သၽႃးမိူင်းတႆး ႁပ်ႉႁွင်းမၵ်းမၼ်ႈ ပၵ်းပိူင်ယုၵ်းယၢင်ႇ တႃႇလဵင်ႉလူၵႆႇ

ႁူဝ်ပဝ်ႈသၽႃးၸႄႈမိူင်းတႆး ပိုၼ်ၽၢဝ်ႇႁပ်ႉႁွင်းမၵ်းမၼ်ႈ ပၵ်းပိူင်ယုၵ်းယၢင်ႇ ၾၢႆႇလဵင်ႉလူၵႆႇ တီႈၼႂ်းပၢင်ၵုမ်သၽႃး။

ဝၼ်းတီႈ 23/9/2019 ပၢင်ၵုမ်သၽႃးၸႄႈမိူင်းတႆး ပွၵ်ႈၵမ်း 2 ၵမ်းထူၼ်ႈ 16 ဝၼ်းထူၼ်ႈ 5 ႁူဝ်ပဝ်ႈသၽႃးၸႄႈမိူင်းတႆး မၵ်းမၼ်ႈ ပၵ်းပိူင်ယုၵ်းယၢင်ႇ ၾၢႆႇလဵင်ႉလူၵႆႇ ဢၼ်ၸၢႆးထုၼ်းၺၢၼ်ႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈ ဝဵင်းၵျွၵ်ႉမႄးတၢင်ႇဝႆႉၼၼ်ႉ။

ၸၢႆးထုၼ်းၺၢၼ်ႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 2 ၸႄႈဝဵင်းၵျွၵ်ႉမႄး လၢတ်ႈဝႃႈ “ ၼႂ်းမိူင်းတႆးၼႆႉ ပႆႇမီး ပၵ်းပိူင်ၾၢႆႇလဵင်ႉလူၵႆႇလႄႈ ၵူၼ်းပိုၼ်ႉတီႈ ႁူပ်ႉထူပ်းပၼ်ႁႃ၊ မီးတၢင်းယၢပ်ႇၽိုတ်ႇလၢႆလွင်ႈ။ ၼွၵ်ႈလိူဝ်ၼၼ်ႉ ပေႃးမီး ပၼ်ႁႃမႃး လွင်ႈဢဝ်လိူင်ႈၵေႃႈ ဢေႇမၢင်ၼႃႇ။ ယွၼ်ႉၼၼ်ႉ ပၵ်းပိူင် လဵင်ႉလူၵႆႇၼႆႉ ဢမ်ႇမီးဢမ်ႇပဵၼ်ယဝ်ႉ ၸင်ႇလႆႈ တၢင်ႇမႃးတီႈၼႂ်းပၢင်ၵုမ်သၽႃး” ဝႃႈၼႆ။

ယိူင်းဢၢၼ်းတႃႇႁႂ်ႈ ပဵၼ်ပၵ်း ပိူင်ႁႄႉၵင်ႈ ၽူႈလူင်းတိုၼ်းလၢင်းၶဝ် တႃႇပၢႆးယူႇလီၵူၼ်းမိူင်းလႄႈ လွင်ႈတုမ်ႉတိူဝ်ႉသိင်ႇ ဝႅတ်ႉလွမ်ႉ ၸိူဝ်းၼႆႉ ဝႃႈၼႆ။

ပၢင်ၵုမ်သၽႃးၸႄႈမိူင်းတႆး ပွၵ်ႈၵမ်း 2 ၵမ်းထူၼ်ႈ 16 ၼႆႉ တႄႇၸတ်းႁဵတ်းမႃး မိူဝ်ႈဝၼ်းတီႈ 17/9/2019 တေႃႇထိုင် ဝၼ်း တီႈ 24/9/2019 ၼႆႉ။ ၽူႈတႅၼ်းသၽႃးၸႄႈမိူင်းတႆးတင်းမူတ်းမီး 140 ၵေႃႉ။ ပၢင်ၵုမ်ပွၵ်ႈၼႆႉ ၽူႈတႅၼ်းဢၼ်ယွၼ်းၶႂၢင်ႉ ဝႆႉတင်းမူတ်းမီး 16 ၵေႃႉ။ ဢၼ်မႃးၶဝ်ႈႁူမ်ႈပၢင်ၵုမ်သမ်ႉ 124 ၵေႃႉ (88.57%)။