တႆးႁွတ်ႈမိူင်းၵွၵ်ႇ/ ၵုင်းထဵပ်ႈ တေၸတ်းႁဵတ်းပၢင်ပွႆးႁူမ်ၸူမ်းႁပ်ႉတွၼ်ႈပီမႂ်ႇတႆး 2114 ၼီႈ တႃႇၶၢဝ်းတၢင်း 2 ဝၼ်း။
ဝၼ်းတီႈ 30/11/2019 ထိုင် 1/12/2019 ယူႇတီႈၵေႃပွင်ပဵၼ်ပၢင်ပွႆး ၾၢႆႇၵမ်ႉထႅမ်ၸွႆႈၵူၼ်းထူပ်းၽေး (ဢႃးသႃၵူႉၽႆးလွႆၶူး) တင်း တႆးႁွတ်ႈမိူင်းၵွၵ်ႇ တေႁူမ်ႈၵၼ် ၸတ်းႁဵတ်းပၢင်ပွႆးႁူမ်ၸူမ်းႁပ်ႉတွၼ်ႈပီမႂ်ႇတႆး 2114 ၼီႈ တီႈ The Primary လင်လူဝ်းတတ်ႉပၢင်းၼႃးတတ်ႇ သွႆးရၢမ်း 2 မိူင်းၵွၵ်ႇ/ ၵုင်းထဵပ်ႈ ၸိုင်ႈထႆး။
ၸၢႆးသိူဝ်တႆး ၸုမ်းပွင်ၵၢၼ် ပွင်ပဵၼ်ပၢင်ပွႆး ပီမႂ်ႇတႆး 2114 ၼီႈၼႆႉ လၢတ်ႈတီႈၽူႈတွႆႇႁွၵ်ႈဝႃႈ “ ပၢင်ပွႆးပီမႂ်ႇတႆး 2114 ၼႆႉ ႁဝ်းၶႃႈ ယိူင်းဢၢၼ်းဝႆႉ ငိုၼ်းတီႈဢၼ်လႆႈမႃးၼၼ်ႉ ႁဝ်းၶႃႈတေႁၵ်းၵႃႈၸႂ်ႉၸၢႆႇသေ ဢၼ်လိူဝ်တင်းမူတ်းၼၼ်ႉ ႁဝ်းၶႃႈ တေဢဝ်မိူဝ်းၸွႆႈထႅမ်ပၼ်ပီႈၼွင်ႉၵူၼ်းပၢႆႈၽေးသိုၵ်း ၸွမ်းလႅၼ်လိၼ် တႆး – ထႆး မိူၼ်ၼင်ႇ တၢင်းၵွင်းမုင်ႈမိူင်း၊ လွႆ လမ် ၸိူဝ်းၼႆႉ” ဝႃႈၼႆ။
ပၢင်ပွႆးႁူမ်ၸူမ်း ႁပ်ႉတွၼ်ႈပီမႂ်ႇတႆး 2114 ၼီႈ တီႈ The Primary လင်လူဝ်းတတ်ႉပၢင်းၼႃးတၢတ်ႇ သွႆးရၢမ်း 2 မိူင်းၵွၵ်ႇ/ ၵုင်းထဵပ်ႈၼႆႉ တေမီးၽူႈႁွင်ႉၽဵင်းၵႂၢမ်းတႆး မႃးလဝ်ႇမူၼ်ႈတူၼ်ႈၸႂ်ပၼ် မိူၼ်ၼင်ႇ ၸၢႆးသႅင်ၸွမ်မၢဝ်း၊ ၸၢႆးဢူးလၢႆး၊ ၼၢင်း ႁွမ်ၼူၼ်း၊ ၼၢင်းၼွင်ႉၼူၼ်းလႄႈ ၸၢႆးသိူဝ်တႆး ၸဵမ်ၸိူဝ်းၼႆႉ။
တီႈပၢင်ပွႆးတေမီး ပၢင်ၶေႉၶဵင်ႇမၢၵ်ႇၼင် ႁႅင်းၵၢၼ်ယၢၼ်မိူင်း 32 ၸုမ်းတေၶႅင်ႇၵၼ်။ တေမီးၵၢၼ်ပႆ ၼႄၾၢင်ႁၢင်ႈတၢင်း ႁၢင်ႈလီသိူဝ်ႈၶူဝ်းတႆးလႄႈ လၢတ်ႈၵႂၢမ်းတႆး ၸႅင်ႈ/ပီႇ ဢွၼ်ႇယိင်းၸၢႆး 5 ၶူပ်ႇ ထိုင် 10 ၶူပ်ႇ တႃႇ 16 ၵေႃႉ။
ၸၢႆးသိူဝ်တႆး သိုပ်ႇလၢတ်ႈဝႃႈ “ ႁဝ်းၶႃႈတေႁဵတ်းပၼ်ဝႂ်ၽူႈၵၢမ်ႇလီ တႃႇသိုဝ်ႉၶဝ်ႈပွႆး 1 ဝႂ် 200 ဝၢတ်ႇ မီးသူးပဵၼ် သၢႆၶေႃးၶမ်းလႄႈ ၸွပ်ႇမိုဝ်း(မူင်းၵူၺ်း) ၶမ်းတႃႇ 5 သူးရၢင်းဝလ်း” ဝႃႈၼႆ။
မိူဝ်ႈဝၼ်းတီႈ 08-09/12/2018 ယၢမ်းၵၢင်ၶမ်ႈ ပီႈၼွင်ႉတႆးႁွတ်ႈ ၵုင်းထဵပ်ႈ(မိူင်းၵွၵ်ႇ) တင်း ၸုမ်းၵူႈၽႆးလွႆၶူး(ၸုမ်းၸွႆႈထႅမ် ၽေးၵိုင်ႉၵၢင်ႉ) ႁူမ်ႈၵၼ် ၸတ်းႁဵတ်းပၢင်ယုၵ်ႉယွင်ႈ ၸၢႆးသၢႆမၢဝ်းလႄႈ ႁူမ်ၸူမ်းႁပ်ႉတွၼ်ႈပီမႂ်ႇတႆး 2113 ၼီႈ တီႈတိူဝ်း ၽႆးမရီႉ ၽုတ်ႉပေႃးလ် ၽိဝ်း(တ်ႉ) 45/5 မူႇထီႉ14 သွႆးၸၼ်ထႃးဝတ်ႉ သဵၼ်ႈတၢင်းပၢင်းၼႃးတၢတ်ႇ (လင်လူဝ်းတတ်ႉ ရၢမ်း သွင်) မိူင်းၵွၵ်ႇ ၸိုင်ႈထႆး။
