ၵူၼ်းမိူင်းလၢပ်ႈ ၵဵင်းတုင် ႁူမ်ႈၵၼ်သိုပ်ႇၸႆးတႃ/ၸႃႇတႃႇ ပႃႇမႆႉ ၼမ်ႉလိၼ်ႁိၼ်ၽႃ

ၵူၼ်းၼႂ်းဢိူင်ႇမိူင်းလၢပ်ႈ ၸႄႈဝဵင်းၵဵင်းတုင် ႁူမ်ႈၵၼ်သိုပ်ႇၸႆးတႃ ပႃႇမႆႉလႄႈ ၼမ်ႉလိၼ်ႁိၼ်ၽႃ ပွၵ်ႈၵမ်းႁႅၵ်ႈ မီးၵူၼ်း ၶဝ်ႈႁူမ်ႈဢမ်ႇယွမ်း 200 ၵေႃႉ။

ဝၼ်းတီႈ 14/9/2019 ယၢမ်းၵၢင်ၼႂ် 8:30 မူင်း ထိုင် 10:00 မူင်း သင်ၶၸဝ်ႈလႄႈတၵ်ႉၵႃႇသတ်ႉထႃး ၼႂ်းဝၢၼ်ႈၵၢင်၊ ဝၢၼ်ႈ တွင်းလႄႈ ဝၢၼ်ႈၸွၼ်ႈ ဢိၵ်ႇပႃးလူၺ်ႈ ၵူၼ်းမိူင်းတႃႈလိူဝ်ႇ လႄႈ ၵေႃႁူမ်ႈသၢင်ႈၸဝ်ႈႁႆႈၸဝ်ႈၼႃး ၸိုင်ႈတႆး ႁူမ်ႈၵၼ် ၸတ်းႁဵတ်းပၢင်လူႇတၢၼ်းၶိုၼ်ႈသိမ်ႇလႄႈ သိုပ်ႇၸႆးတႃပႃႇမႆႉ ၼမ်ႉလိၼ်ႁိၼ်ၽႃ ဢၼ်မီးႁိမ်းၾၢႆႇၼိူဝ်ဝၢၼ်ႈ ၵၢင် ၼႂ်း ဢိူင်ႇမိူင်းလၢပ်ႈ ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း။

ၽူႈၸၢႆး မွၵ်ႈဢႃယု 36 ပီ ၽူႈၶဝ်ႈႁူမ်ႈပၢင်သိုပ်ႇၸႆးတႃ လၢတ်ႈတီႈၽူႈတွႆႇႁွၵ်ႈဝႃႈ “ ယိူင်းဢၢၼ်းတႄႉ တႃႇႁႄႉၵင်ႈ ႁၵ်ႉသႃ ပႃႇမႆႉ ၼမ်ႉလိၼ်ႁိၼ်ၽႃ တွၼ်ႈတႃႇလုၵ်ႈလၢၼ်ၵႂႃႇမိူဝ်းၼႃႈလႄႈ ႁႂ်ႈပဵၼ်တူဝ် ယၢင်ႇလီ တွၼ်ႈတႃႇ ၸဝ်ႈႁႆႈၸဝ်ႈၼႃး ၼႂ်းၸိုင်ႈတႆးပတ်းပိုၼ်ႉ။ ႁႂ်ႈမေႃ ႁႄႉၵင်ႈၼမ်ႉလိၼ်ႁိၼ်ၽႃ လူၺ်ႈလၢႆးၵတ်းယဵၼ်။ ၸင်ႇႁူမ်ႈၵၼ် ၸတ်းႁဵတ်းပၢင်သိုပ်ႇ ၸႆးတႃၼႆႉမႃးၶႃႈ” ဝႃႈၼႆ။

တီႈပၢင်သိုပ်ႇၸႆးတႃၼႆႉ ပၢင်းသင်ၶၸဝ်ႈ မႃးဢွၼ်ႁူဝ်ၼမ်းၼႃႈသေ ဢဝ်သၢင်ႇၵၢၼ်း မတ်ႉတူၼ်ႈမႆႉ။ လိူဝ် ၼၼ်ႉ ပွၼ်ႈ ထမ်းသင်ႇသွၼ်ပၼ်ၵူၼ်းမိူင်း ႁႂ်ႈမေႃႁၵ်ႉသႃထိူၼ်ႇၶိူဝ်းၽိူဝ်မႆႉ လူႇတၢၼ်းယၢတ်ႇၼမ်ႉၶႂမ်ႈ တဝ်ႈၵႂႃႇ ဝႃႈၼႆ။

ၼွၵ်ႈလိူဝ်ၼၼ်ႉ ၵူၼ်းဝၢၼ်ႈတၵ်ႉၵႃႇသတ်ႉထႃး ႁူမ်ႈၵၼ်ဢဝ်ပၢႆႉ ဝိၼ်ႊၼၢႆႊ ဢၼ်မီးလိၵ်ႈတိုၵ်းသူၼ်း ႁႂ်ႈမေႃႁၵ်ႉၼမ်ႉ လိၼ်ႁိၼ်ၽႃ လႄႈ ႁၢမ်ႈတတ်းတူၼ်ႈမႆႉ ၼၼ်ႉမတ်ႉၸွမ်းတူၼ်ႈမႆႉ။ ထိူၼ်ႇပႃႇမႆႉ ဢၼ်မီးႁိမ်းတၢင်းၼိူဝ်ဝၢၼ်ႈၵၢင် ၼၼ်ႉ တၢင်းၵႂၢင်ႈ မီးမွၵ်ႈ 460 ဢေႊၶိူဝ်ႊ ။

မိူဝ်ႈဝၼ်းတီႈ 21/8/2019 ယၢမ်းၵၢင်ၼႂ် 7 မူင်းၼၼ်ႉၵေႃႈ သင်ၶၸဝ်ႈလႄႈ ၵူၼ်းဝၢၼ်ႈ လၢႆလၢႆဝၢၼ်ႈ ၼႂ်းၸႄႈဝဵင်းသီႇ ပေႃႉ ႁူမ်ႈၵၼ် 700 ပၢႆ သိုပ်ႇ ၸႆးတႃ တီႈၾင်ႇၼမ်ႉတူႈ။ တိတ်းပၢႆႉသၢၼ်ၶတ်းၾၢႆ တီႈႁိူၼ်းယေး လႄႈ ၸွမ်းဝၢၼ်ႈ ပိူဝ်ႈပဵၼ်ၵၢၼ်သၢၼ်ၶတ်းၵၢၼ်ၵေႃႇသၢင်ႈၾၢႆၼိူဝ်မႄႈၼမ်ႉတူႈ။

မိူဝ်ႈဝၼ်းတီႈ 8/8/2019 ယၢမ်းၵၢင်ၼႂ် 10 မူင်းပၢႆၼၼ်ႉၵေႃႈ ၵူၼ်းဝၢၼ်ႈမိူင်းႁႆး ႁူမ်ႈၵၼ်ႁဵတ်းပၢင်လူႇတၢၼ်း သိုပ်ႇၸႆး တႃ ထိူၼ်ႇပႃႇမႆႉလႄႈ ၼမ်ႉလိၼ်ႁိၼ်ၽႃ တီႈလူင်ၸဝ်ႈမိူင်း မိူင်းႁႆးၼိူဝ်လႄႈ မႆႉၺွင်ႇၸႂ်မိူင်း ဢၼ်မီးယူႇၵၢင် ဝၢၼ်ႈမိူင်း ႁႆး ၸႄႈဝဵင်းမိူင်းၽျၢၵ်ႈ ၸိုင်ႈတႆးပွတ်းဢွၵ်ႇၶူင်း။ ႁူမ်ႈၵၼ် ၸတ်းႁဵတ်းပၢင်လူႇတၢၼ်းသိုပ်ႇၸႆးတႃ ထိူၼ်ႇပႃႇမႆႉ လႄႈ ၼမ်ႉ လိၼ်ႁိၼ်ၽႃ ပဵၼ်ပွၵ်ႈၵမ်းႁႅၵ်ႈ ဝႃႈၼႆ။