လိၵ်ႈပၢႆႉၼမ်ႉပွင်ႈဢၼ်ပူၵ်းၼိူဝ်သဵၼ်ႈတၢင်း ၼမ်ႉပွင်ႈ – မိူင်းယႆၼၼ်ႉ ၺႃးၵူၼ်းဢမ်ႇႁူႉၾၢႆႇ ဢဝ်သီလမ်လၢႆႉတႃးၶႂႆႇ ၶႃပႄ တင်းသွင်ၾၢႆႇ ဝႃႈၼႆ။

ဝၼ်းတီႈ 24 လိူၼ်သႅပ်ႊထႅမ်ႊပိူဝ်ႊ 2019 ၼႆႉ ပၢႆႉလိၵ်ႈဢၼ်ပူၵ်းပၵ်းႁူဝ်ၼမ်ႉပွင်ႈ ပွၵ်ႉ 6 ၶၢႆးၽိုဝ်ႈ သဵၼ်ႈတၢင်းၼမ်ႉပွင်ႈ – မိူင်းယႆ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ ၺႃးၵူၼ်းဢဝ်ၼမ်ႉယႃႈသီလမ်လၢႆႉတႃးၶႂႆႇၶႃပႄလႄႈ ႁဵတ်းႁႂ်ႈ ၵူၼ်းၼမ်ႉပွင်ႈတိူဝ်ႉၸႂ်။ ပၢႆႉၼၼ်ႉ တႅမ်ႈဝႆႉ 3 ၽႃသႃ လိၵ်ႈတႆး၊ လိၵ်ႈမၢၼ်ႈလႄႈ လိၵ်ႈဢင်းၵိတ်း။

ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၼမ်ႉပွင်ႈ ဢႃယု မွၵ်ႈ 40 ပီ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ပူၼ်ႉမႃး 2-3 ဝၼ်း ၼႆႉ ပဵၼ်ၽႂ် ၼမ်ႉမိုဝ်းၽႂ်မႃးႁဵတ်းၵေႃႈ ဢမ်ႇႁူႉ။ ဢဝ်သီလမ်မႃးၽၢတ်ႈလၢႆႈၶႂၢႆႇၶႃပေတင်းသွင်ၾၢႆႇဝႆႉဢေႃႈ” ဝႃႈၼႆ။

ပၢႆႉထုင်ႉၼမ်ႉပွင်ႈၼႆႉ ပူၵ်းဝႆႉ 2 တီႈ လုၵ်ႉတၢင်းလႃႈသဵဝ်ႈ မႃးတၢင်း ၼမ်ႉပွင်ႈတီႈၼိုင်ႈ၊ လုၵ်ႉတၢင်းၼမ်ႉပွင်ႈ – မိူင်းယႆ တီႈၼိုင်ႈ။ တေႃႈလဵဝ် ဢၼ်ၺႃးၵူၼ်းယႃႉ ဢဝ်သီတႃးသႂ်ႇၼၼ်ႉ ပဵၼ်ပၢႆႉတီႈဢၼ်လုၵ်ႉတၢင်းၼမ်ႉပွင်ႈ တေၵႂႃႇတၢင်း မိူင်းယႆၼၼ်ႉ ဝႃႈၼႆ။

တီႈပၢႆႉၼၼ်ႉ ၾၢႆႇတႆး တႅမ်ႈဝႆႉ ၼမ်ႉပွင်ႈႁူမ် ၸူမ်းႁပ်ႉတွၼ်ႈယူႇ၊ ထႅင်ႈၾၢႆႇၼိုင်ႈသမ်ႉတႅမ်ႈဝႆႉ မႃးႁႂ်ႈသိူဝ်း မိူဝ်းႁႂ်ႈသႃႇ။ တၢင်းၾၢႆႇမၢၼ်ႈသမ်ႉ တႅမ်ႈဝႆႉ (နမ့်ပေါင်ကြိုဆိုပါ၏)။ တၢင်းၾၢႆႇလိၵ်ႈဢင်းၵိတ်းသမ်ႉ တႅမ်ႈဝႆႉ Nam Pong ဝႃႈၼႆ။

ပၢႆႉၼႆႉ ၵေႃႇသၢင်ႈပူၵ်းပၵ်းမိူဝ်ႈ ပီၵၢႆ။ ၼိုင်ႈတီႈလႂ်တေသဵင်ႈငိုၼ်းမွၵ်ႈ 14 သႅၼ်ပျႃး။ ပၢႆႉတင်းသွင်တီႈ ႁူမ်ႈၵၼ်တူၵ်းမွၵ်ႈ 30 သႅၼ်ပျႃး။ ၵူၼ်းမိူင်း၊ ၵူၼ်းၼုမ်ႇ ထုင်ႉၼမ်ႉပွင်ႈလႄႈ သင်ၶၸဝ်ႈ ႁူမ်ႈၵၼ်သေၵေႃႇသၢင်ႈပူၵ်းပၵ်းဝႆႉ။