ပၢင်ပွႆးႁပ်ႉတွၼ်ႈပီမႂ်ႇတႆး 2114 ၼီႈ (ပီတႆး) တေၸတ်းႁဵတ်း တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ၶိုၵ်ႉယႂ်ႇလူင် တႃႇ ၶၢဝ်းတၢင်း 7 ဝၼ်း။
ပၢင်ပွႆးႁပ်ႉတွၼ်ႈပီမႂ်ႇတႆး 2114 ၼီႈ(ပီတႆး) တေၸတ်းၼႂ်း ဝၼ်းတီႈ 21-27/11/2019 တီႈပၢင်ႇပွႆႇႁူင်းၾႆးမိၼ်ဢဝုၺ်ႇ ယႃႇ ဝဵင်းတူၼ်ႈတီး ၸိုင်ႈတႆးပွတ်းၸၢၼ်း ဝႃႈၼႆ။
ၼၢင်းၼူၼ်းမူဝ် ၸုမ်းၽူႈၼမ်းၼႂ်း ပွင်ပဵၼ်ပၢင်ပွႆးပီမႂ်ႇတႆး 2114 ၼီႈ လၢတ်ႈတီႈၽူႈတွႆႇႁွၵ်ႈဝႃႈ “တေၸတ်းႁဵတ်းတႃႇ 7 ဝၼ်း။ ၼႂ်းဝၼ်းတီႈ 21 တႄႉ တႄႇပိုတ်ႇပၢင်ပွႆး၊ ဝၼ်းတီႈ 25 သမ်ႉ တေၶေႉၶဵင်ႇၵၢၼ်ၶႅၵ်းမွၵ်ႇ/မၢၵ်ႇ၊ ၼႄတၢင်းၵႃႈလႄႈ ၵိၼ်ၶဝ်ႈႁူမ်ႈမူႇၵၼ်။ ဝၼ်းတီႈ 26 သမ်ႉ တေလဵပ်ႈတူၼ်ႈၶူဝ်းလူႇ၊ ၵၢင်ၶမ်ႈသမ်ႉ တေပိုတ်ႇဝႂ်ၸၢမ်းၵၢမ်ႇ/ ၸၢမ်းသုၼ်ႇ (လွင်ႈၼႆႉတႄႉ ပႆႇတူၵ်းလူင်း တေပိုတ်ႇဝၼ်းလႂ်တႄႉတႄႉ လၢမ်းဝႆႉတႄႉ တေပဵၼ်ၶမ်ႈဝၼ်းတီႈ 26 ၼႆၵူၺ်း)။ ဝၼ်း ထူၼ်ႈ 27 သမ်ႉ တေမီးပၢင်ၵႅဝ်ႈ လႄႈ ပၢင်လဵၼ်ႈႁႅင်း”ဝႃႈၼႆ။
ပၢင်ပွႆးပီမႂ်ႇတႆး ဢၼ်တေၸတ်းႁဵတ်းတီႈဝဵင်းတူၼ်ႈတီး ပွၵ်ႈၵမ်းၼႆႉ တေမွၵ်ႇထိုင် ၵေႃလိၵ်ႈလၢႆးလႄႈၾိင်ႈငႄႈတႆး ၵူႈၸႄႈဝဵင်း ၼႂ်းမိူင်းတႆးပတ်းပိုၼ်ႉ၊ ယဝ်ႉၵေႃႈ တၢင်ႇၸႄႈမိူင်း/ တိူင်းလႄႈ ဢိၵ်ႇပႃးထႅင်ႈ ၼွၵ်ႈမိူင်း ဝႃႈၼႆ။
ၼၢင်းၼူၼ်းမူဝ် လၢတ်ႈဝႃႈ “ ပၢင်ပွႆးပီမႂ်ႇတႆး ဢၼ်ပၼ်ႇပုတ်ႈၵၼ်သေ ၸတ်းႁဵတ်းၼႆႉ ပီၼႆႉ တူၵ်းပုၼ်ႈၽွၼ်းတၢင်း ၵဵင်းတုင်၊ ၵူၺ်းၵႃႈ ပီႈၼွင်ႉၵဵင်းတုင်ၶဝ် ပႆႇတူဝ်ႈတၼ်းလီလႄႈ ၸင်ႇမွပ်ႈယိုၼ်ႈမႃးတၢင်းတူၼ်ႈတီးၼႆႉၶႃႈ။ လိူဝ်ၼၼ်ႉ ႁဝ်းၶႃႈဢွၼ်ၵၼ်မၵ်းမၼ်ႈဝႃႈ ဝၼ်းလဵပ်ႈၶူဝ်းလူႇၼၼ်ႉ တေဢွၼ်ၵၼ်သႂ်ႇၶူဝ်းတႆးသီၶွင်ႇ ႁႂ်ႈပဵၼ်သီမွၵ်ႇ ၵွၼ်တင်းဝဵင်း။ ဢၼ်ၵိုတ်းၸိူဝ်းၼၼ်ႉသမ်ႉ တေပဵၼ်ၶူဝ်းတႆး သီလိူင်၊ ၶဵဝ်၊ လႅင်” ဝႃႈၼႆ။
ပၢင်ပွႆးပီမႂ်ႇတႆး 2114 ၼီႈ(ပီတႆး) တီႈဝဵင်းလူင်တူၼ်ႈတီးၼႆႉ ယူႇတီႈ ပီႈၼွင်ႉၵူၼ်းမိူင်း ၸုမ်းတူင်ႉၼိုင်တူင်ႇဝူင်းတႆး ႁူမ်ႈ ၵၼ်ၶွတ်ႇၽွတ်ႈၸုမ်းပွင်ၵၢၼ်ပၢင်ပွႆးပီမႂ်ႇတႆး ပီ 2114 ၼီႈမႃး။ ႁူဝ်ပဝ်ႈ 1 ပဵၼ် လုင်းၸၢႆးထုၼ်းမျႃႉ၊ ႁူဝ်ပဝ်ႈ 2 ၸဝ်ႈလႅင်း သႂ် (ပၢင်ႇလႅင်းသႂ်)၊ ၽူႈၼမ်းၼႂ်း ၸၢႆးၸေႃႇၸေႃႇလႄႈ ၸုမ်းၽူႈၼမ်းၼႂ်းသမ်ႉ ၸၢႆးၶမ်းၼုတ်း၊ ၸၢႆးၼုတ်း၊ ၼၢင်းၼူၼ်း မူဝ်လႄႈ ၼၢင်းၶမ်းၼူၼ်း။ ယဝ်ႉၵေႃႈ ၵေႃၽႄထႅင်ႈလၢႆလၢႆဢၼ် ၸဵမ်ၸိူဝ်းၼႆႉ။
ပၢင်ပွႆးပီမႂ်ႇတႆး ဢၼ်ၸတ်းႁဵတ်းၶိုၵ်ႉယႂ်ႇလူင် တီႈဝဵင်းတူၼ်ႈတီးၼႆႉ ၸတ်းႁဵတ်းမႃး ပဵၼ်ပွၵ်ႈၵမ်း 2 ပႃးပွၵ်ႈၼႆႉ။ ပွၵ်ႈၵမ်းၼိုင်ႈ ၸတ်းႁဵတ်း မိူဝ်ႈပီ 2014 (ပီတႆး 2109)။
ပၢင်ပွႆးႁူမ်ၸူမ်းႁပ်ႉတွၼ်ႈ ပီမႂ်ႇတႆး ဢၼ်ႁူမ်ႈၵၼ်ၸတ်းႁဵတ်း ၶိုၵ်ႉယႂ်ႇလူင်ၼႆႉ ပွၵ်ႈၵမ်းႁႅၵ်ႈ ၸတ်းႁဵတ်းတီႈ ဝဵင်းၵဵင်း တုင် မိူဝ်ႈပီ 2012 (ပီတႆး 2107)။ ပွၵ်ႈၵမ်းသွင်သမ်ႉ ၸတ်းႁဵတ်းတီႈတူၼ်ႈတီး မိူဝ်ႈပီ 2014 (ပီတႆး 2109)။ ပွၵ်ႈၵမ်းသၢမ် ပီ 2018 (ပီတႆး 2112) သမ်ႉ ၸတ်းႁဵတ်းတီႈဝဵင်းလႃႈသဵဝ်ႈ။
