သင်ၶၸဝ်ႈ ၶူးသွၼ်လႄႈ လုၵ်ႈႁဵၼ်း တိူၵ်ႈသွၼ်လိၵ်ႈ ဝတ်ႉၵုင်းပဝ်း ၵႃလိ ၸတ်းႁဵတ်းပၢင်ၵုမ်သႅမ်ႊမီႊၼႃႊ လူၺ်ႈ လၢႆးၸတ်းသၢင်ႈဝၢင်းၽႅၼ် ယူင်ႉၵၢၼ်ပၢႆး ပၺ်ၺႃ။
ပၢင်ၵုမ်ၼႆႉ ၸတ်းမိူဝ်ႈဝၼ်းတီႈ 24/9/2019 တီႈတိူၵ်ႈသွၼ်လိၵ်ႈ ဝတ်ႉၵုင်းပဝ်း ဝဵင်းၵႃလိ ၸႄႈဝဵင်းၵုၼ်ႁဵင် ၸႄႈတွၼ်ႈ လွႆလႅမ် ၸိုင်ႈတႆးပွတ်းၸၢၼ်း။
ၸဝ်ႈၶူးၶမ်းလႅင်း ၶေႇမိၼ်ႇတ (B.A, M.Ed) လၢတ်ႈတီႈၽူႈတွႆႇႁွၵ်ႈဝႃႈ “ ၶူးသွၼ်တင်း လုၵ်ႈႁဵၼ်း ႁူမ်ႈၵၼ်သေ ၸတ်း ႁဵတ်းပၢင်သွၼ် ၶၢဝ်းပွတ်း ၼႂ်းဝႃႇသၢမ်လိူၼ်သေယဝ်ႉ ႁဝ်းၶႃႈ ၸင်ႇလႆႈဢွၼ်ၵၼ်ၸတ်းႁဵတ်းပၢင်ၵုမ် ပဵၼ်ၵၢၼ်တူင်ႉ ၼိုင်ၶူးသွၼ်လႄႈ လုၵ်ႈႁဵၼ်းပဵၼ်ပၢင်သႅမ်ႊမီႊၼႃႊပွၵ်ႈႁႅၵ်ႈတွၼ်ႈတႃႇႁဝ်းၶႃႈ” ဝႃႈၼႆ။
ပၢင်သွၼ် ဢၼ်လႆႈၸတ်းႁဵတ်းမႃး ၼႂ်းဝႃႇသႃ သၢမ်လိူၼ်ၼႆႉ ပဵၼ်ပၢင်သွၼ်လိၵ်ႈဢိင်းၵလဵတ်ႈ၊ ပၢင်သွၼ်လိၵ်ႈၶႄႇ လႄႈ ပၢင်သွၼ်တႅမ်ႈႁၢင်ႈ။ တင်းမူတ်းလုၵ်ႈႁဵၼ်းမီး 33 ၵေႃႉ/ၸဝ်ႈ။ ၶူးပူင်သွၼ်ပၼ်သမ်ႉ ၸဝ်ႈၶူးၶမ်းလႅင်း ၶေႇမိၼ်ႇတ (B.A, M.Ed) ဢဝ်ပုၼ်ႈၽွၼ်းသွၼ်ပၼ် လိၵ်ႈဢိင်းၵလဵတ်ႈ၊ ၶူးသွၼ်လိၵ်ႈၶႄႇသမ်ႉ ပဵၼ်ၼၢင်းမူၺ်ငိုၼ်းလႄႈ ၶူးသွၼ် တႅမ်ႈႁၢင်ႈသမ်ႉ ပဵၼ်ၸဝ်ႈၶူးဢေႃးဝႃႇတ ၸဵမ်ၸိူဝ်းၼႆႉ။