ၽူႈၸၢႆးသၢမ်ၵေႃႉ တေႃႉယႃႈၾိၼ်ႇၽိူၵ်ႇ 99 ႁေႃႇ ဢၢၼ်းဢဝ်ၶၢမ်ႈၼမ်ႉ ၶဝ်ႈမိူင်းၶႄႇၸဝ်ႈၼႃႈတီႈမူႇၸေႊ ၵူတ်ႇထတ်း ၵူၼ်းတေႃႉသၢမ်ၵေႃႉပၢႆႈလွတ်ႈဝႆႉ။
ဝၼ်းတီႈ 17/9/2019 ယၢမ်းဝၢႆးဝၼ်း 3 မူင်းၶိုင်ႈပၢႆ ပလိၵ်ႈမူႇၸေႊ ၵူတ်ႇထတ်း ဢဝ်ႁူမ်ႇလူမ်ႈၸွမ်း လႅၼ်လိၼ် ၶႄႇ – တႆး ႁၼ်ရူတ်ႉၵႃး လမ်းၼိုင်ႈလႄႈ ၵူၼ်းသၢမ်ၵေႃႉ ပႅၵ်ႇပိူင်ႈလၢၵ်ႇလၢႆးၼႆသေ ၶဝ်ႈၵူတ်ႇထတ်း တီႈတႃႈႁိူဝ်းႁူဝ်သွင် ပွၵ်ႉတူဝ်ႇ ယွတ်ႈ ၸႄႈဝဵင်းမူႇၸေႊ။ ၵူတ်ႇထတ်းႁၼ်မႅၼ်ႈၼႂ်းၵႃး ယႃႈၾိၼ်ႇၽိူၵ်ႇ တေတူၵ်းမႅၼ်ႈၶၼ်ငိုၼ်း 6,930 သႅၼ်ပျႃး ၵူၼ်း သၢမ်ၵေႃႉတႄႉ ပၢႆႈလွတ်ႈဝႆႉ ဝႃႈၼႆ။
ဢူးၸေႃႇၶိၼ်ႇဢွင်ႇ ၽူႈၵွၼ်းပလိၵ်ႈၸႄႈမိူင်းတႆး လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈဢေႃႈ၊ ၵူၼ်းဢဝ်မႃးၼၼ်ႉ ပဵၼ်ၽူႈ ၸၢႆး 3 ၵေႃႉ။ တေႃႈလဵဝ် ပၢႆႈလွတ်ႈဝႆႉ။ တႃႇၵေႃႉၼိုင်ႈ ပဵၼ်ၵူၼ်းမိူင်းမၢၼ်ႈ။ တႃႇ 2 ၵေႃႉတႄႉ ပဵၼ်ၵူၼ်းမိူင်းလႂ် ဢမ်ႇႁူႉ။ ယၢမ်းလဵဝ် ၸဝ်ႈၼႃႈတီႈ တိုၵ်ႉၵူတ်ႇထတ်းယူႇ။ ထႅင်ႈလွင်ႈၼိုင်ႈၵေႃႈ ၼႂ်းၵႃးၼၼ်ႉ ထူပ်းႁၼ် ဝႂ်ႁေႃႈရူတ်ႉ တၢင်း မၢႆၾၢင်(ဝႂ်ၵပ်းတူဝ်) ဝႆႉ တေဢဝ်ဢၼ်ၼၼ်ႉသေ သိုပ်ႇၵူတ်ႇထတ်းၵႂႃႇ” ဝႃႈၼႆ။
ၽူႈၸၢႆး 3 ၵေႃႉ ဢၼ်မႃးၸွမ်းရူတ်ႉၼၼ်ႉ ၵပ်းၾူၼ်းႁႃ ႁိူဝ်းတႃႇတေတၢင်ႇၶၢမ်ႈၵႂႃႇတၢင်းၾင်ႇမိူင်းၶႄႇသေ ႁၼ် ပလိၵ်ႈ မႃးလႄႈ ၼႅတ်ႈပၢႆႈၶဝ်ႈထိူၼ်ႇၵႂႃႇ။ ပႅတ်ႈဝႆႉထူင်လုၵ်ႈၼိုင်ႈ သႂ်ႇဝႆႉယႃႈၾိၼ်ႇၽိူၵ်ႇ ႁေႃႇၸေႈဝႆႉ 45 ႁေႃႇ၊ လိူဝ်ၼၼ်ႉ ၼႂ်း ၵႃး သမ်ႉႁၼ်ထူင်ပိူဝ်ႉထႅင်ႈလုၵ်ႈၼိုင်ႈမီးယႃႈၾိၼ်ႇထႅင်ႈ 54 ႁေႃႇ၊ ႁူမ်ႈၵၼ်တင်းမူတ်း ယႃႈၾိၼ်ႇမီး 99 ႁေႃႇ ဝႃႈၼႆ။
ဢူးၸေႃႇၶိၼ်ႇဢွင်ႇ လၢတ်ႈဝႃႈ “ ၵဵဝ်ႇၵပ်းလွင်ႈၼႆႉ ယူႇတီႇပလိၵ်ႈတၢင်းၾင်ႇမိူင်းမၢၼ်ႈ တင်း မိူင်းၶႄႇ တေႁူမ်ႈၵၼ်သေ ၵူတ်ႇထတ်းပိုၼ်ႉတီႈသွၵ်ႈႁႃတူဝ်ၶဝ်ၶႃႈဢေႃႈ” ဝႃႈၼႆ။
ၵဵဝ်ႇၵပ်းယႃႈၾိၼ်ႇၽိူၵ်ႇ ဢၼ်တီႉလႆႈတီႈတႃႈႁိူဝ်းႁူဝ်သွင် ပွၵ်ႉတူဝ်ႇယွတ်ႈၼႆႉသေ တေႃႈလဵဝ် ယူႇတီႈပလိၵ်ႈ ၸႄႈဝဵင်း မူႇၸေႊ လႆႈပိုတ်ႇလိူင်ႈၸွႆးတြႃးၸွမ်းၼင်ႇပၵ်းပိူင်မၢႆမီႈဝၢၼ်ႈမိူင်းမီးၼၼ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ