ႁႅင်းၵၢၼ်တႆး တိူဝ်ႉထီႇထႆး ရၢင်းဝလ်းတီႈၼိုင်ႈ

ထီႇလူင်ပွင်ၸိုင်ႈမိူင်းထႆး ဢၼ်ပိုတ်ႇၵႂႃႇမိူဝ်ႈၵၢင်လိူၼ်သႅပ်ႊထႅမ်ႊပိူဝ်ႊပူၼ်ႉမႃးၼႆႉ တႆးႁွတ်ႈၵဵင်းမႆႇ 2 ၼႃႈႁိူၼ်းတိူဝ်ႉ ရၢင်း ဝလ်းထီႉၼိုင်ႈ၊ ၼိုင်ႈၼႃႈႁိူၼ်းလႂ် 6 လၢၼ်ႉဝၢတ်ႇ(ငိုၼ်းထႆး) ဝႃႈၼႆ။

ထီႇဢၼ်ဢွၵ်ႇ မိူဝ်ႈဝၼ်းတီႈ 16/9/2019 မၢႆရၢင်းဝလ်းထီႉၼိုင်ႈ ပဵၼ် 340388 ။ ၸၢႆးၽူၼ်း ဢႃယု 43 ပီ တင်း ၸၢႆးလႅင်း (Sai Lyan JaiLeng) ဢႃယု 24 ပီ ၶႃသွင်ၵေႃႉ တိူဝ်ႉထီႇၵေႃႉဝႂ်ဝႂ်၊ ၼိုင်ႈၵေႃႉလႆႈ 6 လၢၼ်ႉဝၢတ်ႇ သိုဝ်ႇၶၢဝ်ႇၵဵင်းမႆႇ ၼိဝ်း ဢွၵ်ႇဝႆႉၼင်ႇၼႆ။

တေႃႈလဵဝ် ၸၢႆးၽူၼ်း တင်း ၸၢႆးလႅင်းၼႆႉ လႆႈၵႂႃႇလၢႆးငၢၼ်းဝႆႉတီႈႁူင်းပလိၵ်ႈၵဵင်းမႆႇ ၼင်ႇႁိုဝ် ပေႃးပဵၼ်သၢၵ်ႈသေႇလၵ်း ထၢၼ်ဝႆႉ ဝႃႈၼႆ။

ၶဝ် 2 ၵေႃႉၼႆႉ မိူဝ်ႈဝၼ်းတီႈ 16/9/2019 ယၢမ်းၵၢင်ၼႂ် ၶႃသိုဝ်ႉထီႇဢၼ်တမ်းၶၢႆတၢင်းၼႃႈႁူင်းႁဵၼ်းဝတ်ႉပူင်ႇၼွႆႉ ဢိူင်ႇ သုထဵပ်ႈ ၸႄႈဝဵင်းၵဵင်း မႆႇ ၸိုင်ႈထႆး။

ပူၼ်ႉမႃး မိူဝ်ႈဝၼ်းတီႈ 16/6/2018 ၼၼ်ႉၵေႃႈ ၸၢဝ်းတႆး ၽူႈယိင်း ဢႃယု 52 ပီ ထုၵ်ႇရၢင်းဝလ်းထီႉၼိုင်ႈ မၢႆ 223131 တင်းမူတ်း 5 ဝႂ် တႃႇငိုၼ်း 30 လၢၼ်ႉဝၢတ်ႇ (ငိုၼ်းထႆး)။

လူင်ပွင်ၸိုင်ႈမိူင်းထႆးၼႆႉ ၼိုင်ႈလိူၼ်ပိုတ်ႇပၼ် 2 ပွၵ်ႈ။ ၽွင်းႁူဝ်လိူၼ်လႄႈ ၵၢင်လိူၼ်။