ၸဝ်ႈၼႃႈတီႈပလိၵ်ႈမၢၼ်ႈ ၵူတ်ႇထတ်းတီႉလႆႈယႃႈမႃႉတႃႇ ၶၼ်ငိုၼ်း မွၵ်ႈ ၼိုင်ႈႁဵင်သႅၼ်ပျႃး တီႈႁိမ်းလၢၼ်ႇ (တူဝ်းၵဵတ်ႉ) တၢင်းဢွၵ်ႇဝဵင်းတႃႈလိူဝ်ႇ ၸိုင်ႈတႆးပွတ်းဢွၵ်ႇၶူင်း။
ဝၼ်းတီႈ 13/9/2019 ယၢမ်းႁူဝ်ၶမ်ႈ မွၵ်ႈ 5 မူင်းၶိုင်ႈ ၸဝ်ႈၼႃႈတီႈပလိၵ်ႈ လၢႆလၢႆၾၢႆႇ ႁူမ်ႈၵၼ်ၵူတ်ႇထတ်း ၵႃးဢၼ် မွင်ႇၵျႃႇပူဝ်ႇသျိၼ်ႇ ဢႃယု 23 ပီ ႁေႃႈမႃး တီႈႁိမ်းၵဵတ်ႉ/ လၢၼ်ႇတူဝ်းၵဵတ်ႉ တၢင်းဢွၵ်ႇၵိင်ႇၽႄ ဝဵင်းတႃႈလိူဝ်ႇ ၸႄႈ ဝဵင်းတႃႈၶီႈလဵၵ်း ၸိုင်ႈတႆး ပွတ်းဢွၵ်ႇၶူင်း တီႉလႆႈယႃႈမႃႉ 1 သႅၼ်မဵတ်ႉ ။
ႁွင်ႈၵၢၼ်ၾၢႆႇပလိၵ်ႈၽဵဝ်ႈမူၺ်ႉယႃႈမဝ်းၵမ် ပိုၼ်ၽၢဝ်ႇဝႆႉဝႃႈ “ ၵူတ်ႇထတ်းလႆႈယႃႈမႃႉ ႁဵတ်းပဵၼ်ႁေႃႇသေ သႂ်ႇ ထူင် ၸၢၼ်ႈ တၢင်ႇမႃးတၢင်းလင်ၵူၼ်းၼင်ႈၼၼ်ႉ တင်းမူတ်းမီး 1 သႅၼ်မဵတ်ႉ။ လိူဝ်ႈၼၼ်ႉတီႉလႆႈပႃး ၵွင်ႈသတ်ႉယၢမ်း 1 လဝ်း၊ ၾူၼ်းၼိုင်ႈလုၵ်ႈ။ မွင်ႇၵျႃႇပူဝ်ႇသျိၼ်ႇၼႆႉ ပဵၼ်ၵူၼ်းမိူင်းၽျၢၵ်ႈ” ဝႃႈၼႆ။
ၵဵဝ်ႇၵပ်းလွင်ႈၼႆႉ တေႃႈလဵဝ် ယူႇတီႈၸဝ်ႈၼႃႈတီႈပလိၵ်ႈ လႆႈပိုတ်ႇလိူင်ႈၸွႆးတြႃး ၸွမ်းၼင်ႇပၵ်းပိူင်မၢႆမီႈ ဝၢၼ်ႈမိူင်းမီး ဝႆႉတီႈႁူင်းပလိၵ်ႈဝဵင်းတႃႈလိူဝ်ႇ။ လိူဝ်ၼၼ်ႉ ၶိုၼ်းသိုပ်ႇလူင်းပိုၼ်ႉတီႈ ၸွပ်ႇထတ်းတူၺ်းၽူႈၵဵဝ်ႇၶွင်ႈၸွမ်း ယူႇဝႃႈၼႆ။
ၼႂ်းဝၼ်းလဵဝ်ၵၼ်ၵူၺ်း ယၢမ်းၵၢင်ၶမ်ႈ ၸဝ်ႈၼႃႈတီႈ တီႉလႆႈထႅင်ႈယႃႈမႃႉ ဢၼ်လုၵ်ႉတၢင်းၵျွၵ်ႉမႄး လူင်းၵႂႃႇတၢင်းၼွင် ၶဵဝ် ၊ ၵူတ်ႇထတ်းတီႉလႆႈၼႂ်းၵႃးလမ်းၼိုင်ႈ၊ တင်းၼမ် 1,687 မဵတ်ႉ(တေတူၵ်းမႅၼ်ႈၶၼ်ငိုၼ်းမၢၼ်ႈ 33.74 သႅၼ် ပျႃး) လႄႈ ငိုၼ်းမၢၼ်ႈထႅင်ႈ 1 သႅၼ်ပျႃး ဝႃႈၼႆ။
တီႈၼႂ်းၸႄႈဝဵင်းၵဵင်းတုင် ၵေႃႈ မိူဝ်ႈဝၼ်းတီႈ 14 ပူၼ်ႉမႃးၼႆႉ ၸဝ်ႈၼႃႈတီႈ ႁႄႉလူတ်ႉၶိူင်ႈ 4 လမ်း ၵူၼ်း 6 ၵေႃႉ။ တၢင်ႇမႃးထူင်ယႃႈဢႆႉသ် ယႃႈမဝ်းၵမ်။ ၽွင်းႁၼ်ၸဝ်ႈၼႃႈတီႈႁႄႉလူတ်ႉၵေႃႈ ၵူၼ်း 6 ၵေႃႉၼၼ်ႉ ပႅတ်ႈထူင်ယႃႈ ဢႆႉသ်လူင်းသေ ႁေႃႈလူတ်ႉပၢႆႈ။ ၸဝ်ႈၼႃႈတီႈပိုတ်ႇထူင်ၸၢၼ်ႈတူၺ်းလႆႈႁၼ်ယႃႈဢႆႉသ် 150 ၵီႊလူဝ်ႊၵရမ်ႊ ၵႃႈ ၶၼ်ငိုၼ်းမွၵ်ႈ 37,500 သႅၼ်ပျႃး ။ ၸဝ်ႈၼႃႈတီႈယင်းတိုၵ်ႉလမ်းတူၺ်းယူႇဝႃႈပဵၼ်ၽႂ်လုၵ်ႉလႂ်မႃး ၾၢႆႇပွင်ႇၶၢဝ်ႇတပ်ႉသိုၵ်းလူင်ပွင်ၸိုင်ႈလႆႈဢွၵ်ႇၶၢဝ်ႇဝႆႉ။
ၵဵဝ်ႇၵပ်းလွင်ႈၼႆႉ ၵူၼ်းမိူင်းၽျၢၵ်ႈၵေႃႉၼိုင်ႈတႄႉလၢတ်ႈဝႃႈ – ဢၼ်ႁတ်းတေႃႉယႃႈၵႂႃႇၼႃႈမႃးတႃ ဢမ်ႇၵူဝ်ၵိၼ်ၽႂ် ဢမ်ႇ ဝူၼ်ႉတႃႇၽႂ်ၼႆႉတႄႉ ၵမ်ႈၼမ်တေပဵၼ်ၽူႈၶဝ်ႈၸုမ်းသိုၵ်းၵူၼ်းမိူင်း (ပျီႇတုၸိတ်ႉ) ၵူၺ်း။ ပေႃးပဵၼ်ၵူၼ်းမိူင်းယူဝ်း ယူဝ်း ဢမ်ႇမီးၽႂ်ၸုမ်းလႂ်ယူႇၵမ်ႉလင်တႄႉ ဢမ်ႇႁတ်းႁဵတ်း- ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ