ၵူၼ်းတူၼ်ႈတီး ႁူမ်ႈၵၼ်လူင်းလၢႆးမိုဝ်း ယိုၼ်ႈလိၵ်ႈတုၵ်းယွၼ်းထိုင်လူင်ပွင်ၸိုင်ႈမိူင်းတႆး ႁႂ်ႈၽိူမ်ႉပၼ်ဝၼ်းပွႆးၶိုၼ်းမိူၼ် ၵဝ်ႇ၊ ဢၼ်ယၢမ်ႈႁဵတ်းမႃး 10 ဝၼ်းၼၼ်ႉ ဝႃႈၼႆ။

မိူဝ်ႈၼႆႉ ဝၼ်းတီႈ 6/9/2019 ယူႇတီႈၵူၼ်းမိူင်း၊ ၸုမ်းႁဵတ်းႁူင်းၾႆးမိၼ် ၼႂ်းၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ႁူမ်ႈ ၵၼ် ၵဵပ်းလၢႆးၸိုဝ်ႈ၊ လူင်းလၢႆးမိုဝ်းသေ ယိုၼ်ႈလိၵ်ႈတုၵ်းယွၼ်းထိုင် ၸွမ်ၽွင်းလူင် ၸႄႈမိူင်းတႆး Dr. လိၼ်းထုတ်ႉလႄႈ လူင်ပွင်ၸိုင်ႈမိူင်းတႆး ႁႂ်ႈလႆႈၸတ်းႁဵတ်းၶိုၼ်း ပၢင်ပွႆးႁူင်းၾႆးမိၼ်မိူၼ်ၵဝ်ႇ 9 ၶိုၼ်း 10 ဝၼ်း ဝႃႈၼႆ။

ယူႇတီႈလုမ်းလူင်ပွင်ၸိုင်ႈမိူင်းတႆး ဢုပ်ႇၵုမ်ၵၼ် လွင်ႈပၢင်ပွႆးႁူင်းၾႆးမိၼ် မိူဝ်ႈဝၼ်းတီႈ 3/9/2019 တီႈၸႄႈဝဵင်းတူၼ်ႈ တီး။ လႆႈတူၵ်းလူင်းမၵ်းမၼ်ႈ တေၸတ်းႁဵတ်း ပွႆး 8 ၶိုၼ်း 9 ဝၼ်းၵူၺ်း ဝႃႈၼႆ။

ၵူဝ်ႇၽဵဝ်းမိၼ်းတၢၼ်ႇ ႁူဝ်ၼႃႈၸုမ်းႁဵတ်းႁူင်းၾႆးမိၼ် ဝိတ်ႉၸႃႇမီး လၢတ်ႈတီႈၽူႈတွႆႇႁွၵ်ႈဝႃႈ “ ၵဵဝ်ႇလူၺ်ႈလွင်ႈ ဝၼ်းၸတ်း ႁဵတ်း ပၢင်ပွႆးႁူင်းမိၼ်ၼႆႉ လႆႈပိုၼ်ၽၢဝ်ႇဢွၵ်ႇမႃးဝႃႈ ပီၼႆႉတေၸတ်းႁဵတ်း 8 ၶိုၼ်း 9 ဝၼ်းၵူၺ်းလႄႈ လွင်ႈၼႆႉ ႁဝ်းၶႃႈ ႁူမ်ႈၵၼ်သေ တႅမ်ႈလိၵ်ႈတုၵ်းယွၼ်း ႁႂ်ႈပဵၼ် 9 ၶိုၼ်း 10 ဝၼ်းမိူၼ်ၵဝ်ႇၶိုၼ်း။ မိူဝ်ႈၼႆႉ ႁဝ်းၶႃႈ ဢွၼ်ၵၼ်တၢင်ႇလိၵ်ႈ တုၵ်းယွၼ်း ၵႂႃႇတီႈၸွမ်ၽွင်းလူင်မိူင်းတႆး မိူဝ်ႈၼႆႉ” ဝႃႈၼႆ။

ၽိုၼ်လိၵ်ႈဢၼ်တၢင်ႇယိုၼ်ႈထိုင် ၸွမ်ၽွင်းလူင်မိူင်းတႆးလႄႈ လူင်ပွင်ၸိုင်ႈမိူင်းတႆးၼၼ်ႉ တုၵ်းယွၼ်းဝႃႈ “ ယူႇတီႈ ႁဝ်းၶႃႈ ၸုမ်းႁဵတ်းႁူင်းၾႆးမိၼ်ၼႆႉသေ ၸွမ်းၼင်ႇၾိင်ႈႁိတ်ႈႁွႆးပၢင်ပွႆးမီးၼၼ်ႉ ၼိုင်ႈပီလႂ် ၸတ်းႁဵတ်း 10 ဝၼ်း။ ပီၼႆႉသမ်ႉ တေလူတ်းပဵၼ်ၵႂႃႇ 8 ၶိုၼ်း 9 ဝၼ်းၵူၺ်းလႄႈ ယွၼ်ႉၼၼ် သင်ၸတ်းႁဵတ်းၵႂႃႇၸိုင် တေႁူပ်ႉလွင်ႈယၢပ်ႇ ၽိုတ်ႇတင်းၼမ်” ဝႃႈၼႆ။

ၵူဝ်ႇၽဵဝ်းမိၼ်းတၢၼ်ႇ လၢတ်ႈဝႃႈ “ ႁဵတ်းသင်လႄႈ ၶႂ်ႈႁႂ်ႈၽိူမ်ႉဝၼ်းမၼ်းၶိုၼ်း မိူၼ်ၵဝ်ႇ 9 ၶိုၼ်း 10 ဝၼ်းလႃႇၼႆ ယွၼ်ႉ ဝႃႈ ႁူင်း ၾႆးမိၼ်ဢၼ်တေပွႆႇၼၼ်ႉ မၼ်းမီးၼမ်။ ပေႃးဝႃႈ ဝၼ်းပွႆးမၼ်းသမ်ႉ ယွမ်းလူင်းၼႆ တေပဵၼ်လွင်ႈယၢပ်ႇၽိုတ်ႇ တႄႉၶႃႈ။ ယွၼ်ႉၼၼ်လႄႈ တုၵ်းယွၼ်းႁႂ်ႈႁဵတ်းမိူၼ်ၵူႈပီပူၼ်ႉမႃး ၼၼ်ႉၶႃႈ” ဝႃႈၼႆ။

လိူဝ်ၼၼ်ႉ ၼႂ်းလိၵ်ႈတုၵ်းယွၼ်းၼၼ်ႉ တႅမ်ႈဝႆႉပႃးဝႃႈ “ သင်ဝႃႈ လူတ်းယွမ်းဝၼ်းႁဵတ်းမၼ်းထႅင်ႈၼႆၸိုင် တေတုမ်ႉတိူဝ်ႉ ၵူၼ်းၶၢႆၶူဝ်းၼႂ်းပွႆး၊ ပိူင်လူင် တေတုမ်ႉတိူဝ်ႉပႃးၵၢၼ်ပၢႆးမၢၵ်ႈမီး ၸႄႈမိူင်း ၵၢၼ်တွင်ႈတဵဝ်း ဢႅဝ်ႇယဵမ်ႈ ၸိူဝ်းၼႆႉ” ဝႃႈၼႆ။

ယူႇတီႈပၢင်ၵုမ်လူင်ပွင်ၸိုင်ႈၸႄႈမိူင်းတႆး ဢၼ်ၸတ်းႁဵတ်းၵႂႃႇ မိူဝ်ႈဝၼ်းတီႈ 3/9/2019 ၼၼ်ႉ ဢုပ်ႇဢူဝ်းငူပ်ႉငီႉမၵ်း မၼ်ႈဝႃႈ ပီၼႆႉ ပၢင်ပွႆးႁူင်းၾႆးမိၼ် တီႈဝဵင်းတူၼ်ႈတီးၼႆႉ တေၸတ်းႁဵတ်း ၼႂ်းဝၼ်းတီႈ 4-12/11/2019 တႃႇ 8 ၶိုၼ်း 9 ဝၼ်း ဝႃႈၼႆ။

မိူဝ်ႈပီ 2018 ၼၼ်ႉ ပၢင်ပွႆးႁူင်းၾႆးမိၼ် ၸတ်းႁဵတ်းၵႂႃႇ ၼႂ်းဝၼ်းတီႈ 14-23/11/2018 တီႈပၢင်ႇပွႆႇႁူင်းၾႆးမိၼ်ဢဝေႇယႃႇ ၸႄႈဝဵင်းတူၼ်ႈတီး။ ႁူင်းၾႆးဢၼ်ၶဝ်ႈၶႅင်ႇၵၼ် တင်းမူတ်းမီး 411 လုၵ်ႈ။ ပွႆႇၵၢင်ၶိုၼ်းမီး 123 လုၵ်ႈ။ ပွႆႇၵၢင်ဝၼ်းသမ်ႉ 228 လုၵ်ႈ။

ပီ 2018 ၼၼ်ႉ ႁူင်းၾႆးမိၼ်လူင် ဢၼ်ပွႆႇၵၢင်ၶမ်ႈ ဢၼ်ပႃးၼူၾႆး ဢၼ်လႆႈသူးထီႉၼိုင်ႈငိုၼ်း 70 သႅၼ်ပျႃး၊ ထီႉသွင် 65 သႅၼ်ပျႃး၊ ထီႉသၢမ်သမ်ႉ 60 သႅၼ်ပျႃး ၸိူဝ်းၼႆႉ။