ၸဝ်ႈႁေႇမႃႇတႅၵ်ႈ ၵေႃႉပဵၼ်လုၵ်ႈယိင်း ၸဝ်ႈၾႃႉလူင်ယွင်ႁူၺ်ႈ ၸဝ်ႈသူၺ်ႇတႅၵ်ႈ ယိုၼ်ႈလိၵ်ႈ ယွၼ်းၶိုၼ်းႁေႃလူင် ထိုင် ၸွမ်ၸိုင်ႈမိူင်းႁူမ်ႈတုမ် ပဵၼ်ပွၵ်ႈၵမ်း 5 ယဝ်ႉ။

လိၵ်ႈၼႆႉ လႆႈယိုၼ်ႈမိူဝ်ႈဝၼ်းတီႈ 12/09/2019 ယူႇတီႈမေးၼၢင်းလုၵ်ႈလၢၼ် ၸဝ်ႈၾႃႉလူင်ယွင်ႁူၺ်ႈသေ တုၵ်းယွၼ်း ၶိုၼ်းႁေႃလူင် ယွင်ႁူၺ်ႈၼႆႉမႃး ၸဵမ်မိူဝ်ႈပီ 2013 ။ တေႃႇထိုင်ပီ 2017 ယိုၼ်ႈလိၵ်ႈမႃးယဝ်ႉ 4 ပွၵ်ႈသေတႃႉ လူင်ပွင်ၸိုင်ႈ ဢမ်ႇတွပ်ႇသင်ၶိုၼ်းလႄႈ ၸင်ႇလႆႈယိုၼ်ႈလိၵ်ႈထႅင်ႈၵမ်းၼိုင်ႈ ပေႃးသွၼ်ႇၼပ်ႉတင်းမူတ်း လႆႈယိုၼ်ႈလိၵ်ႈၵႂႃႇ 5 ပွၵ်ႈ ပႃးပွၵ်ႈၼႆႉယဝ်ႉ ဝႃႈၼႆ။

ၸဝ်ႈႁေႇမႃႇတႅၵ်ႈ ၵေႃႉပဵၼ်လုၵ်ႈယိင်း ၸဝ်ႈၾႃႉယွင်ႁူၺ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ႁဝ်းၶႃႈ တၢင်ႇယွၼ်းၵႂႃႇ ၼၼ်ႉ ၶဝ်ဢမ်ႇတွပ်ႇသင်မႃး တေပၼ်ႁႃႉ ဢမ်ႇပၼ်ႁႃႉ ၼႂ်းၵၢင် ၸႂ်ၶဝ်မီး ၸိူင်ႉႁိုဝ် ဢၼ်ဝႃႈၼၼ်ႉ။ ၼႂ်းလိၵ်ႈၼၼ်ႉ ႁဝ်းၶႃႈတႅမ်ႈဝႆႉယူႇ ၶေႃႈယိူင်းဢၢၼ်း ဢၼ်ႁဝ်းတေႁဵတ်း လွင်ႈဝႃႈ တေၶၢႆၼႆၼၼ်ႉ ႁဝ်းၶႃႈဢမ်ႇတႅမ်ႈ ပႃးသေၶေႃႈ။ ၶဝ်တေဢမ်ႇယုမ်ႇႁဝ်းယူဝ်ႉ။ တီႈၽူႈၵိူဝ်းၵုမ်ၸိုင်ႈမိူင်းႁူမ်ႈတုမ်ၼႆႉ ႁဝ်းၶႃႈ လႆႈ ယွၼ်းမႃး မီး 2 ပွၵ်ႈယဝ်ႉ” ဝႃႈၼႆ။

မိူဝ်ႈပီ 2017 လူင်ပွင်ၸိုင်ႈမိူင်းႁူမ်ႈတုမ်ၶိုင်ဢၢင်ႈၶႂ်ႈႁဵတ်းၵၢတ်ႇၶၢႆတၢင်းၵိၼ်တီႈႁေႃယွင်ႁူၺ်ႈ ၵူၼ်းမိူင်းတႆး ဢမ်ႇၽွမ်ႉ၊ ႁူမ်ႈၵၼ်သၢၼ်ၶတ်းသေဢမ်ႇၵႃး တုၵ်းယွၼ်းႁႂ်ႈပၼ်ၶိုၼ်းၼႂ်းမိုဝ်းလုၵ်ႈလၢင်းၸဝ်ႈၾႃႉၶိုၼ်း။

ၸဝ်ႈႁေႇမႃႇတႅၵ်ႈ လၢတ်ႈဝႃႈ “ ပေႃးလႆႈမႃးၶိုၼ်းၼႆႉ ပႃႈၶဝ်တေမႄးၵုမ်းလုမ်းလႃးၶိုၼ်းလီလီ၊ ယဝ်ႉၵေႃႈ တေႁဵတ်း ၽွၼ်ႊတေႊသျိၼ်ႊ။ ယဝ်ႉၵေႃႈ ပိုတ်ႇပၼ် ၵူၼ်းၼွၵ်ႈမိူင်းၶဝ် လႆႈၶဝ်ႈမႃးဢႅဝ်ႇလႄႇ လဵပ်ႈႁဵၼ်းၵၼ် ႁႂ်ႈႁူႉယဵၼ်ႇငႄႈၶွင် တႆးႁဝ်း လွင်ႈၸဝ်ႈၾႃႉမိူင်းတႆးႁဝ်း ယူႇသဝ်းဢုပ်ႉပိူင်ႇၵႂႃႇၸိူင်ႉႁိုဝ် ၸဵမ်ၸိူဝ်းၼႆႉ။ သင်ဝႃႈ ႁဵတ်းၼႆၵေႃႈ ပႃႈတေဢမ်ႇ ႁဵတ်းၵေႃႉလဵဝ် တေႁူမ်ႈၵၼ်တင်းၶုၼ်မိူင်း မိူင်းတႆးသေ ႁူမ်ႈၵၼ်ႁဵတ်းသၢင်ႈၵႂႃႇ” ဝႃႈၼႆ။

ႁေႃလူင်ယွင်ႁူၺ်ႈၼႆႉ ၸဝ်ႈၾႃႉလူင်သႃႇၸဝ်ႈမွင်ႇတႄႇၵေႃႇသၢင်ႈဝၢင်းဢုတ်ႇသေ ၸဝ်ႈၾႃႉလူင်ၸဝ်ႈသူၺ်ႇတႅၵ်ႈ ၵေႃႇ သၢင်ႈယဝ်ႉတူဝ်ႈမိူဝ်ႈပီ 1923။ ၸဝ်ႈၾႃႉလူင်ၸဝ်ႈသူၺ်ႇတႅၵ်ႈ ယူႇသဝ်းၼင်ႈႁေႃ 30 ပီမိူင်း။ 1962 ၼေႇဝိၼ်း ယိုတ်း ဢႃႇၼႃႇ၊ ယိုတ်းပႃးႁေႃယဝ်ႉ ဢဝ်ႁဵတ်းပဵၼ် ႁွင်ႈၼႄၾိင်ႈႁိတ်ႈႁွႆး၊ ႁွင်ႈၼႄပိုၼ်းၸဝ်ႈၾႃႉ၊ ႁွင်ႈၼႄပိုၼ်းၽြႃး ပဵၼ် ၸဝ်ႈ။ တေႃႇထိုင်ဝၼ်းမိူဝ်ႈၼႆႉ ဢႃယု ႁေႃလူင်မီး ၸမ် 100 ပီယဝ်ႉ။