ၸုမ်းဢူၺ်းလီသိုၵ်း 3 ၸုမ်း သိုၵ်းရၶႅင်ႇ AA၊ သိုၵ်းလွႆ/တဢၢင်း TNLA၊ သိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇ ၵိုတ်းတိုၵ်းၾၢႆႇ လဵဝ်ထႅင်ႈ တေႃႇထိုင်ဝၼ်းတီႈ 31 လိူၼ်ၻီႊသႅမ်ႊပိူဝ်ႊ 2019 သဵင်ႈ။

ဝၼ်းတီႈ 20/9/2019 ယူႇတီႈတပ်ႉသိုၵ်းတဢၢင်း TNLA၊ ၵဝ်ႈၵၢင်ႉ MNDAA လႄႈ ရၶႅင်ႇ AA ႁူမ်ႈၵၼ် ပိုၼ်ၽၢဝ်ႇၵိုတ်း တိုၵ်းၾၢႆႇလဵဝ် တေႃႇထိုင် ပီသဵင်ႈ။ တွၼ်ႈတႃႇ ပၢင်တိုၵ်းပေႃးတေလူတ်းယွမ်းလႄႈ ၼင်ႇႁိုဝ် ပၢင်ဢုပ်ႇဢူဝ်းငူပ်ႉငီႉၶၵ်ႉ ၵၢၼ်လူင်းလၢႆးမိုဝ်း ၵိုတ်းတိုၵ်း (Bilateral Ceasefire Agreement) ပေႃးတေထိုင်တီႈထိုင်လႅၼ် ၸင်ႇယိုတ်ႈၶၢဝ်းယၢမ်း ၵိုတ်းတိုၵ်းထႅင်ႈ ဝႃႈၼႆ။

တႃႉၽူင်းၵျေႃႇ ၵႅမ်ၸွမ်ႁၢၼ် ၽူႈၼမ်းၼႂ်းၵူႈလွင်ႈလွင်ႈ TNLA လၢတ်ႈဝႃႈ “ တႃႇတေလူတ်းယွမ်းပၢင်တိုၵ်းၼၼ်ႉ မၼ်း ယူႇတီႈၽူႈၼမ်းတၢင်းသွင်ၾၢႆႇၵူၺ်း။ လွင်ႈဢုပ်ႇဢူဝ်းၵၼ် တီႈၵဵင်းတုင် လွင်ႈလူတ်းယွမ်းပၢင်တိုၵ်းၼၼ်ႉ ပႆႇလႆႈၶေႃႈ တွပ်ႇသင်၊ ပႆႇႁၼ်ဢုပ်ႇဢူဝ်းသင်။ ပၢင်တိုၵ်းၵေႃႈ တိုၵ်းပဵၼ်ယူႇ” ဝႃႈၼႆ။

ယူႇတီႈၸုမ်းဢူၺ်းလီ 3 ၸုမ်း ပိုၼ်ၽၢဝ်ႇၵိုတ်းတိုၵ်းၾၢႆႇလဵဝ်ၼႆႉ တႄႇဢဝ် မိူဝ်ႈဝၼ်းတီႈ 9 လိူၼ်သႅပ်ႊထႅမ်ႊပိူဝ်ႊ ထိုင် ဝၼ်းတီႈ 8 လိူၼ်ဢွၵ်ႊထိူဝ်ႊပိူဝ်ႊ တႃႇၶၢဝ်းတၢင်း ၼိုင်ႈလိူၼ်ၵမ်းၼိုင်ႈ။ ၵမ်းၼႆႉ ပိုၼ်ၽၢဝ်ႇထႅင်ႈပွၵ်ႈသွင် တေသိုပ်ႇ ၵိုတ်းတိုၵ်းထိုင် ပီသဵင်ႈ ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ “ မိူဝ်ႈၽွင်းပိုၼ်ၽၢဝ်ႇၵိုတ်းတိုၵ်းယူႇၼၼ်ႉ ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ ၽိူမ်ႉႁႅင်းသိုၵ်း ပိုတ်းယိုဝ်း၊ ဢဝ်မၢၵ်ႇလူင်ယိုဝ်းသႂ်ႇ တပ်ႉပၢင်သဝ်းၸုမ်းဢူၺ်းလီသိုၵ်းသေတႃႉ ၾၢႆႇၸုမ်းဢူၺ်းလီသိုၵ်း ယူႇၾၢႆႇၵႅတ်ႇၶႄတူဝ်ႁပ်ႉတိုၵ်းၵူၺ်း” ဝႃႈၼႆ။

မိူဝ်ႈဝၼ်းတီႈ 17/9/2019 ၼၼ်ႉၵေႃႈ ယူႇတီႈၸုမ်းဢူၺ်းလီ 4 ၸုမ်း တင်း ၶွမ်ႊမသျိၼ်ႊလွင်ႈငမ်းယဵၼ်မၢၼ်ႈ လႄႈ တူဝ် တႅၼ်းတပ်ႉသိုၵ်းလူင်ပွင်ၸိုင်ႈမၢၼ်ႈ ႁူပ်ႉဢုပ်ႇၵၼ်တီႈၵဵင်းတုင် မီးၶေႃႈဢုပ်ႇဢူဝ်း 7 ၶေႃႈသေတႃႉ ယင်းပႆႇတူၵ်းလူင်း လႆႈတႃႇႁႂ်ႈၵိုတ်းၵၢၼ်တိုၵ်းတေႃးၵၼ်။

ၵၢၼ်ၵိုတ်းၾၢႆႇလဵဝ်ၼႆႉ တပ်ႉသိုၵ်းလူင်ပွင်ၸိုင်ႈမၢၼ်ႈၵေႃႈ ပိုၼ်ၽၢဝ်ႇၵိုတ်းတိုၵ်းမႃး 3 ၵမ်း။ တင်ႈတႄႇ 21/12/2018 မႃး တေႃႇ 21/9/2019 ၼႂ်း 5 တိူင်းသိုၵ်း မိူၼ်ၼင်ႇ တိူင်းသိုၵ်းဝၼ်းႁွင်ႇ၊ တိူင်းသိုၵ်းၸဵင်ႇႁွင်ႇဝၼ်းဢွၵ်ႇ၊ တိူင်းသိုၵ်းဝၼ်း ဢွၵ်ႇ၊ တိူင်းသိုၵ်းဝၼ်းဢွၵ်ႇၵၢင်လႄႈ တိူင်းသိုၵ်းသၢမ်ၸဵင်ႇ ၸိူဝ်းၼႆႉ။ ႁူမ်ႈဝႃႈ ၾၢႆႇသိုၵ်းလူင်ပွင်ၸိုင်ႈ၊ ၾၢႆႇၸုမ်းဢူၺ်းလီ သိုၵ်း ပိုၼ်ၽၢဝ်ႇၵိုတ်းတိုၵ်းဝႆႉႁင်းၽႂ်ႁင်းမၼ်းသေတႃႉ ပၢင်တိုၵ်းဢမ်ႇၵိုတ်း သဵင်ၵွင်ႈၼႂ်းၸိုင်ႈတႆးပွတ်းႁွင်ႇ၊ ၼႂ်းၸႄႈ မိူင်းရၶႅင်ႇ ၸိူဝ်းၼႆႉ ဢမ်ႇထၢတ်ႇယင်းတႅၵ်ႇယူႇ။ ၾၢႆႇသိုၵ်းလူင်ပွင်ၸိုင်ႈမၢၼ်ႈယဝ်ႉၵႂႃႇမိူဝ်ႈ 21/9/2019 ယဝ်ႉ လႄႈ ၽူႈ လဵပ်ႈႁဵၼ်းၵၢၼ်သိုၵ်းၶဝ်ထတ်းသၢင်ဝႃႈ ပၢင်တိုၵ်းၸၢင်ႈယႂ်ႇမႃးလိူဝ်ၵဝ်ႇထႅင်ႈ ဝႃႈၼႆ။