ၽူႈတႅၼ်းသၽႃးသိူဝ်ၽိူၵ်ႇ တွင်ႈထၢမ် (ကြယ်ပွင့်မပြမေးခွန်း) တုၵ်းယွၼ်းၼႂ်းသၽႃးမိူင်းတႆး ဢွင်ႈတီႈလိၼ် ဢၼ်ပိုတ်ႇ ဝႆႉ လုမ်းၽႄၶွမ်ႊမသျိၼ်ႊလိူၵ်ႈတင်ႈ ၸႄႈဝဵင်းမိူင်းပၼ်ႇၼၼ်ႉ ႁႂ်ႈလႆႈပဵၼ်လုမ်းၽူႈတႅၼ်းသၽႃးၸႄႈဝဵင်း လူင်ပွင်ၸိုင်ႈ မိူင်းတႆး ဢမ်ႇၽွမ်ႉ။

ၸၢႆးၼွင်ႉ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းမိူင်းပၼ်ႇ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၵူႈပွၵ်ႈ ၼၼ်ႉ မၼ်းပဵၼ်တီႈလိၼ်ၵူၼ်းမိူင်း။ ႁဝ်းၶႃႈ မႃးႁူပ်ႉၵၼ်သေ တုၵ်းယွၼ်း တၢင်ႇလၢတ်ႈလွင်ႈၶႂ်ႈလႆႈၶႂ်ႈပဵၼ်ၼႄ တီႈ လုမ်း/ ႁွင်ႈၵၢၼ် တႃႇၵပ်းသိုပ်ႇၸဝ်ႈၾႃႉ။ တီႈလိၼ်ၼၼ်ႉ ပီယၢဝ်းၶၢဝ်းႁိုင်မႃး ယၢမ်ႈပဵၼ်ၵဵၵ်ႉ/ ပဵၼ်လုမ်းၾၢႆႇၵုမ်းၵမ်။ တေႃႈလဵဝ် ဝႂ်တီႈလိၼ်ၼၼ်ႉသမ်ႉ ပဵၼ်(အိမ်ငှားဂရန်) ပဵၼ်ဝႆႉၸိုဝ်ႈၽူႈၵွၼ်းၸႄႈဝဵင်း။ သမ်ႉၶိုၼ်းပၼ်လုမ်းၽႄၶွမ်ႊ မသျိၼ်ႊ ပၢင်လိူၵ်ႈတင်ႈယူႇသဝ်း” ဝႃႈၼႆ။

ဢွင်ႈတီႈလိၼ် ဢၼ်ၸၢႆးၼွင်ႉတွင်ႈထၢမ် တုၵ်းယွၼ်းၼၼ်ႉ ပဵၼ်တီႈလိၼ်ၸဝ်ႈၾႃႉမိူင်းပၼ်ႇ ပၼ်ၵူၼ်းမိူင်းမႃး လွင်ႈ ယၢပ်ႇၽိုတ်ႇ လုၵ်ႉတီႈၼၼ်ႈ ၶိုၼ်းသိုပ်ႇဢဝ်ၵႂႃႇတၢင်ႇၸူးၸဝ်ႈၾႃႉ။ ဢွင်ႈတီႈလိၼ်ၼၼ်ႉ မီးဝႆႉၸဵင်ႇႁွင်ႇဝၼ်းဢွၵ်ႇ ၵၢတ်ႇ ပွၵ်ႉရႃႇၸႃႇ (ပွၵ်ႉ 3) ၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။

“ ယူႇတီႈၶႃႈႁဝ်း ႁၼ်ထိုင်ဝႃႈ မိူဝ်ႈၵူႈပွၵ်ႈၼၼ်ႉ မၼ်းပဵၼ်ဢွင်ႈတီႈႁဵၵ်ႈႁွင်ႉ တႃႇၵူၼ်းမိူင်းလႄႈ ယၢမ်းလဵဝ်သမ်ႉ ၽူႈ တႅၼ်းသၽႃးသမ်ႉ ဢမ်ႇမီးလုမ်းလႄႈ ၵူၼ်းမိူင်းႁဝ်းလူဝ်ႇသင်ၼႆ လႆႈၵႂႃႇႁႃႁိူၼ်းၽူႈတႅၼ်းသၽႃးႁဵတ်းၼၼ်။ သင်ၸိူဝ်ႉ ဝႃႈ ႁဝ်းၶႃႈ မီးလုမ်းတွၼ်ႈတႃႇၽူႈတႅၼ်းသၽႃးၶေႃၶေႃၸိုင် ယူႇတီႈၽူႈတႅၼ်းၵေႃႈလႆႈၶိုၼ်ႈလုမ်းတႃႇသေႇ ၵူၼ်းမိူင်း ၵေႃႈ ဢမ်ႇလႆႈမိူဝ်းႁႃတီႈႁိူၼ်းယဝ်ႉ။ ၶႃႈႁၼ်ထိုင်ဝႃႈ ၽူႈတႅၼ်းတင်းၵူၼ်းမိူင်းလႆႈႁူပ်ႉၵၼ်ၼႆႉ တေပဵၼ်တၢင်းၵၢၼ် ထႅင်ႈဢၼ်ၼိုင်ႈလႄႈ ၶႃႈလႆႈယိုၼ်ႈယွၼ်းလုမ်းဢၼ်ၼႆႉ။ ယူႇတီႈၶွမ်ႊမသျိၼ်ႊၶဝ်ၵေႃႈ ယင်းမီးတီႈႁင်းၶေႃၶဝ်ယူႇလႄႈ ဝၢႆးလိုၼ်းမႃးႁႂ်ႈၶိုၼ်းဢၢပ်ႈပၼ် ႁႂ်ႈမၼ်းမိူၼ်ၼင်ႇပၢၼ်ၸဝ်ႈၾႃႉၶိုၼ်း” ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈလူင်ပွင်ၸိုင်ႈၸႄႈမိူင်းတႆး တွပ်ႇလၢတ်ႈဝႃႈ တေဢမ်ႇၸၢင်ႈပၼ် ႁဵတ်းလုမ်းၽူႈတႅၼ်းသၽႃး ၸႄႈ ဝဵင်းမိူင်းပၼ်ႇလႆႈ ဝႃႈၼႆ။

ၸၢႆးၼွင်ႉ လၢတ်ႈဝႃႈ “ ယူႇတီႈၽွင်းလူင် ၾၢႆႇၽုၵ်ႇသွမ်ႈ၊ တူဝ်သတ်းလႄႈ ႁွင်ႈၼမ်ႉ/မိူင်ၾၢႆ တွပ်ႇလၢတ်ႈၶိုၼ်းဝႃႈ ဢွင်ႈ တီႈလိၼ်ၼၼ်ႉ မၼ်းပဵၼ်တီႈလိၼ်လူင်ပွင်ၸိုင်ႈ တႅပ်းတတ်း မီးသုၼ်ႇၸတ်းသၢင်ႈႁၢင်ႈပွင်ဢၼ်ၼိုင်ႈလႄႈ ယဝ်ႉၵေႃႈ ႁၢင်ႈႁႅၼ်းဝႆႉတႃႇ ၵႅမ်ၽူႈၵွၼ်းၸႄႈဝဵင်းထႅင်ႈၵေႃႉၼိုင်ႈတေမႃးယူႇ။ တွၼ်ႈတႃႇ တုၵ်းယွၼ်းႁႂ်ႈပဵၼ်ဢွင်ႈတီႈပိုတ်ႇလုမ်း ၽူႈတႅၼ်းသၽႃး ၸႄႈ ဝဵင်းမိူင်းပၼ်ႇတႄႉ ဢမ်ႇလႆႈယဝ်ႉၶႃႈ” ဝႃႈၼႆ။

ဢွင်ႈတီႈ ဢၼ်ၽူႈတႅၼ်းသၽႃးၸႄႈဝဵင်းမိူင်းပၼ်ႇ ၸၢႆးၼွင်ႉ တၢင်ႇယွၼ်းၼၼ်ႉ ႁႂ်ႈလႆႈပဵၼ်တီႈလုမ်းၽူႈတႅၼ်းသၽႃး ပၢၼ်သိုပ်ႇပၢၼ်ၵႂႃႇမိူဝ်းၼႃႈ ဝႃႈၼႆ။

ၸၢႆးၼွင်ႉ လၢတ်ႈဝႃႈ “ ဢွင်ႈတီႈလိၼ်ၼၼ်ႉၶႃႈႁဝ်းယွၼ်းႁဵတ်းလုမ်းၽူႈတႅၼ်းသၽႃးၸႄႈဝဵင်းမိူင်းပၼ်ႇၼၼ်ႉ ဢမ်ႇ ၸႂ်ႈဝႃႈ ပိုတ်ႇလုမ်းတွၼ်ႈတႃႇ ပႃႇတီႇၽူႈတႅၼ်းသိူဝ်ၽိူၵ်ႇႁဝ်းၶႃႈၵူၺ်း။ ဢမ်ႇဝႃႈပၢၼ်လႂ် ၵေႃႉလႂ် ပႃႇတီႇလႂ် ၶိုၼ်ႈမႃး ၵေႃႈယဝ်ႉ ႁႂ်ႈလႆႈမႃးႁဵတ်းၵၢၼ်တီႈလုမ်း(ၵူႈဝၼ်းႁဵတ်းၵၢၼ်) ပဵၼ်တၢင်းၵၢၼ် ၵူၼ်းမိူင်းမီးလွင်ႈသင်ၵေႃႈ ႁႂ်ႈလႆႈမႃးတၢင်ႇ လၢတ်ႈတီႈလုမ်းၼႆႉၵမ်းလဵဝ်” ဝႃႈၼႆ။