ၼၢင်းယိင်းၵေႃႉၼိုင်ႈ ၺႃးထုပ်ႉႁူဝ်ၶႃႈႁႅမ်တၢႆ တီႈၵျွၵ်ႉမႄး

ၼၢင်းယိင်းၵေႃႉၼိုင်ႈ ထုၵ်ႇၶႃႈႁႅမ်တၢႆ ႁိမ်းဝၢၼ်ႈၼွင်ပိင် ၸႄႈဝဵင်းၵျွၵ်ႉမႄး တေႃႇထိုင်ယၢမ်းလဵဝ် ပဵၼ်လုၵ်ႈၽႂ်၊ မေးၽႂ် ဢၼ်ဝႃႈၼၼ်ႉ ပႆႇႁူႉ။

ဝၼ်းတီႈ 15/9/2019 ၼၢင်းယိင်း ၵေႃႉၼိုင်ႈ ဢႃယု မွၵ်ႈ 30 ပီ ထုၵ်ႇၶႃႈႁႅမ်တၢႆ ၼိူဝ်သဵၼ်ႈတၢင်းလွႆလၢၼ်း ႁိမ်းဝၢၼ်ႈၼွင် ပိင် ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။

ဢူးတၢၼ်းထုၼ်း ၽူႈၵွၼ်းပလိၵ်ႈၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ လႆႈႁၼ် ႁွႆးပေႃႉထုပ်ႉတီႈႁူဝ်မၼ်း ၼၢင်း။ ႁူၺ်ႇတႃမၼ်းၼၢင်းၵေႃႈပေႃႉၵွႆဝႆႉ။ မၼ်းၼၢင်းပဵၼ်ၵူၼ်းဝၢၼ်ႈလႂ် ဢၼ်ဝႃႈၼၼ်ႉ ပႆႇႁူႉ။ တေႃႈလဵဝ် လႆႈဢဝ် ၶႅပ်းႁၢင်ႈမၼ်းၼၢင်း ပိုၼ်ၽၢဝ်ႇပၼ်ၵႂႃႇၼႂ်းၸွမ်းဝၢၼ်ႈယူႇ။ ပဵၼ်ၵူၼ်းတၢင်းၼွင်ပိင်ႁႃႉ၊ ပဵၼ်ၵူၼ်းတီႈလႂ်ၼႆၼၼ်ႉ ပႆႇ ႁူႉ။ တေႃႈလဵဝ် တိုၵ်ႉၵူတ်ႇထတ်းယူႇ” ဝႃႈၼႆ။

ၼၢင်းယိင်း ဢႃယု မွၵ်ႈ 30 ပီ ၵေႃႉထုၵ်ႇၶႃႈႁႅမ်တၢႆၼႆႉ တူဝ်တၢႆမၼ်းၼၢင်းမူၵ်းယုမ်းဝႆႉ ၼိူဝ်သဵၼ်ႈတၢင်းလွႆလၼ်း ယူႇတီႈၸုမ်းၼမ်ႉၶူင်း ပရႁိတ ၵျွၵ်ႉမႄး လႆႈၵႂႃႇဢဝ်တူဝ်တၢႆမၼ်းၼၢင်းမႃးသူင်ႇဝႆႉတီႈႁူင်းယႃ ၵျွၵ်ႉမႄး။

ၸုမ်းတူင်ႇဝူင်းၵူၼ်းလႄႈသင်၊ ၽူႈၵွၼ်း ဝၢၼ်ႈ ဢိူင်ႇလႄႈသင် လႆႈဢဝ်ၶႅပ်းႁၢင်ႈမၼ်းၼၢင်း ပိုၼ်ၽၢဝ်ႇပၼ်ၵႂႃႇၸွမ်း ၼႂ်းမူႇဝၢၼ်ႈ ႁႂ်ႈၸိူဝ်ႉၶိူဝ်းပီႈၼွင်ႉမၼ်းၼၢင်း လႆႈႁပ်ႉႁူႉ ဝႃႈၼႆ။

ဢူးၼေႇဢွင်ႇ ၸုမ်းၸွႆႈထႅမ် ပၢႆးပိူင်ၵူၼ်း (ကမ်းလင့်လက်များ လူမှုကူညီရေးအသင်း) လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈ ဢေႃႈ ၼၢင်း ယိင်းၵေႃႉၼိုင်ႈ ထုၵ်ႇၶႃႈႁႅမ်တၢႆ။ တေႃႈလဵဝ် ႁဝ်းၶႃႈလႆႈၸွႆႈၸႅၵ်ႇပိုၼ်ၽၢဝ်ႇၶႅပ်းႁၢင်ႈႁႃပီႈၼွင်ႉမၼ်းၼၢင်း ယူႇ။ မၼ်းၼၢင်းပဵၼ်ၽႂ်ဢၼ်ဝႃႈၼၼ်ႉၵေႃႈ ပႆႇႁူႉ” ဝႃႈၼႆ။

ၵဵဝ်ႇၵပ်းလွင်ႈ ၵၢၼ်တၢႆၼႆႉသေ ယူႇတီႈပလိၵ်ႈလႆႈပိုတ်ႇလိူင်ႈဝႆႉ ၸွမ်းၼင်ႇမၢႆမီႈမတ်ႉတႃ 302 တီႈႁူင်းပလိၵ်ႈၼွင်ပိင် ၸႄႈဝဵင်းၵျွၵ်ႉမႄးဝႆႉယဝ်ႉ ဝႃႈၼႆ။