ၵၢင်လိူၼ်ဢေႃႊၵတ်ႊသ် တေႃႇလိူၼ်သႅပ်ႊထႅမ်ႊပိူဝ်ႊၼႆႉ သိုၵ်းလူင်ပွင်ၸိုင်ႈမၢၼ်ႈတင်း ၸုမ်းဢူၺ်းလီသိုၵ်း 3 ၸုမ်း ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်းၸိုင်ႈတႆး ပွတ်းႁွင်ႇ ၵူၼ်းမိူင်းၵူတ်ႉၶၢႆလူႉတၢႆၸွမ်း 7 ၵေႃႉ ဝႃႈၼႆ။

တႄႇဢဝ် ဝၼ်းတီႈ 15/8/2019 ထိုင် 31/8/2019 မႃးၼႆႉ သိုၵ်းလူင်ပွင်ၸိုင်ႈမၢၼ်ႈတင်း ၸုမ်းဢူၺ်းလီသိုၵ်း 3 ၸုမ်း တပ်ႉ သိုၵ်းလွႆ/ တဢၢင်း TNLA၊ ၵဝ်ႈၵၢင်ႉ MNDAA လႄႈ ရၶႅင်ႇ AA ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းၸိုင်ႈတႆးပွတ်းႁွင်ႇသေ ၵူၼ်းမိူင်းၵူတ်ႉၶၢႆ လႆႈလူႉတၢႆၸွမ်း ၼႂ်းပၢင်တိုၵ်း 7 ၵေႃႉ၊ မၢတ်ႇၸဵပ်း 10 ၵေႃႉလႄႈ ရူတ်ႉၵႃး ဢၼ်ၺႃးၽဝ် 10 လမ်း ဝႃႈၼႆ။

ၸၢႆးလႃႉဢွင်ႇ ၵႅမ်ႁူဝ်ပဝ်ႈ ၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ “ ၸွမ်းၼင်ႇ သဵၼ်ႈသၢႆမၢႆ တီႈႁဝ်းၶႃႈ ၵေႃလိၵ်ႈလၢႆး လႆႈၵဵပ်းဝႆႉတႄႉ ၵူၼ်းမိူင်းၵူတ်ႉၶၢႆ ဢၼ်လႆႈလူႉတၢႆ တင်းမူတ်း 7 ၵေႃႉ၊ မၢတ်ႇၸဵပ်း 10 ၵေႃႉ၊ ႁိူၼ်းဢၼ်လႆႈလူႉၵွႆသမ်ႉ တင်းမူတ်း 20 လင်။ ရူတ်ႉၵႃး ၺႃးၽဝ် တင်းမူတ်း 10 လမ်း” ဝႃႈၼႆ။

ၵူၼ်းမိူင်းၵူတ်ႉၶၢႆဢၼ်လႆႈလူႉတၢႆ ၸွမ်းၼႂ်းပၢင်တိုၵ်းၼၼ်ႉ တီႈဝၢၼ်ႈမေႃႇႁဵၵ်ႇ တေႃႇၵျႃႇထေႃး ဢႃယု 34 ပီ၊ မၼူၼ်း ပၢင်ႇ ဢႃ ယု 14 ပီ၊ မွင်ႇၸေႃႇၶုၼ်ႇလတ်ႉ ဢႃယု 9 ပီ၊ တေႃႇလႃႉသၢၼ်း ဢႃယု 18 ပီ၊ မွင်ႇသျႅင်းၶွင်ႇ ဢႃယု 5 လိူၼ်။ တီႈဝၢၼ်ႈပၢၼ်းသေး သမ်ႉပဵၼ်ဢူးဢၢႆႈငူဝ်ႇ (ႁွင်ႉ) ဢူးၵွၼ်ထေး ဢႃယု 47 ပီလႄႈ တီႈမၢၼ်ႈလွႆသမ်ႉ တေႃႇယႃႈဢူဝ်ႈ ဢႃယု 60 ပီ ၸဵမ်ၸိူဝ်းၼႆႉ။

ၸၢႆးႁၢၼ်ႇ ႁူဝ်ပဝ်ႈ ၸုမ်းၵူၼ်းၼုမ်ႇတႆး TYO ၸိုင်ႈတႆးပွတ်းႁွင်ႇ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈႁူႉ တီႈလႃႈသဵဝ်ႈၼႆႉ ဢၼ်ပဵၼ်ၵူၼ်းမိူင်း လႆႈလူႉတၢႆၵႂႃႇ ပျီႇတူႉၸိတ်ႉ 2 ၵေႃႉၽူဝ်မေး။ ဢူးထုၼ်းမိၼ်ႉ ၸဝ်ႈၵႃးပရႁိတ ၵေႃႉၼိုင်ႈ တင်း လုင်းဢေး ဝၢၼ်ႈၵုင်းသႃႇ ၵေႃႉၼိုင်ႈ” ဝႃႈၼႆ။

လိူဝ်ၼၼ်ႉတႄႉ ပဵၼ်တီႈဝဵင်းၼမ်ႉသၼ်ႇ ၵဵတ်ႉၼမ်ႉဢုၼ်ႇ၊ ၼွင်ၶဵဝ်လႄႈ ပၢင်ႇဢူး။

ယူႇတီႈၸုမ်းၵူၼ်းတေႃႇၵူၼ်း တူၺ်းလူၸွႆႈထႅမ်ၵၼ် ၸိုင်ႈတႆးပွတ်းႁွင်ႇ ပိုၼ်ၽၢဝ်ႇဝႆႉတႄႉ ၵူၼ်းမိူင်းၸိုင်ႈတႆးပွတ်းႁွင်ႇ ဢၼ်လႆႈလူႉ တၢႆၸွမ်းၼႂ်းပၢင်တိုၵ်း တင်းမူတ်း မီး 17 ၵေႃႉ၊ မၢတ်ႇၸဵပ်း 30 ပၢႆ၊ ရူတ်ႉၵႃး ၺႃးၽဝ် ဢမ်ႇယွမ်း 22 လမ်း ဝႃႈၼႆ။

ယၢမ်းလဵဝ်ၵေႃႈ ၾၢႆႇၸုမ်းဢူၺ်းလီပွတ်းႁွင်ႇလႄႈ တပ်ႉသိုၵ်းလူင်ပွင်ၸိုင်ႈမၢၼ်ႈ/ ၵိုတ်းယိုဝ်းၵၼ်ဝႆႉ ႁင်းၽႂ်မၼ်း (ၼႂ်းၸႄႈဝဵင်းၼမ်ႉသၼ်ႇ၊ ၵူတ်ႉၶၢႆ၊ သႅၼ်ဝီ) ၼႆသေတႃႉ သဵင်ၵွင်ႈတႄႉ တိုၵ်ႉဢွၵ်ႇပဵၼ်တီႈပဵၼ်ယွမ်ႇယူႇ။