ႁႅင်းၵၢၼ် 17 ၵေႃႉ ဢၼ်ထုၵ်ႇသူင်ႇတူဝ်ပွၵ်ႈတၢင်းလႅၼ်လိၼ် တႆး – ထႆးၼႆႉ ၵမ်ႈၼမ် ပဵၼ်ပီႈၼွင်ႉတႆး တၢင်းပွတ်း ၸၢၼ်း။
ဝၼ်းတီႈ 18/9/2019 ယၢမ်းႁူဝ်ၶမ်ႈ ပလိၵ်ႈထႆး ဢဝ်ႁႅင်းၵၢၼ်ယၢၼ်မိူင်း 17 ၵေႃႉ ဢၼ်ၽိတ်းပၵ်းပိူင်မၢႆမီႈ ၸိုင်ႈထႆးသေ သူင်ႇတူဝ်မွပ်ႈပၼ် တၢင်းပလိၵ်ႈၾင်ႇတႃႈၶီႈလဵၵ်း တီႈလႅၼ်လိၼ် တႆး – ထႆး (တႃႈၶီႈလဵၵ်း – မႄႈသၢႆ)။
သိုဝ်ႇၶၢဝ်ႇ Tachileik News Agency ဢွၵ်ႇဝႆႉဝႃႈ “ ႁႅင်းၵၢၼ်ႁူမ်ႈတုမ်မျၢၼ်ႇမႃႇ 17 ၵေႃႉၼႆႉ ဢၼ်ပဵၼ် ၽူႈၸၢႆး (6) ၵေႃႉ၊ ၽူႈယိင်း (7) ၵေႃႉၼၼ်ႉ ပဵၼ်ၵူၼ်းၸိုင်ႈတႆးပွတ်းၸၢၼ်း၊ တႃႇၽူႈၸၢႆးထႅင်ႈ (2) ၵေႃႉသမ်ႉ ပဵၼ်ၵူၼ်းတၢင်းဝဵင်းလိူဝ်ႇ (မၼ်းတ လေး)။ လိူဝ်ၼၼ်ႉ ပႃးထႅင်ႈလုၵ်ႈဢွၼ်ႇ 2 ၵေႃႉ”ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၽူႈမီးပုၼ်ႈၽွၼ်းတၢင်းၾင်ႇတႃႈၶီႈလဵၵ်း လႆႈၵူတ်ႇထတ်းတူၺ်းသေ ႁပ်ႉဢဝ်ၵႂႃႇ။
ပူၼ်ႉမႃး မိူဝ်ႈဝၼ်းတီႈ 11/9/2019 ယၢမ်းၵၢင်ၼႂ်ၼၼ်ႉၵေႃႈ ၸဝ်ႈၼႃႈတီႈပလိၵ်ႈထႆး သူင်ႇတူဝ်ႁႅင်းၵၢၼ် မွပ်ႈပၼ်တၢင်း ၸဝ်ႈၼႃႈ တီႈပလိၵ်ႈမၢၼ်ႈ ၾင်ႇတၢင်း တႃႈၶီႈလဵၵ်း လႅၼ်လိၼ်တႆး – ထႆး (တႃႈၶီႈလဵၵ်း – မႄႈသၢႆ) ၽူႈၸၢႆး 8 ၵေႃႉ လႄႈ ၽူႈယိင်း 3 ၵေႃႉ ဝႃႈၼႆ။
မိူဝ်ႈဝၼ်းတီႈ 9/9/2019 ယၢမ်းၵၢင်ၼႂ်ၼၼ်ႉၵေႃႈ ပလိၵ်ႈထႆးသူင်ႇတူဝ်ႁႅင်းၵၢၼ်ယၢၼ်မိူင်း ပွၵ်ႈမႃးတၢင်းလႅၼ်လိၼ် တႆး – ထႆး ၽူႈၸၢႆး 3 ၵေႃႉ ၽူႈယိင်း 10 ၵေႃႉ ပဵၼ်ၵူၼ်းၸိုင်ႈတႆးပွတ်းဢွၵ်ႇၶူင်း။ ၽူႈၸၢႆးထႅင်ႈၵေႃႉၼိုင်ႈသမ်ႉ ပဵၼ်ၵူၼ်း တၢင်းၸိုင်ႈတႆးပွတ်းႁွင်ႇ။
ၼႂ်းပီ 2019 ၼႆႉ လူင်ပွင်ၸိုင်ႈမႂ်ႇ မိူင်းထႆး ၵူတ်ႇထတ်းႁႅင်းၵၢၼ်ယၢၼ်မိူင်းႁၢဝ်ႈႁႅင်း။ တီႉၺွပ်းႁႅင်းၵၢၼ်ၸိူဝ်းဢမ်ႇမီးဝတ်း ဝႂ်ယူႇ၊ ႁဵတ်းၵၢၼ်၊ ၸိူဝ်းဢၼ်ႁဵတ်းၵၢၼ်ၽိတ်းပိုၼ်ႉတီႈ ၸိူဝ်းၼၼ်ႉသေဢမ်ႇၵႃး တီႉၺွပ်းပႃး ၸိူဝ်းဢၼ်ၵႂႃႇ ႁဵတ်းၵၢၼ် ဢၼ်လူင်ပွင်ၸိုင်ႈထႆး ဢမ်ႇပၼ်ဢၼုၺၢတ်ႈ ႁႅင်းၵၢၼ်ႁဵတ်းၸိူဝ်းၼၼ်ႉသေ သူင်ႇပွၵ်ႈၶိုၼ်းလႅၼ်လိၼ်မိူင်းၽႂ်မၼ်း။ ႁဵတ်းႁႂ်ႈႁႅင်းၵၢၼ်ယၢၼ်မိူင်းယူႇယၢပ်ႇၵိၼ်းၸႂ်။
