ဢိင်ၼိူဝ်လွင်ႈၶၼ်ငိုၼ်းထႆး ၶိုၼ်ႈသေ ၸွမ်းလႅၼ်လိၼ်တႆး – ထႆး ၵႃႈၶၼ်ၵုၼ်ႇၶူဝ်းၵေႃႈၶိုၼ်ႈၸွမ်းလႄႈ ၵူၼ်းမိူင်းယူႇ ၸွမ်း လႅၼ်လိၼ် တႆး – ထႆး တႃႈၶီႈလဵၵ်း ပဵၼ်ဢၼ်မႆႈၸႂ် ၼၵ်းၸႂ်ၼႂ်းၵၢၼ်ႁႃၵိၼ်လဵင်ႉတွင်ႉ။
တီႈလႅၼ်လိၼ်တႆး – ထႆး တၢင်းၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း တင်ႈဢဝ်ၵၢင်လိူၼ်ဢေႃႊၵတ်ႊသ်မႃး ၶၼ်ငိုၼ်းထႆးၶိုၼ်ႈၵမ်းဢိတ်းဢိတ်း ၶိုၼ်ႈၵူႈဝၼ်း ၶၼ်ၶူဝ်းၵုၼ်ႇၵေႃႈ ၶိုၼ်ႈၸွမ်းလႄႈ ႁဵတ်းႁႂ်ႈ ၵူၼ်းၵႃႉ/ ၵူၼ်းၶၢႆ ဢိၵ်ႇ ၵူၼ်းပိုၼ်ႉတီႈ ႁူပ်ႉလွင်ႈယၢပ်ႇၽိုတ်ႇလိူဝ်ႁႅင်း။
ၼၢင်းႁွမ်ပဝ်း ၵူၼ်းၵႃႉလႄႈ ႁပ်ႉလႅၵ်ႈငိုၼ်း ၼႂ်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ ငိုၼ်းထႆးၶိုၼ်ႈၵူႈဝၼ်း၊ ၶူဝ်း ၵုၼ်ႇ ၵေႃႈၶိုၼ်ႈ ၵၢၼ်ငၢၼ်းၵေႃႈဢမ်ႇပဵၼ်။ ၵူၼ်းႁဵတ်းၵၢၼ်ပၢႆးမၢၵ်ႈမီးၶဝ် ႁူဝ်ပေႃးၶႆႈယဝ်ႉ” ဝႃႈၼႆ။
တေႃႈလဵဝ် ၶၼ်လႅၵ်ႈငိုၼ်းထႆး တင်း ငိုၼ်းမၢၼ်ႈ ၼႂ်းပိုၼ်ႉတီႈ ၸွမ်းလႅၼ်လိၼ်တႄႉ ငိုၼ်းမၢၼ်ႈ 1 သႅၼ်ပျႃး လႅၵ်ႈလႆႈ ငိုၼ်းထႆး 1,970 ဝၢတ်ႇ။ ငိုၼ်းထႆးသမ်ႉ (1 ဝၢတ်ႇ လႆႈငိုၼ်းမၢၼ်ႈ 50.76 ပျႃး) တေလႆႈဝႃႈၶၼ်ငိုၼ်းထႆးၽိူမ်ႉၶိုၼ်ႈထႅင်ႈ။
ၼၢင်းႁွမ်ပဝ်း လၢတ်ႈဝႃႈ “ ငိုၼ်းထႆးၼႆႉ ၶိုၼ်ႈမႃးႁႅင်းတႄႉ။ လႅပ်ႈတေသိုပ်ႇၶိုၼ်ႈထႅင်ႈယူႇ။ ႁဝ်းၶႃႈသမ်ႉ လႆႈသိုဝ်ႉၶူဝ်း ၵုၼ်ႇဝႆႉပဵၼ်ငိုၼ်းထႆး မႃးၶၢႆငိုၼ်းမၢၼ်ႈၼႆ ပဵၼ်ဢၼ်သုမ်းတႄႉတႄႉၶႃႈယဝ်ႉ” ဝႃႈၼႆ။
တႄႇဢဝ် လိူၼ်ဢေႃႊၵတ်ႊသ်မွၵ်ႈ ဝၼ်းတီႈ 20 မႃးၼႆႉ ငိုၼ်းထႆးၽိူမ်ႉၶိုၼ်ႈၵူႈဝၼ်း ဢမ်ႇၵွမ်ႉၵႃႈၵူၼ်းမိူင်းၵူၺ်း ၶႃႈႁၢပ်ႇၵၢၼ်ၶုၼ်ၵေႃႈယၢပ်ႇၽိုတ်ႇၸွမ်းႁၢဝ်ႈႁႅင်း။
ယိင်းမွၵ်ႇၵွၼ် ၽူႈႁၢပ်ႇၵၢၼ်လူင်ပွင်ၸိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ တီႈၼႆႈၼႆႉၸႂ်ႉငိုၼ်းထႆးၵူၺ်းၵူၺ်းၶႃႈၼႃႇ။ ငိုၼ်း လိူၼ်သမ်ႉ လႆႈတင်းငိုၼ်းမၢၼ်ႈ၊ လွင်ႈၼႆႉပဵၼ်ဢၼ်ယၢပ်ႇၽိုတ်ႇဝႆႉ။ တေႃႈလဵဝ် ၽၵ်းၵမ်ႇၸွၼ်း (ၽၵ်းဝုင်ႈ) ၼိုင်ႈမတ်ႉ လႂ် 20 ဝၢတ်ႇယဝ်ႉ။ မိူဝ်ႈၵူႈပွၵ်ႈ 1 မတ်ႉ 400 ပျႃး – 500 ပျႃး ၵႃႈၼႆႉၵူၺ်း တႃႇၵူၼ်းႁႃၸဝ်ႉ ၵိၼ်ၶမ်ႈယိင်ႈၶႅၼ်းယၢပ်ႇ ၽိုတ်ႇ” ဝႃႈၼႆ။
ၵူၼ်းၾင်ႇတႃႈၶီႈလဵၵ်းလႆႈၸႂ်ယႂ်ႇၶူဝ်းၶွင်ဢၼ်မိူင်းထႆးႁဵတ်းဢွၵ်ႇလႄႈ တူၺ်းၾၢႆႇလႂ်ၵေႃႈပဵၼ်ဢၼ်တုမ်ႉတိူဝ်ႉၵူၼ်းမိူင်း။ ၼွၵ်ႈလိူဝ်ၵူၼ်းႁဵတ်းၵၢၼ်မိူင်းထႆး ဢၼ်သူင်ႇငိုၼ်းမိူဝ်းတၢင်းႁိူၼ်းၵူၺ်းယဝ်ႉ လႅၵ်ႈငိုၼ်းမၢၼ်ႈလႆႈၼမ်။
ၼွၵ်ႈလိူဝ်ၶၼ်ငိုၼ်းထႆးယဝ်ႉ ယၢမ်းလဵဝ် ၶၼ်ၶမ်းၵေႃႈၶိုၼ်ႈ ၼိုင်ႈဝၢတ်ႇလႂ် တူၵ်းငိုၼ်းမၢၼ်ႈယူႇ 1,307,000 ပျႃး၊ ငိုၼ်း ၻေႃႊလိူဝ်ႊၵေႃႈၶိုၼ်ႈ 1 ၻေႃႊလိူဝ်ႊလႂ် 1,538 ပျႃး လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ