းသၢတ်ႇ – ၵဵင်းတုင်။ မီးၾၢႆႇႁွင်ႇမိူင်းသၢတ်ႇ ယၢၼ်ၵႆဝဵင်းမိူင်းသၢတ်ႇ မွၵ်ႈ 36 လၵ်း။ ယၢၼ်ၵႆၸႄႈဝဵင်းၵဵင်းတုင် မွၵ်ႈ 70 လၵ်းပၢႆ။ တင်းမူတ်းမီးလင်ႁိူၼ်း 200 ပၢႆ။
လုင်းၸၢႆး သိုပ်ႇလၢတ်ႈဝႃႈ “ၵူၼ်းမိူင်းၵူၵ်းႁဝ်းၶႃႈၼႆႉ ၵမ်ႈၼမ် ပဵၼ်ၵူၼ်းႁဵတ်းၵိၼ်ၵၢၼ်ႁႆႈၼႃးလဵင်ႉတွင်ႉၵၼ်မႃး ပီ ယၢဝ်းၶၢဝ်းႁိုင်ၶႃႈယဝ်ႉ။ သင်ဝႃႈ ၶဝ်မႃးၶုတ်းထၢၼ်ႇႁိၼ်တႄႉ ၼမ်ႉလဵင်ႉၼႃးႁဝ်း ၸိူဝ်းၼႆႉ တေလူႉ၊ ယဝ်ႉၵေႃႈ ၼမ်ႉ ၵူၵ်းဢၼ်လႆယူႇယၢမ်းလဵဝ်ၼႆႉ တေပဵၼ်ၵွင်ႉသေ တေလႆၶဝ်ႈၵႂႃႇတၢင်းမိူင်းထႆး၊ ဢွၵ်ႇၵႂႃႇတၢင်း ၵဵင်းႁၢႆးပုၼ်ႉ။ယွၼ်ႉၼၼ် သင်ပဵၼ်လႆႈတႄႉ ဢမ်ႇၶႂ်ႈႁႂ်ႈမႃးၶုတ်းမႃးယႃႉၶႃႈ ၶႂ်ႈတုၵ်းယွၼ်းၼင်ႇၼႆ” ဝႃႈၼႆ။
လွင်ႈတုမ်ႉတိူဝ်ႉၵူၼ်းမိူင်းၼႆႉ မိူၼ်ၼင်ႇလွင်ႈသုမ်းတီႈလိၼ်သူၼ်ႁႆႈၼႃႈ၊ လွင်ႈပူၼ်ႉပႅၼ်သုၼ်ႇလႆႈသုၼ်ႇပဵၼ်ၸိူဝ်းၼႆႉ ၵူၼ်းမိူင်း တေလႆႈႁူပ်ႉထူပ်းသေဢမ်ႇၵႃး ထိုင်တီႈလိုၼ်းသုတ်းမႃး ၸဝ်ႈၶွင်တီႈလိၼ်ဢမ်ႇၸၢင်ႈႁဵတ်းသင်၊ လႆႈၶၢႆႉတီႈယူႇ တၼ်းသဝ်းထိုင်တီႈၵႂႃႇႁဵတ်းၵၢၼ်မိူင်းႁိမ်းႁွမ်းၸိူဝ်းၼႆႉ ဝႃႈၼႆ။
ပူၼ်ႉမႃး 2 ပီၼၼ်ႉၵေႃႈ ၵူၼ်းမိူင်းၵူၵ်း ႁူမ်ႈၵၼ်သေ လူင်းလၢႆးမိုဝ်း သၢၼ်ၶတ်းလွင်ႈၶုတ်းထၢၼ်ႇႁိၼ်၊ တင်ႈႁဵတ်းႁူင်း ၾႆးၾႃႉ တၢင်ႇယိုၼ်ႈထိုင်တီႈၽူႈၵွၼ်းၸႄႈတွၼ်ႈမိူင်းသၢတ်ႇမႃးယဝ်ႉၵမ်းၼိုင်ႈ ဝႃႈၼႆ။
