တႄႇဢဝ်ႁူဝ်လိူၼ်ၵျႅၼ်ႊၼိဝ်ႊရီႊမႃး တေႃႇထိုင် လိူၼ်ဢေႃႊၵတ်ႊသ် ပီ 2019 ၼႆႉ ၵူၼ်းမိူင်းတႆး ထုၵ်ႇၺႃးၵႃႉၶၢႆ ၸူးမိူင်းႁိမ်းႁွမ်း ၼမ်တီႈသုတ်း ဝႃႈၼႆ။

ယူႇတီႈၾၢႆႇပလိၵ်ႈၾၢႆႇၽဵဝ်ႈမူၺ်ႉၵူၼ်းၵႃႉၵူၼ်း ပိုၼ်ၽၢဝ်ႇဢွၵ်ႇဝႆႉဝႃႈ ၼႂ်းပီ 2019 တႄႇဢဝ်လိူၼ်ၵျႅၼ်ႊၼိဝ်ႊရီႊမႃး တေႃႇထိုင် လိူၼ်ဢေႃႊၵတ်ႊသ်သဵင်ႈၼႆႉ ၵူၼ်းမိူင်းဢၼ်ထုၵ်ႇၵႃႉၶၢႆ ၼႂ်းမိူင်းႁူမ်ႈတုမ် မိူၼ်ၼင်ႇ ၸႄႈမိူင်းၶၢင်၊ ယၢင်း ၽိူၵ်ႇ၊ ၶျၢင်း၊ မွၼ်း၊ တႆးလႄႈ တိူင်းတႃႈၵုင်ႈ၊ ဝဵင်းလိူဝ်ႇ၊ ၼေႇပျီႇတေႃႇ၊ တႃႈၼၢဝ်းသီ၊ ဢေႊရႃႇဝႃႇတီႇ၊ ပႃႇ ၵိူဝ်၊ ၸႄႈၵႅင်း၊ မ ၵူၺ်း ၸဵမ်ၸိူဝ်းၼႆႉ။ ဢၼ်လႆႈပိုတ်ႇလိူင်ႈဝႆႉ တင်းမူတ်းမီး 176 လိူင်ႈ၊ ၵူၼ်းမိူင်းဢၼ်လႆႈထုၵ်ႇၵႃႉၶၢႆမီး 254 ၵေႃႉလႄႈ ၵူၼ်းမီးတၢင်းၽိတ်း/ ၽူႈမီးတၢင်းၽိတ်း 502 ၵေႃႉ။

ၵူၼ်းမိူင်းဢၼ်ထုၵ်ႇၺႃးၵႃႉၶၢႆၼၼ်ႉ တင်းမူတ်း 254 ၵေႃႉ ၽူႈၸၢႆး 31 ၵေႃႉလႄႈ ၽူႈယိင်း 223 ၵေႃႉ။

လိူင်ႈလၢဝ်ႈဢၼ်လႆႈၸွႆးတြႃးဝႆႉ တင်းမူတ်း 176 လိူင်ႈၼၼ်ႉ ဢၼ်ၼမ်လိူဝ်တီႈသုတ်းပဵၼ် ၼႂ်းၸႄႈမိူင်းတႆး (51) လိူင်ႈ၊ ၼမ်ထီႉသွင်သမ်ႉ ၼႂ်းတိူင်းတႃႈၵုင်ႈ 45 လိူင်ႈ ယူႇတီႈပလိၵ်ႈၾၢႆႇၽဵဝ်ႈမူၺ်ႉၵူၼ်းၵႃႉၵူၼ်းပိုၼ်ၽၢဝ်ႇဢွၵ်ႇဝႆႉ မိူဝ်ႈဝၼ်း တီႈ 2 လိူၼ်သႅပ်ႊထႅမ်ႊပိူဝ်ႊၼႆႉ။

မိူဝ်ႈပီ 2018 ၼၼ်ႉ ဢၼ်ၸႅင်ႈလိူင်ႈတီႈလုမ်းတြႃးဝႆႉ တင်းမူတ်းမီး 206 လိူင်ႈ၊ ၵူၼ်းထုၵ်ႇၵႃႉၶၢႆ 317 ၵေႃႉလႄႈ ၵူၼ်းမီး တၢင်း ၽိတ်း 598 ၵေႃႉ။ ၼႂ်းၼၼ်ႉ ဢၼ်ၼမ်လိူဝ်တီႈသုတ်း ပဵၼ်ၼႂ်းတိူင်းတႃႈၵုင်ႈ တင်းမူတ်း 55 လိူင်ႈလႄႈ တီႈသွင် သမ်ႉ ၼႂ်းၸႄႈမိူင်းတႆး 54 လိူင်ႈ။

ၵူၼ်းမိူင်းဢၼ်ထုၵ်ႇၺႃးၵႃႉၶၢႆ 317 ၵေႃႉၼၼ်ႉ ၽူႈၸၢႆး 38 ၵေႃႉ၊ ၽူႈယိင်း 279 ၵေႃႉ ၵမ်ႈၼမ် ဢဝ်ၵႂႃႇတၢင်းမိူင်းၶႄႇ၊ ၶၢႆ တေႃႇၶႄႇဢဝ်ႁဵတ်းမေးၼၢင်း လွင်ႈၸိူင်ႉၼႆႉပဵၼ်ၼမ်တီႈသုတ်းယဝ်ႉ ဝႃႈၼႆ။