ပလိၵ်ႈထႆး ၵဵင်းမႆႇ ႁႄႉရူတ်ႉတၢင်ႇၵူၼ်းပဵၼ် ၵူတ်ႇထတ်းတီႉလႆႈယႃႈမႃႉ 6 သႅၼ်မဵတ်ႉလႄႈ ၵူၼ်း 4 ၵေႃႉ။
ဝၼ်းတီႈ 30/09/2019 ယၢမ်းၵၢင်ၼႂ် ပလိၵ်ႈထႆးႁႄႉ ၵူတ်ႉထတ်းရူတ်ႉၵႃးတၢင်ႇၵူၼ်းပဵၼ် လမ်းၼိုင်ႈ ၼႂ်းဝဵင်းၵဵင်းမႆႇ ၸိုင်ႈထႆး တီႉလႆႈယႃႈမႃႉ ႁိမ်း 6 သႅၼ်မဵတ်ႉ။
သိုဝ်ႇၶၢဝ်ႇထႆးရတ်ႉဢွၵ်ႇဝႆႉဝႃႈ “ ရူတ်ႉၵႃးလမ်းၼၼ်ႉ ပၼ်ႇလဵပ်ႈယူႇၸွမ်း ၼႂ်းတူဝ်မိူင်း ၵဵင်းမႆႇ လၢႆလၢႆၵမ်း ပလိၵ်ႈလႆႈ ထၢင်ႇထိူမ်သေ ၸွမ်းႁွႆးရူတ်ႉလမ်းၼၼ်ႉ ႁႄႉသေၵူတ်ႇထတ်း၊ ႁၼ်မႅၼ်ႈယႃႈမႃႉ 6 သႅၼ်မဵတ်ႉ။ လႆႈႁူႉဝႃႈ ရူတ်ႉၼၼ်ႉ ႁေႃႈပၼ်ႇဝဵင်းတႃႇဢဝ်ယႃႈမွပ်ႈပၼ်တီႈၵူၼ်းသိုဝ်ႉ။ ပလိၵ်ႈတီႉလႆႈ” ဝႃႈၼႆ။
ၼႂ်းၵူၼ်းၸိူဝ်းၺႃးတီႉ 4 ၵေႃႉၼၼ်ႉ ပႃးဢွၼ်ႇၸၢႆး ဢႃယု 17 ပီ ၵေႃႉၼိုင်ႈ။ ယၢမ်းလဵဝ် လႆႈသူင်ႇဝႆႉတီႈသုၼ်ပူၵ်းပွင်လုၵ်ႈ ဢွၼ်ႇ တီႈၵဵင်းမႆႇဝႆႉယဝ်ႉ ဝႃႈၼႆ။
“ ပလိၵ်ႈလႆႈၵူတ်ႇထတ်းထဵတ်ႈထၢမ် ၵူၼ်းလၵ်ႉတေႃႉသူင်ႇယႃႈမဝ်းၵမ်ၸိူဝ်းၼၼ်ႉ ၶဝ်ယွမ်းႁပ်ႉတွပ်ႇလၢတ်ႈဝႃႈ လႆႈႁပ်ႉ တေႃႉသူင်ႇယႃႈမႃႉၼႆႉ တီႈၵဵင်းႁၢႆး၊ တေဢဝ်မႃးသူင်ႇၵူၼ်းသိုဝ်ႉၵဵင်းမႆႇ။ ႁဵတ်းၼႆမႃး လၢႆလၢႆၵမ်းယဝ်ႉ လႆႈႁပ်ႉၵႃႈၸၢင်ႈ ၼိုင်ႈပွၵ်ႈလႂ် 6-7 သႅၼ်ဝၢတ်ႇ” သိုဝ်ႇၶၢဝ်ႇထႆးရတ်ႉတႅမ်ႈ ဢွၵ်ႇဝႆႉ ၼင်ႇၼႆ။
ၵဵဝ်ႇၵပ်းလွင်ႈၼႆႉ တေႃႈလဵဝ် ယူႇတီႈပလိၵ်ႈထႆး လႆႈၵုမ်းၶင်တူဝ် ပိုတ်ႇလိူင်ႈၸွမ်းၼင်ႇပၵ်းပိူင်မၢႆမီႈဝၢၼ်ႈမိူင်းမီးၼၼ်ႉ ဝႃႈၼႆ။
မိူဝ်ႈၼႆႉ ဝၼ်းတီႈ 01/10/2019 ယၢမ်းၵၢင်ၼႂ် ပလိၵ်ႈထႆးၸတ်းႁဵတ်းပၢင်သပ်းၸႅင်ႈၶၢဝ်ႇ လွင်ႈတီႉလႆႈယႃႈမဝ်းၵမ်/ ယႃႈ မႃႉ ပွၵ်ႈၼႆႉ တီႈႁူင်းပလိၵ်ႈၽၢၵ်ႈ 5 ဝဵင်းၵဵင်းမႆႇ ၸိုင်ႈထႆး။
