ၸၢႆးၼုမ်ႇပလၢတ်ႈတူၵ်း ၼမ်ႉႁွင်ႈ လွင်ႈၸွမ်းထိုင်တၢႆ

ၾူၼ်တူၵ်း ႁႃႇယႂ်ႇၼမ်ႉထူမ်ႈၼႂ်းပွၵ်ႉတီႈတႅမ်ႇ ၼႂ်းဝဵင်းတူၼ်ႈတီး ႁၢဝ်ႈႁႅင်း ၽူႈၸၢႆး ဢႃယု 17 ပီ ၵေႃႉၼိုင်ႈ လႆလွင်ႈ ၸွမ်းၼမ်ႉသေ လႆႈလူႉ တၢႆ ဝႃႈၼႆ။

ဝၼ်းတီႈ 4/9/2019 ၼၼ်ႉ ၽူႈၸၢႆး ဢႃယု 17 ပီ လႆလွင်ႈၸွမ်းၼမ်ႉၵႂႃႇ တီႈပွၵ်ႉလၢၼ်းမတေႃႇ ဝဵင်းတူၼ်ႈတီး ၸိုင်ႈတႆး ပွတ်းၸၢၼ်း ဝႃႈၼႆ။

ၽူႈၸၢႆး ဢၼ်လႆလွင်ႈၸွမ်းၼမ်ႉၼၼ်ႉ ၸိုဝ်ႈႁွင်ႉ ၶုၼ်ႇဢွင်ႇတဵင်း ၸုမ်းၸွႆႈထႅမ်ၵႂႃႇ ထူပ်းႁၼ်တူဝ်တၢႆမၼ်းၸၢႆး တီႈ ၼမ်ႉႁွင်ႈတၢင်းလူင်းၵႂႃႇဢေးတႃႇယႃႇ ယၢၼ်ၵႆဝဵင်းတူၼ်ႈတီးမွၵ်ႈ 7 – 10 လၵ်း။

ၸၢႆးၼေႇလိၼ်း ၵူၼ်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ ၼမ်ႉၼႆႉပဵၼ်ၼမ်ႉၼိူဝ်လွႆသေ လႆလူင်းမႃး ၼႂ်းႁွင်ႈႁၢဝ်ႈ ႁႅင်း။ မၼ်းၸၢႆးသမ်ႉပႆၸွမ်းၶၢင်ႈတၢင်း လူမ်ႇလူင်းလႆလွင်ႈ ၸွမ်းႁွင်ႈ။ တီႈဝဵင်းတူၼ်ႈတီးႁဝ်းၶႃႈၼႆႉ ယၢမ်းလဵဝ်ပေႃးၾူၼ် တူၵ်းၼမ်ႉထူမ်ႈႁႅင်းလိူဝ်မႃးပီၼိုင်ႈယဝ်ႉ ပီၼိုင်ႈ ထူမ်ႈၸွမ်းပွၵ်ႉ တီႈဢၼ် တႅမ်ႇ/ ၶူင်ႈ/ ယၢၼ်း ၸွမ်းၼႂ်းႁိူၼ်းယေး သူၼ် ၸိူဝ်းၼႆႉ” ဝႃႈၼႆ။

မတၢၼ်ႇတႃႇဢူး ၵူၼ်းပွၵ်ႉၺွင်ႇပိၼ်ႇတႃႇ တူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းပီၼႆႉ ၼမ်ႉထူမ်ႈႁိူၼ်းႁဝ်းၶႃႈ 2 ပွၵ်ႈယဝ်ႉ။ မိူဝ်ႈဝႃး – မိူဝ်ႈသိုၼ်းၼၼ်ႉ ၼမ်ႉထူမ်ႈၼႂ်းသူၼ်ႁဝ်း ထူမ်ႈသုင်မွၵ်ႈ 4 ထတ်း/ ပေႇၵႃႈၼႆႉ။ တေပဵင်း မွၵ်ႈဢူၵ်း” ဝႃႈၼႆ။

ၼမ်ႉၵႆႉထူမ်ႈၼႂ်းဝဵင်းတူၼ်ႈတီးၼႆႉ ပဵၼ်ယွၼ်ႉၼမ်ႉႁွင်ႈဢမ်ႇလႆလႆႈလီ။ ၵူၼ်းဢမ်ႇမီးမၢႆမီႈ ပႅတ်ႈယုၵ်းယၵ်းသႂ်ႇၼႂ်းႁွင်ႈ။ ႁဵတ်းႁႂ်ႈႁွင်ႈတိုၼ်ႈ/ ႁွင်ႈတၼ်။ လိူဝ်ၼၼ်ႉ ၵူၼ်းၸိူဝ်းယူႇႁိမ်းၼမ်ႉႁွင်ႈ ၸိူဝ်းၼၼ်ႉသမ်ႉ ႁဵတ်းႁူဝ်ႉ ၶၢမ်းၶဝ်ႈႁဵတ်းႁႂ်ႈ ၼမ်ႉႁွင်ႈၵႅပ်ႈ။ ၾူၼ်တူၵ်းမႃးၸိုင် ၼမ်ႉၵႆႉထူမ်ႈၸွမ်းပွၵ်ႉ ဢၼ်ပဵၼ်တီႈၶူင်ႈ/ယၢၼ်း ဝႃႈၼႆ။

မတၢၼ်ႇတႃႇဢူး လၢတ်ႈဝႃႈ “ပေႃးတူၺ်းၼႂ်းၽႅၼ်ႇတီႈတႄႉဝႃႈ မိူဝ်ႈၵူႈပွၵ်ႈ ၼမ်ႉႁွင်ႈၼႆႉ တေမီးတၢင်းၵႂၢင်ႈမွၵ်ႈ 20 – 30 ထတ်း။ ယၢမ်းလဵဝ်တႄႉ မီး 6-7 ထတ်းၵႃႈၼႆႉၵူၺ်း။ ယွၼ်ႉမၼ်းၵႅပ်ႈလႄႈ ပေႃးၾူၼ်မႃး ၼမ်ႉဢမ်ႇလႆလႆႈလီသေ ၸင်ႇ ပဵၼ်မႃးၼမ်ႉထူမ်ႈ” ဝႃႈၼႆ။

ၵူၼ်းတူၼ်ႈတီး တုၵ်းယွၼ်းဝႃႈ“ ႁွင်ႈၼမ်ႉလႆ ဢၼ်မီးၼႂ်းဝဵင်းတူၼ်ႈတီး တင်းမူတ်းၼႆႉ ႁႂ်ႈၶိုၼ်းမူၼ်ႉမႄးပၼ်ၶိုၼ်းလီ။ ယႃႇပေပႅတ်ႈယုၵ်းယၵ်းသႂ်ႇ၊ ယွၼ်ႉဝႃႈ ၼမ်ႉတေၵႂႃႇထူမ်ႈၸွမ်းပွၵ်ႉ ဢၼ်ပဵၼ်တီႈၶူင်ႈတီႈယၢၼ်းၸိူဝ်းၼၼ်ႉ”ဝႃႈၼႆ။

မိူဝ်ႈဝၼ်းတီႈ 18/8/2019 ၼၼ်ႉၵေႃႈ ယွၼ်ႉၾူၼ်တူၵ်း ၼမ်ႉထူမ်ႈဝဵင်းတူၼ်ႈတီးလႄႈ ၽူႈၸၢႆးဢႃယု 60 ပီ လႆႈလူႉတၢႆ ၸွမ်းၵေႃႉၼိုင်ႈ ဝႃႈၼႆ။