ၸဝ်ႈၼႃႈတီႈပလိၵ်ႈမၢၼ်ႈ ၶဝ်ႈၵူတ်ႇထတ်း ႁိူၼ်းၵူၼ်းထဝ်ႈ လင်ၼိုင်ႈ ၼႂ်းဝဵင်းတႃႈၶီႈလဵၵ်း၊ ၵူတ်ႇထတ်း တီႉလႆႈယႃႈ မႃႉတင်းၵွင်ႈလဝ်းၼိုင်ႈ။
ဝၼ်းတီႈ 16/9/2019 ယၢမ်းၵၢင်ၼႂ် မွၵ်ႈ 10 မူင်း ၸဝ်ႈၼႃႈတီႈပလိၵ်ႈ လၢႆၾၢႆႇႁူမ်ႈၵၼ်ၶဝ်ႈၵူတ်ႇထတ်း ႁိူၼ်းၵူၼ်းဝၢၼ်ႈ လင်ၼိုင်ႈ တီႈဝၢၼ်ႈမႄႈၶၢဝ် ဢိူင်ႇလွႆတေႃႇၶမ်း ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း။ ၾၢႆႇၽဵဝ်ႈမူၺ်ႉယႃႈမဝ်း ၵမ် မိူင်းမၢၼ်ႈ CCDAC ပိုၼ်ၽၢဝ်ႇဝႆႉဝႃႈ ၵူတ်ႇထတ်းႁၼ် ယႃႈမႃႉ ဢၼ်သႂ်ႇထူင်သေ မူၵ်းဝႆႉတႂ်ႈၵွင်သဝ်ဢုတ်ႇတၢင်းၼႃႈ ႁိူၼ်း တင်းမူတ်း 3,600 မဵတ်ႉ (တေတူၵ်းမႅၼ်ႈငိုၼ်းယူႇ 36 သႅၼ်ပျႃး)။ လိူဝ်ၼၼ်ႉႁၼ် ၵွင်ႈဢၼ်ႁဵတ်းဢွၵ်ႇမႃးတၢင်း မိူင်းဢီႇတလီႇ လဝ်းၼိုင်ႈ။ ၸဝ်ႈႁိူၼ်းဢၼ်ထုၵ်ႇၺႃးတီႉၼၼ်ႉ ၸိုဝ်ႈႁွင်ႉ လုင်းဢႃးၽႃႇ ဢႃယု 73 ပီ။
လုင်းၸၢႆး ၵူၼ်းတႃႈၶီႈလဵၵ်း လၢတ်ႈဝႃႈ “ ႁူႉယူႇၼႃႇ မိူင်းႁဝ်းၼႆႉတႄႉ။ ပေႃးတီႉလႆႈၶူဝ်းၽိတ်းမၢႆမီႈတၢင်ႇရူတ်ႉပဵၼ်လမ်း ပဵၼ်လမ်းတႄႉ ဢမ်ႇတွၼ်ႉမီးၸဝ်ႈၶွင်သေပွၵ်ႈ။ ၶွင်ပိူဝ်ႈဢၼ်ယႂ်ႇဢၼ်လူင်ၼၼ်ႉ ပဵၼ်ၶွင်ၸုမ်းယိပ်းၵွင်ႈ ဢၼ်ၸမ် ၸႂ်ၶဝ်(သိုၵ်း) ၵမ်ႈၼမ်လူး” ဝႃႈၼႆ။
ၵဵဝ်ႇၵပ်းလွင်ႈၼႆႉ တေႃႈလဵဝ် ယူႇတီႈၾၢႆႇၸဝ်ႈၼႃႈတီႈပလိၵ်ႈၶဝ် လႆႈပိုတ်ႇလိူင်ႈၸွႆးတြႃး လုင်းဢႃးၽႃႇ ဢႃယု 73 ပီ ဝႆႉတီႈႁူင်းပလိၵ်ႈၸႄႈဝဵင်းတႃႈၶီႈလဵၵ်းယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ