သိုၵ်းလူင်ပွင်ၸိုင်ႈမၢၼ်ႈ ဢၼ်တူင်ႉၼိုင်ယူႇတၢင်းပွတ်းဢိူင်ႇမိူင်းပူးလူင် ၸႄႈဝဵင်းမိူင်းပဵင်းၼၼ်ႉ ႁွင်ႉဢဝ်ၵူၼ်းဝၢၼ်ႈ သွင် ၵေႃႉ ၵႂႃႇထဵတ်ႈထၢမ် ပေႃႉထုပ်ႉႁၢဝ်ႈႁႅင်း ဝႃႈၼႆ။

ဝၼ်းတီႈ 12/9/2019 ယၢမ်းၵၢင်ၶမ်ႈ မွၵ်ႈ 6 မူင်းၼၼ်ႉ သိုၵ်းလူင်ပွင်ၸိုင်ႈ ၶလယ 278 ႁွင်ႉဢဝ် လုင်းၸၢႆးၸၼ်ႇတ ၽူႈ ၵွၼ်းဝၢၼ်ႈလွၼ်းၵႅဝ်ႈ တင်း ၸၢႆးဢွင်ႇၸေႇယ ၵူၼ်းဝၢၼ်ႈလွၼ်းၵႅဝ်ႈ ၵႂႃႇထဵတ်ႈထၢမ် တၢင်းၵွင်းလွႆ ၾၢႆႇဢွၵ်ႇဝၢၼ်ႈ လွၼ်းၵႅဝ်ႈ ယၢၼ်ၵႆ ဝၢၼ်ႈမွၵ်ႈ 15 မိၼိတ်ႉ ၼႂ်းဢိူင်ႇမိူင်းပူးလူင် ၸႄႈဝဵင်းမိူင်းပဵင်း ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်း ဢွၵ်ႇၶူင်း။

ၸၢႆးၸၼ်ႇတ ၽူႈၵွၼ်းဝၢၼ်ႈလွၼ်းၵႅဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ သိုၵ်းမၢၼ်ႈၶဝ်မႃးႁွင်ႉၶႃႈၵႂႃႇတီႈ တပ်ႉပၢင်သဝ်း ၵဝ်ႇ သိုၵ်းတႆး သေ ဝႃႈႁင်းၶႃႈ – ၼႆႉမႂ်းဝႃႈ မႂ်းဢမ်ႇ ႁူႉ ဢမ်ႇႁၼ်။ ၶႃႈၶိုၼ်းတွပ်ႇဝႃႈ ဢိူဝ်ႈၼႂ်းထိူၼ်ႇၼႂ်းၶိူဝ်းတႄႉ ႁူႉမီးၵႂႃႈ ။ ၼႂ်းဝၢၼ်ႈၼႂ်းၶူင်ႇတႄႉဢမ်ႇမီးၼႃႇ ၶႃႈ ဝႃႈ ၼႆလႄႈ ၶဝ် ၸႂ်ႉၶႃႈၼင်ႈလူင်းသေ တိၼ်ပိတ်ႉသႂ်ႇၼႃႈဢူၵ်းၶႃႈ လၢႆလၢႆၵမ်း။ ယဝ်ႉၵေႃႈ ဢဝ်မိတ်ႈၸမ်ႈႁူဝ်မႃႇ ၶႃႈဝႆႉ။ ယၢမ်းလဵဝ်ၼႆႉ ဢူၵ်းၶႃႈတိုၵ်ႉၸဵပ်း၊ တိုၵ်ႉမူၺ်ႈယူႇ။ ထူၺ်ႈၸႂ်ၵေႃႈၵပ်ႉၶႃႈဢေႃႈ” ဝႃႈၼႆ။

လုင်းၸၢႆးၸၼ်ႇတ ဢႃယု 54 ပီ တင်း ၸၢႆးဢွင်ႇၸေႇယ ဢႃယု 40 ဢၼ်ၺႃးသိုၵ်းမၢၼ်ႈ ႁွင်ႉၵႂႃႇၸႅတ်ႈထၢမ် ပေႃႉထုပ်ႉ ၼၼ်ႉ ထိုင်ယၢမ်းၵၢင်ၶမ်ႈ မွၵ်ႈ 8 မူင်း ၸင်ႇတေပွႆႇတူဝ်ၶႃသွင်ၵေႃႉၶိုၼ်း ဝႃႈၼႆ။

ၸၢႆးၸၼ်ႇတ လၢတ်ႈဝႃႈ “ ၶဝ်ႁွင်ႉၵႂႃႇ ယၢမ်းၵၢင်ၶမ်ႈ 6 မူင်းသေ ၶဝ်မတ်ႉႁဝ်းသွင်ၵေႃႉ ၵိုၵ်းၵၼ် ပေႃႉထုပ်ႉႁႃးသွင်ၵေႃႉ ထိုင်မႃး ယၢမ်းၵၢင်ၶမ်ႈ 8 မူင်း ၶဝ်ၸင်ႇမႃးသူင်ႇတီႈဝၢၼ်ႈသေ ပွႆႇတူဝ်ၶိုၼ်း။ တေႃႈလဵဝ်တႄႉ တွၼ်ႈတႃႇၶႃႈ လႆႈမႃးယူတ်း ယႃတူဝ်ဝႆႉတီႈၵဵင်းတုင်။ မေႃယႃၶဝ် တိုၵ်ႉပေႃႉထၢတ်ႈမၢၼ်ႇတူၺ်းတီႈဢူၵ်းၶႃႈယူႇ ။ တိုၵ်ႉပႂ်ႉထွမ်ႇၶေႃႈတွပ်ႇမေႃယႃၶဝ် ယူႇ ဝႃႈ လုပ်ႇႁၵ်းႁႃႉဢမ်ႇ ႁၵ်း” ဝႃႈၼႆ။

သိုၵ်းလူင်ပွင်ၸိုင်ႈမၢၼ်ႈ ႁွၼ်ႈထဝ်ႇၼႂ်းထိူၼ်ႇ ႁၼ်မႅၼ်ႈဢွင်ႈတီႈၵဝ်ႇပၢင်သဝ်း သိုၵ်းတႆး RCSS လႄႈ ၸင်ႇၵႂႃႇႁွင်ႉ ဢဝ်ၵူၼ်းဝၢၼ်ႈၵႂႃႇထဵတ်ႈထၢမ် ။ ၼႄးဝႃႈ ဢမ်ႇပွင်ႇၶၢဝ်ႇၸူးသိုၵ်းလူင်ပွင် ၸိုင်ႈမၢၼ်ႈၼႆသေ ပေႃႉထုပ်ႉ ဝႃႈၼႆ။

ၸဝ်ႈသိုၵ်း ၸၢႆးၸူဝ်းမိူင်း ၽူႈၼင်ႈလုမ်းၵပ်းသၢၼ် RCSS/SSA တီႈၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈပၼ် ႁႅင်းၸႂ်ၶဝ်ယူႇၶႃႈဢေႃႈ။ ၵွပ်ႈပိူဝ်ႈဝႃႈ ၽူႈၵွၼ်းဝၢၼ်ႈၼႆႉ မၼ်းပဵၼ်ၵူၼ်းမိူင်းယုမ်ႇယမ်တမ်းၸႂ်သေလႄႈ လိူၵ်ႈတင်ႈ ၶိုၼ်ႈမႃး ၊ ၵွပ်ႈပိူဝ်ႈၶဝ်တၢင်တူဝ်ဝၢၼ်ႈ လႄႈ မူႇလႂ်ၸုမ်းလႂ်သေဢမ်ႇဝႃႈ မီးလွင်ႈထၢမ် မီးလွင်ႈၵၢၼ် ပိူၼ်ႈတိုၼ်းမႃးႁႃ ထဝ်ႈၵႄႇဢွၼ်တၢင်း။ ၵူၺ်းၵႃႈ ၸုမ်းလႂ်သေဢမ်ႇဝႃႈ လူဝ်ႇမႃး လွင်ႈလီၵူၺ်း ။ ၵွပ်ႈပိူဝ်ႈၸုမ်းႁဝ်းၶႃႈၵေႃႈ မၢၼ်ႇမႅၼ်ႈ ၸွမ်းတြႃး ယဝ်ႉလႄႈ တေဢမ်ႇမီး 17/1 ယဝ်ႉ။ ႁဝ်းၶႃႈၶႂ်ႈႁႂ်ႈၵူၼ်းမိူင်းယူႇၵတ်းယဵၼ်လႄႈ ၸင်ႇၵိုတ်းတိုၵ်း NCA ၶႃႈလူး” ဝႃႈၼႆ။

ၸၢႆးၸူဝ်းမိူင်း သိုပ်ႇလၢတ်ႈဝႃႈ ၸွမ်းၼင်ႇၶေႃႈတူၵ်းလူင်း NCA ၼၼ်ႉ သိုၵ်းတႆးၵေႃႈတူင်ႉၼိုင်ယူႇၼႂ်းထိူၼ်ႇၵူၺ်းလႄႈ ဢၼ်သိုၵ်းမၢၼ်ႈမႃးပေႃႉထုပ်ႉၵူၼ်းဝၢၼ်ႈ ၼႆႉဢမ်ႇထုၵ်ႇမႅၼ်ႈ ဢမ်ႇလီပဵၼ် ဝႃႈၼႆ။

ပူႇၵႄႇ ၸၢႆးၸၼ်ႇတ လၢတ်ႈဝႃႈ သိုၵ်းလူင်ပွင်ၸိုင်ႈမၢၼ်ႈ ၸုမ်းၼိုင်ႈ မီးတီႈပၢင်သဝ်းၵဝ်ႇသိုၵ်းတႆး ၼႂ်းထိူၼ်ႇ၊ ထႅင်ႈ ၸုမ်းၼိုင်ႈသမ်ႉ ၶဝ်ႈဝၢၼ်ႈမႃးတီႉၺွပ်းပူႇၵႄႇလႄႈလုၵ်ႈဝၢၼ်ႈ ။ ဢဵၼ်ႁႅင်းသိုၵ်းၶဝ်မီးမွၵ်ႈ 100 ဝႃႈၼႆ။

“ ယူႇတီႈႁဝ်းၶႃႈ ၵူၼ်းမိူင်းတႄႉ ၶႂ်ႈတုၵ်းယွၼ်းဝႃႈ ယႃႇပေမႃးပေႉၵိၼ်ႁဝ်း တဵၵ်းတဵင်ႁဝ်း လူဝ်ႇၸိူင်ႉႁိုဝ်ၵေႃႈ ထၢမ်လီလီ ႁဝ်းၶႃႈၵေႃႈတေမွၵ်ႇပၼ်လီလီ ႁဝ်းၶႃႈတႄႉ ပဵၼ်ၵူၼ်းသိုဝ်ႈၵူၼ်းယူဝ်း ၶႂ်ႈယူႇၵတ်းယူႇယဵၼ်ၵူၺ်း” ဝႃႈၼႆ။

မိူဝ်ႈၼႂ်းလိူၼ်ၵျူႊလၢႆႊ 2019 ၼၼ်ႉၵေႃႈ သိုၵ်းမၢၼ်ႈ တီႉၺွပ်းၵူၼ်းဝၢၼ်ႈ တီႈမိူင်းပဵင်းၵေႃႉၼိုင်ႈ ၼႄးဝႃႈ ပဵၼ်ၵူၼ်း RCSS ၼႆသေၵုမ်းၶင်ဝႆႉ 10 ဝၼ်းယဝ်ႉ ၸင်ႇမွပ်ႈပၼ်ပလိၵ်ႈပိုတ်ႇလိူင်ႈလူၺ်ႈတၢင်းၽိတ်းယႃႈမဝ်းၵမ်။