ၵူၼ်းမိူင်းၽျၢၵ်ႈ 2 ပူႇဢွၵ်ႇ တူမ်ႈၶိုဝ်ႇႁၢၵ်ႈမႆႉယႃႈမိူဝ်ႇသေ ၵိၼ်ၸွမ်းၵၼ် 6 ၵေႃႉ ပေႃႈမႄႈလုၵ်ႈ။ လွတ်ႈတၢႆ 2 ၵေႃႉ ယၢမ်း လဵဝ်ယူႇၸွမ်းပီႈၼွင်ႉဝႆႉ ဝႃႈၼႆ။
ဝၼ်းတီႈ 12/9/2019 ပူၼ်ႉမႃးၼၼ်ႉ ၵူၼ်းမိူင်းၽျၢၵ်ႈ သွင်ၵေႃႉ ၽူဝ်မေးယူႇပွၵ်ႉသေးတၢၼ်း ၸႄႈဝဵင်း မိူင်းၽျၢၵ်ႈ ၸိုင်ႈ တႆးပွတ်းဢွၵ်ႇ၊ ၵႂႃႇႁႃယႃႈႁၢၵ်ႈမႆႉ ဢၼ်မီးၵွင်ႉၼၼ်ႉ မႃးတူမ်ႈသေၵိၼ်ၸွမ်းၵၼ်လူႉသဵင်ႈတၢႆ 4 ၵေႃႉ ပေႃႈမႄႈ လုၵ်ႈ။
ၸၢႆးၶမ်းၸၼ် ႁူဝ်ပဝ်ႈပႃႇတီႇသိူဝ်ၽိူၵ်ႇ SNDP ၸႄႈဝဵင်းမိူင်းၽျၢၵ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ယၢမ်းလဵဝ် လုၵ်ႈၶဝ် 2 ၵေႃႉ ဢၼ်လွတ်ႈတၢႆၼၼ်ႉ ယူႇတီႈပီႈၼွင်ႉၶဝ် ဢဝ်ၵႂႃႇတူၺ်းလူ လုမ်းလႃးပၼ်ယဝ်ႉ ၸွမ်းၼင်ႇလႆႈႁူႉတႄႉ ဢမ်ႇမီးပၼ် ႁႃသင် ဢွၼ်ၵၼ်လၢမ်းၶၢတ်ႈဝႃႈ လႅပ်ႈတေပဵၼ်လွင်ႈယၢပ်ႇၽိုတ်ႇႁႃၵိၼ်လဵင်ႉတွင်ႉၶဝ်ၵူၺ်း” ဝႃႈၼႆ။
လုၵ်ႈဢွၼ်ႇ 2 ၵေႃႉ ဢၼ်လွတ်ႈပူၼ်ႉတၢင်းတၢႆၼၼ်ႉ ၸိုဝ်ႈႁွင်ႉ ၼေႃးမိ ဢႃယု 13 ပီ ႁဵၼ်းလိၵ်ႈဝႆႉၸၼ်ႉ 6 တင်း လုၵ်ႈၸၢႆးၵေႃႉဢွၼ်ႇ သီႇလႃႉ ဢႃယု 9 ပီ ယူႇႁဵၼ်းလိၵ်ႈဝႆႉၸၼ်ႉသၢမ် ဝႃႈၼႆ။
ၵူၼ်းမိူင်းပိုၼ်ႉတီႈမိူင်းၽျၢၵ်ႈလၢတ်ႈဝႃႈ “ ဝၼ်းတီႈ 13 ယၢမ်းၵၢင်ၼႂ်မႃး ၵူၼ်းႁိမ်းႁွမ်းၸင်ႇတေႁူႉၵၼ်ဝႃႈ ၶဝ်ပေႃႈမႄႈ လုၵ်ႈ 4 ၵေႃႉ တၢႆဝႆႉၼႂ်းႁိူၼ်း” ဝႃႈၼႆ။
ဢၼ်လႆႈလူႉတၢႆၵႂႃႇ 4 ၵေႃႉၼၼ်ႉ ၵေႃႉပဵၼ်ပေႃႈ ၸိုဝ်ႈႁွင်ႉ ဢႃးမျႃႇ ဢႃယု 46 ပီ၊ မႄႈသမ်ႉ ဢီႇၼႃး ဢႃယု 48 ပီ။ လုၵ်ႈၸၢႆးလူင်ၶဝ်သမ်ႉ ၸိုဝ်ႈႁွင်ႉ ထေႃးမေႇ ဢႃယု 15 ပီလႄႈ လုၵ်ႈၸၢႆးၵေႃႉလဵၵ်ႉသုတ်း ၸိုဝ်ႈႁွင်ႉ ၼေႇ လိၼ်းထုၼ်း ဢႃယု 8 ပီ ဝႃႈၼႆ။
ၸၢႆးၶမ်းၸၼ် လၢတ်ႈဝႃႈ “ လုၵ်ႈဢွၼ်ႇ 2 ၵေႃႉၼၼ်ႉတႄႉ ပီႈၼွင်ႉၶဝ် ႁပ်ႉဢဝ်ၵႂႃႇတူၺ်း လူလွမ်ပၼ်ယဝ်ႉၶႃႈ။ တူဝ်တၢႆ ၶဝ် 4 ၵေႃႉ ပေႃႈမႄႈလုၵ်ႈၼၼ်ႉၵေႃႈ ၸိူဝ်ႉၶိူဝ်းပီႈၼွင်ႉၶဝ် လႆႈလုမ်းလႃးပူၼ်ႉၶၢပ်ႈတူဝ်ၵႂႃႇပၼ်ယဝ်ႉ” ဝႃႈၼႆ။
