ၵူၼ်းမိူင်းသီႇပေႃႉ ဢၼ်ၺႃးၸုမ်းဢမ်ႇႁူႉၾၢႆႇယိုဝ်းသႂ်ႇမိူဝ်ႈဝၼ်းတီႈ 1 လိူၼ်ၼႆႉၼၼ်ႉ တေႃႇထိုင်ယၢမ်းလဵဝ် ပႆႇလႆႈ လူင်းႁူင်းယႃ တိုၵ်ႉသိုပ်ႇယူတ်းယႃတူဝ်ဝႆႉယူႇ တီႈႁူင်းယႃလူင်လႃႈသဵဝ်ႈ။
ၸၢႆးၸေႃးတိၵ ဢႃယု 54 ပီ ဢၼ်ၺႃးယိုဝ်းတီႈပွၵ်ႉၸၢင်ႈၶမ်းၸၢၼ်း ႁိမ်းဝတ်ႉမူၺ်ႇတေႃႇ ဝဵင်းသီႇပေႃႉၼၼ်ႉ မၢၵ်ႇ ၵွင်ႈၶဝ်ႈတီႈၶႃလူင် 3 ႁွႆးလႄႈ တီႈပဵမ်ႉ 1 ႁွႆး ၶဝ်ႈႁူင်းယႃၸဵမ်မိူဝ်ႈ 1/9/2019 ယၢမ်းၵၢင်ၶမ်ႈ 8 မူင်းၶိုင်ႈ တေႃႇထိုင် ဝၼ်း တီႈ 5/9/2019 မိူဝ်ႈၼႆႉ ပႆႇပဵၼ်လူင်းႁူင်းယႃ တိုၵ်ႉသိုပ်ႇယူတ်းယႃတူဝ်ယူႇ ဝႃႈၼႆ။
ၸၢႆးႁၢၼ်ႇ ႁူဝ်ပဝ်ႈၸုမ်းၵူၼ်းၼုမ်ႇတႆး ၸိုင်ႈတႆးပွတ်းႁွင်ႇ လၢတ်ႈတီႈၽူႈတွႆႇႁွၵ်ႈဝႃႈ “ ၶႃႈႁဝ်းၵႂႃႇသူႇၸႂ်း ပၼ်ႁႅင်းၸႂ် မၼ်းၸၢႆး တီႈႁူင်းယႃ လႃႈသဵဝ်ႈ။ မၼ်းၸၢႆးၸိုၼ်ႈၶႅၼ်းမႃးတၢင်းၼမ်ၶႃႈယဝ်ႉ။ ထႅင်ႈ 3-4 ဝၼ်းၼႆႉ တေလႆႈလူင်းႁူင်းယႃ ယဝ်ႉ မေႃယႃၶဝ်တႄႉ လၢတ်ႈၼႄၼင်ႇၼႆ။ မၼ်းၸၢႆးတိူဝ်ႉမၢၵ်ႇၵွင်ႈ တီႈငဝ်ႈၶႃလူင် 3 ႁွႆး၊ တီႈပဵမ်ႉ 1 ႁွႆး တင်းမူတ်း ပဵၼ် 4 ႁွႆး” ဝႃႈၼႆ။
မိူဝ်ႈဝၼ်းတီႈ 1/9/2019 ယၢမ်းၵၢင်ၶမ်ႈ 8 မူင်းၶိုင်ႈၼၼ်ႉ မီးၵူၼ်းၶီႇရူတ်ႉၶိူင်ႈမႃးၸွမ်းၵၼ် 2 ၵေႃႉ၊ ၵေႃႉၼိုင်ႈ ပႂ်ႉတီႈရူတ်ႉ ၶိူင်ႈဝႆႉ၊ ထႅင်ႈၵေႃႉၼိုင်ႈ လူင်းရူတ်ႉသေ ဢဝ်ၵွင်ႈယိုဝ်းသႂ်ႇၸၢႆးၸေႃႇတိၵ ဢၼ်တိုၵ်ႉၼင်ႈလဵတ်း မၢၵ်ႇၸႄႈတီႈႁိူၼ်း ဢူၺ်းၵေႃႉမၼ်း တီႈပွၵ်ႉၸၢင်ႈၶမ်းၸၢၼ်းၼၼ်ႉ။ ဝၢႆးယိုဝ်းယဝ်ႉ ၵူၼ်းႁၢႆႉၼၼ်ႉ ၼႅတ်ႈလႅၼ်ႈသွင်ႉပၢႆႈၵမ်းလဵဝ် မီးလွင်ႈ သင် လႄႈယိုဝ်း ၵူၼ်းယိုဝ်းပဵၼ်ၽႂ်ၵေႃႈ ဢမ်ႇလႆႈႁူႉၸွမ်း ၵူၼ်းပိုၼ်ႉတီႈ သီႇပေႃႉၵေႃႉၼိုင်ႈ လၢတ်ႈၼႄၼင်ႇၼႆ။
“ မိူင်းႁဝ်းၼႆႉ တေႃႈလဵဝ် ဢမ်ႇမီးလွင်ႈႁူမ်ႇလူမ်ႈသင်။ ၶႂ်ႈယိုဝ်းၵၼ်ၸိူင်ႉႁိုဝ်ၵေႃႈယိုဝ်း၊ ယိုဝ်းၵၼ်ငၢႆႈၼႃႇလူင်၊ ၵူၼ်းႁၢႆႉ ဢၼ်ယိုဝ်းၼၼ်ႉ ပလိၵ်ႈၶဝ်ဢမ်ႇတွၼ်ႉတီႉလႆႈတူဝ်သေပွၵ်ႈ။ လိူဝ်ၼၼ်ႉ ၵူၼ်းမိူင်းႁဝ်း ၸိူဝ်းသူႇသမ်းၵိၼ် ယႃႈမဝ်း ၵမ်ၵေႃႈၼမ်၊ ၵူၼ်းၶၢႆၵေႃႈၼမ်ၶႃႈယဝ်ႉ။ ၽူႈလၵ်ႉၵူၼ်းၸူၼ်ၵေႃႈၼမ်။ ပေႃးၵၢင်ၶမ်ႈၵၢင်ၶိုၼ်းမႃး ဢမ်ႇပေႃး ႁတ်းၵႂႃႇ ဢႅဝ်ႇလႄႇတၢင်းလႂ် မိူၼ်မိူဝ်ႈၵူႈပွၵ်ႈယဝ်ႉ” ဝႃႈၼႆ။
ၸၢႆးၸေႃးတိၵ ဢႃယု 54 ပီၼႆႉ ပဵၼ်ၵူၼ်းၸႃတိ ဝၢၼ်ႈတႃႈလူင် ၸိုဝ်ႈပေႃႈႁွင်ႉဝႃႈ လုင်းယွတ်ႈၸၢႆး မႄႈသမ်ႉ ပႃႈၸိုၼ်ႈ ဝႃႈၼႆ။
ၼႂ်းၸႄႈဝဵင်းသီႇပေႃႉၼႆႉ မီးၸုမ်းယိပ်းၵွင်ႈၵၢင်ႇတူင်ႉၼိုင်ၵႂႃႇမႃး မိူၼ်ၼင်ႇ တပ်ႉသိုၵ်းလူင်ပွင်ၸိုင်ႈမၢၼ်ႈ၊ ၸုမ်းပျီႇတူႉ ၸိတ်ႉလႄႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸဵမ်ၸိူဝ်းၼႆႉ။