လူင်ပွင်ၸိုင်ႈတေၵေႃႇသၢင်ႈသဵၼ်ႈတၢင်းလၼ်ႈတႂ်ႈလိၼ် Underpass ႁိမ်းၸမ်ၵၢတ်ႇလူင် ဝဵင်းတူၼ်ႈတီး  တႃႇတေၵႄႈလိတ်ႈပၼ်ႁႃ ၵူၼ်းၶၢမ်ႈတၢင်းယၢပ်ႇလႄႈ တႃႇၵႄႈလိတ်ႈ ပၼ်ႁႃရူတ်ႉတိတ်း။

တႃႇၵေႃႇသၢင်ႈ ၶူဝ်ၶၢမ်ႈတၢင်း ဢမ်ႇၼၼ် ၵေႃႇသၢင်ႈသဵၼ်ႈတၢင်းတႂ်ႈလိၼ်  တႃႇၵႄႈလိၼ်ႈပၼ်ႁႃရူတ်ႉၵႃးတိတ်းၶမ်၊ ပၼ်ႁႃၵူၼ်းၶၢမ်ႈတၢင်းငၢႆႈ ၼႆႉလူင်ပွင်ၸိုင်ႈၶိုင်ပွင်ဢၢင်ႈဢၢၼ်းမႃးၸဵမ်မိူဝ်ႈႁူဝ်ပီ 2019 ၼႆႉ။

ၽွင်းလူင်ၾၢႆႇသဵၼ်ႈတႃႈသၢႆတၢင်း လူင်ပွင်ၸိုင်ႈမိူင်းတႆး ၶုၼ်ႇယႄးထူၺ်း လၢတ်ႈၼႂ်းပၢင်ၵုမ် သၽႃးၸႄႈမိူင်းတႆး ပွၵ်ႈၵမ်း 2 ၵမ်းထူၼ်ႈ 6  ဢၼ်ၸတ်းႁဵတ်းယဝ်ႉတူဝ်ႈၵႂႃႇမိူဝ်ႈဝၼ်းတီႈ  24/9/2019   ဝႃႈ – “ပေႃးႁဵတ်းၶူဝ်ၶၢမ်ႈ တေလႆႈႁဵတ်းသုင် တေလႆႈဢဝ်ပိုၼ်ႉတီႈၼမ်၊ တႃႇၵူၼ်းထဝ်ႈလႄႈၵူၼ်းၶီႇလေႃႉ တေယၢပ်ႇၽိုတ်ႇ။ ၵွပ်ႈၼၼ် ပေႃးၾႆးၾႃႉဢမ်ႇမီးလွင်ႉၶွင်ႉၶမ် ပေႃးလၢႆႇၼမ်ႉလႆၶႅမ်ႉတႄႉ ႁဵတ်းသဵၼ်ႈတၢင်းလၼ်ႈတႂ်ႈ လိၼ် ၼႆႉ သၢင်ႇထုၵ်ႇလိူဝ်ပိူၼ်ႈ”  ဝႃႈၼႆ။

မိူဝ်ႈၽွင်းလူင်ပွင်ၸိုင်ႈတႄႇလူင်းပိုၼ်ႉတီႈ လဵပ်ႈႁဵၼ်းတႃႇတေၵေႃႇသၢင်ႈၶူဝ်ၶၢမ်ႈတၢင်းၼၼ်ႉ ၵူၼ်းမိူင်းတူၼ်ႈတီး ၊ ပိူင်လူင် ၵူၼ်းပိုတ်ႇလၢၼ်ႉ ၶၢႆၶူဝ်း တီႈၵၢတ်ႇလူင် ဢမ်ႇၽွမ်ႉ ဢမ်ႇပေႃးၸႂ်။ ႁၼ်ထိုင်ဝႃႈ ပေႃးၵေႃႇသၢင်ႈၶူဝ် တေလႆႈပိၵ်ႉလၢၼ်ႉ  ၵၢတ်ႈၵၢၼ်ၵၢတ်ႈငၢၼ်း ဝႃႈၼႆ။

ဢူးမွင်ႇမွင်ႇ ႁူဝ်ၼႃႈၶွမ်ႊမတီႊၵၢတ်ႇလၢတ်ႈတီႈၽူႈတွႆႇႁွၵ်ႈဝႃႈ – “ၶူဝ်ၵေႃႈလီယူႇ၊ သဵၼ်ႈတၢင်းလၼ်ႈတႂ်ႈလိၼ်ၵေႃႈလီယူႇၶႃႈ။ ၵူၺ်းၵႃႈ ပေႃးႁဵတ်းတၢင်းတႂ်ႈလိၼ်တႄႉ ၵူဝ်ၼမ်ႉထူမ်ႈၵူၺ်းၶႃႈဢေႃႈ။ ပေႃးၼမ်ႉထူမ်ႈသေ ဢမ်ႇၵႂႃႇမႃးလႆႈ သမ်ႉတေလႆႈၶိုၼ်ႈၼိူဝ်တၢင်းလူင်ၶိုၼ်းၵူၺ်းၼင်ႇၵဝ်ႇ။  ၵႃးၵေႃႈတေတိတ်းၶမ်မိူၼ်ၵဝ်ႇၶိုၼ်းၵူၺ်း။ ပေႃးႁဵတ်းၶူဝ်ၶၢမ်ႈတၢင်းတႄႉ ၼမ်ႉထူမ်ႈၵေႃႈဢမ်ႇလႆႈမႆႈၸႂ် ၾႆးၾႃႉၵေႃႈ ဢမ်ႇလႆႈမႆႈၸႂ် ယဝ်ႉၶႃႈ။ ပိူင်လူင် တႃႇၵူၼ်းမိူင်းလွတ်ႈၽေးၵူၺ်းၶႃႈ ”- ဝႃႈၼႆ။

ႁိမ်းႁွမ်း ၵၢတ်ႇလူင်ဝဵင်းလူင်တူၼ်ႈတီးၼႆႉ ၵူၼ်းၵိုၼ်း ငိုၼ်းၶွၼ်ႈ၊ လူတ်ႉၵႃးၵေႃႈၼမ် ၵူၼ်းတူင်ႉၼိုင်ၵႂႃႇမႃးတီႈၼၼ်ႈၼိုင်ႈ ဝၼ်း ဢမ်ႇယွမ်းမိုၼ်ႇ။ ၾၢႆႇၼိုင်ႈမီး City Square ။ ထႅင်ႈၾၢႆႇၼိုင်ႈသမ်ႉပဵၼ် ၵၢတ်ႇလူင်။ ပိူင်လူင်  လူတ်ႉႁူင်းယႃ ၊ လူတ်ႉၶႄၾႆး ဢမ်ႇၸၢင်ႈၵႂႃႇဝႆး။ ၾၢႆႇၼိုင်ႈၵေႃႈပဵၼ်ယွၼ်ႉ လူတ်ႉၵႃးၵွပ်ႈၼႆလႄႈ တႃႇတေၵေႃႇသၢင်ႈသဵၼ်ႈတၢင်းၼႆႉ ၾၢႆႇလူင်ပွင်ၸိုင်ႈမိူင်းတႆး လႆႈလူင်းတူၺ်းပိုၼ်ႉတီႈဝႆႉၸဵမ်မိူဝ်ႈႁူဝ်ပီ 2019 ၼႆႉ။

မဵဝ်းၸေႃႇဢွင်ႇ ၵႅမ်ၽူႈၵွၼ်းပလိၵ်ႈၾၢႆႇၵုမ်းရူတ်ႉၵႃး လၢတ်ႈဝႃႈ-  “လွင်ႈယၢပ်ႇၽိုတ်ႇတႄႉမၼ်းတိုၼ်းမီး။ ယွၼ်ႉဝႃႈ တီႈၼႆႈ ၵၢတ်ႇလူင်ၵေႃႈမီး  City Square ၵေႃႈမီး။ ၽွင်းၵေႃႈသၢင်ႈတႄႉ သဵၼ်ႈတၢင်းတိုၼ်းတေလႆႈပိၵ်ႉၶႃႈယဝ်ႉ။ ၵူၺ်းၵႃႈၽူႈမီးပုၼ်ႈၽွၼ်းၶဝ်တေဢဝ်ႁူမ်ႇလူမ်ႈပၼ်လီလီယူႇၶႃႈ။  ၶိူင်ႈၸၢၵ်ႈလူင် ၸိူဝ်းၼႆႉ ပေႃးၵၢင်ဝၼ်းတႄႉ တိုၼ်းတေဢမ်ႇၸၢင်ႈဢဝ်ၵႂႃႇမႃးၶႃႈၼေႃႈ။   ၼင်ႇႁိုဝ်သဵၼ်ႈတၢင်းတေဢမ်ႇပိၵ်ႉတၼ်ၼၼ်ႉ ႁဝ်းၶႃႈတေႁူမ်ႈမိုဝ်းၵၼ်သေ ၶတ်းၸႂ်တူၺ်းထိုင်ပၼ်ယူႇၶႃႈ။” – ဝႃႈၼႆ။

တီႈဢၼ်ႇဢၢၼ်းတေႁဵတ်းသဵၼ်ႈတၢင်းတႂ်ႈလိၼ်ၼႆႉ ဢၼ်လႆႈတၢင်ႇယိုၼ်ႈဝႆႉမီးယူႇသီႇတီႈ။  ၼႂ်းၵႄႈ Asialight market လႄႈ ၵၢတ်ႇၵၢင်ၶမ်ႈ တီႈၼိုင်ႈ ၊ ၼႂ်းၵႄႈ City Square လႄႈ ၵၢတ်ႇလူင်တီႈၼိုင်ႈ၊   တီႈလၢၼ်ႉၶၢႆႉၾူၼ်း Oppo တီႈ City Square လႄႈ ယေးငိုၼ်း KBZ တီႈၵၢတ်ႇလူင် တီႈၼိုင်ႈ လႄႈတၢင်းၼႂ်းၵႄႈႁူဝ်တၢင်း ( ရေထွက်ဦး) လႄႈၵၢတ်ႇလူင် တီႈၼိုင်ႈၸဵမ်ၸိူဝ်းၼႆႉ  ။

တီႈဢၼ်ၵူၼ်းၵိုၼ်းသေပိူၼ်ႈတႄႉ ပဵၼ်တီႈ ၼႃႈၵၢတ်ႇလူင် လႄႈ City Square ။ ၵူၼ်းၵႂႃႇမႃးတူင်ႉၼိုင်တီႈၼၼ်ႈ ၼိုင်ႈဝၼ်းဢမ်ႇယွမ်း မိုၼ်ႇ။ ၶၢဝ်းၵူၼ်းၵိုၼ်းသေပိူၼ်ႈတႄႉ ပဵၼ်ၶၢဝ်းၵၢင်ၼႂ် 8 မူင်း လႄႈ ဝၢႆးဝၼ်း 4-5 မူင်း ။