ၸုမ်းၽူႈၼမ်းၼႂ်း UPDJC ၶွမ်ႊမတီႊဢုပ်ႇဢူဝ်းၶၵ်ႉၵၢၼ်လွင်ႈငမ်းယဵၼ် မိူင်းႁူမ်ႈတုမ် ၵႂႃႇလဵပ်ႈႁဵၼ်းၶၵ်ႉၵၢၼ် လွင်ႈ ငမ်းယဵၼ် တီႈမိူင်းၼေႃႊဝူၺ်း/ သဝိတ်ႉသိူဝ်ႊလႅၼ်ႊ ၼႂ်းၵုၼ်တိူၵ်ႈယူႊရူပ်ႊ တႃႇၶၢဝ်းတၢင်းၼိုင်ႈဝူင်ႈ။

ဝၼ်းတီႈ 24/9/2019 ၸုမ်းၽူႈၼမ်းၼႂ်း 15 ၵေႃႉ ၶွမ်ႊမတီႊဢုပ်ႇဢူဝ်းၶၵ်ႉၵၢၼ်လွင်ႈငမ်းယဵၼ် မိူင်းႁူမ်ႈတုမ် UPDJC ၸိူဝ်းပဵၼ် တူဝ်တႅၼ်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း၊ လူင်ပွင်ၸိုင်ႈလႄႈ တပ်ႉသိုၵ်းလူင်ပွင်ၸိုင်ႈမၢၼ်ႈ ႁူမ်ႈၵၼ် လဵပ်ႈ ႁဵၼ်း ၶၵ်ႉၵၢၼ်လွင်ႈငမ်းယဵၼ် တီႈမိူင်းၼေႃႊဝူၺ်း၊ သဝိတ်ႉသိူဝ်ႊလႅၼ်ႊ တႃႇၶၢဝ်းတၢင်း 6 ဝၼ်း။

ဢူးတူႉဝုၺ်ႇ ၵႅမ်ႁူဝ်ပဝ်ႈ UPDJC လၢတ်ႈတီႈသိုဝ်ႇၶၢဝ်ႇ VOA ဝႃႈ “ တေၵႂႃႇလဵပ်ႈႁဵၼ်း ၵုၼ်တိူၵ်ႈယူႊရူပ်ႊ မိူင်းၼေႃႊဝူၺ်း တင်းမိူင်းသဝိတ်ႉသိူဝ်ႊလႅၼ်ႊ ၶၢဝ်းတၢင်းၼိုင်ႈဝူင်ႈ။ လွင်ႈဢွၵ်ႇၶၢဝ်းတၢင်းလဵပ်ႈႁဵၼ်းပွၵ်ႈၼႆႉတႄႉ ပိူင်လူင်မၼ်းလဵပ်ႈႁဵၼ်း ၶၵ်ႉ ၵၢၼ် လွင်ႈငမ်းယဵၼ်၊ လွင်ႈၵေႃႇသၢင်ႈဝၢၼ်ႈမိူင်းလူၺ်ႈလၢႆးၵတ်းယဵၼ်၊ လွင်ႈတီႊမူဝ်ႊၶရေႊၸီႊလႄႈ လွင်ႈၾႅတ်ႊ ၻရႄႊ ၸိူဝ်းၼႆႉ” ဝႃႈၼႆ။

ၵၢၼ်ဢွၵ်ႇၶၢဝ်းတၢင်းၵႂႃႇလဵပ်ႈႁဵၼ်းတီႈမိူင်းၼေႃႊဝူၺ်း၊ သဝိတ်ႉသိူဝ်ႊလႅၼ်ႊ ပွၵ်ႈၵမ်းၼႆႉ လႅပ်ႈတေမီးၵၢၼ်ဢုပ်ႇဢူဝ်း ၼွၵ်ႈလႅၵ်ႈၵၼ်ပႃးယူႇၼႆ ပတူဝ်ႇသေႃးတႃႇတူဝ်ႇမူး ၽူႈၼမ်းၼႂ်း UPDJC လၢတ်ႈ။

ပေႃးဢွၵ်ႇၶၢဝ်းတၢင်းပွၵ်ႈမႃးယဝ်ႉ ဝၼ်းတီႈ 15/10/2019 ၼႆႉ ပဵၼ်ဝၼ်းလူင်းလၢႆးမိုဝ်းၵိုတ်းတိုၵ်းတူဝ်ႈမိူင်း NCA ၶွပ်ႈတဵမ် 4 ပီ လႄႈ ၸုမ်းယိပ်းၵွင်ႈၸိူဝ်းလူင်းလၢႆးမိုဝ်း 10 ၸုမ်း တင်းလူင်ပွင်ၸိုင်ႈ ႁူပ်ႉဢုပ်ႇမၢႆတွင်းၵၼ်ၵႂႃႇ ဝႃႈၼႆ။