ၸႄႈဝဵင်းလႃႈသဵဝ်ႈ တွၼ်ႈတၢင်းၸၢၼ်း ပွတ်းဢိူင်ႇၼမ်ႉပွင်ႈ ငဝ်းလၢႆးပႆႇၼိမ်သဝ်း ၵူၼ်းမိူင်းတိုၵ်ႉလႆႈမႆႈၸႂ်ဢမ်ႇႁတ်းၵႂႃႇ ၵၢတ်ႇၵႂႃႇသႃး ဝႃႈၼႆ။
ဝၼ်းတီႈ 4/9/2019 ဝၼ်းၵၢတ်ႇၼမ်ႉပွင်ႈ ၵူၼ်းမႃးၶဝ်ႈၵၢတ်ႇဢေႇ တပ်ႉသိုၵ်းလူင်ပွင်ၸိုင်ႈမၢၼ်ႈ ၶလယ 291 ယိုဝ်းၵွင်ႈ လူင်၊ ယိုဝ်းၵွင်ႈၵူႈၶမ်ႈ ၵူၼ်းမိူင်း ၼႂ်းဢိူင်ႇၼမ်ႉပွင်ႈ တူၵ်းၸႂ်/ လႆႈၵူဝ်ႁႄ/ ၾၢင်ႉယူႇတႃႇသေႇ ဝႃႈၼႆ။
“တႄႇၶဝ်ပဵၼ်ပၢင်တိုၵ်းၵၼ်မႃး တၢင်းၼမ်ႉပွင်ႈႁဝ်းၶႃႈၼႆႉ လႆႈငိၼ်းသဵင်ၵွင်ႈသဵင်မၢၵ်ႇတႅၵ်ႈၵူႈဝၼ်းၶႃႈယဝ်ႉ။ မိူဝ်ႈသွင် သၢမ်ဝၼ်းၼၼ်ႉ ၶဝ်ယိုဝ်းမၢၵ်ႇလူင်ၵႂႃႇတၢင်းလင်တပ်ႉၶဝ် တီႈႁူၺ်ႈၼဵင်ႈၼၼ်ႉ ၼိုင်ႈဝၼ်းလႂ် ဢမ်ႇယွမ်း 10 လုၵ်ႈ။ ၶၢဝ်းယၢမ်းၶဝ်ယိုဝ်းတႄႉ ၵၢင်ၶမ်ႈၵမ်းၼိုင်ႈလႄႈ ၵၢင်ၶိုၼ်းၵမ်းၼိုင်ႈ။ ၼႂ်း 1- 2 ဝၼ်းၼႆႉ ဢမ်ႇလႆႈငိၼ်းသဵင်ၵွင်ႈလူင် တႅၵ်ႈယဝ်ႉ လႆႈငိၼ်းသဵင်ၵွင်ႈဢွၼ်ႇၵူၺ်း ၶဝ်ယိုဝ်း” ၵူၼ်းၼမ်ႉပွင်ႈ သႅၼ်းဢႃယု 40 ၵေႃႉၼိုင်ႈ သိုပ်ႇလၢတ်ႈၼႄၼင်ႇ ၼႆ။
တေႃႈလဵဝ် တီႈဝတ်ႉဝေႇလုဝၼ်ႇ တင်း ဝတ်ႉၵၢင်ဝဵင်း ၼႂ်းထုင်ႉၼမ်ႉပွင်ႈၼၼ်ႉ ၼိုင်ႈဝတ်ႉလႂ် တိုၵ်ႉမီးၵူၼ်းငိူင်ႉပၢႆႈၽေး သိုၵ်း မွၵ်ႈ 20-30 ၵေႃႉတိုၵ်ႉမီးယူႇ ဝႃႈၼႆ။
ၵူၼ်းၼမ်ႉပွင်ႈ ၽူႈတူင်ႉၼိုင်တူင်ႇဝူင်းၵူၼ်း လၢတ်ႈတီႈၽူႈတွႆႇႁွၵ်ႈဝႃႈ “ တိုၵ်ႉမီးယူႇ မီး 20-30 ၵေႃႉ ၶႃႈၼႆ။ ပေႃးၵၢင် ဝၼ်းသမ်ႉ မႃးႁဵတ်းၵၢၼ် ပေႃးၵၢင်ၶမ်ႈသမ်ႉ ဢွၼ်ၵၼ်ၵႂႃႇၼွၼ်ႈတီႈဝတ်ႉ။ ၵမ်းၼမ် ပဵၼ်ၵူၼ်းဝၢၼ်ႈ ၸိူဝ်းယူႇ ၸမ် တပ်ႉ 291 ဝႃႈၼႆ။
ယၢမ်းလဵဝ် ရူတ်ႉၵႃး ၵႂႃႇမႃး တၢင်းတၢင်ႉယၢၼ်း – လႃႈသဵဝ်ႈ ၶိုၼ်ႈလူင်း မိူၼ်ၵဝ်ႇ။ ႁၢၼ်ႉၶၢႆၶူဝ်း ၼႂ်းထုင်ႉၼမ်ႉပွင်ႈ ၵေႃႈၶိုၼ်းပိုတ်ႇသေတႃႉ ၵူၼ်းၵႂႃႇမႃးသိုဝ်ႉၸၢႆႇတႄႉ ပႆႇမိူၼ်ၵဝ်ႇ လႆႈႁူႉၸွမ်းၼင်ႇၼႆ။
မိူဝ်ႈဝၼ်းတီႈ 28/8/2019 ယၢမ်းၵၢင်ၼႂ် မွၵ်ႈ 5 မူင်းၶိုင်ႈပၢႆၼၼ်ႉ ၸုမ်းဢူၺ်းလီ 3 ၸုမ်း သိုၵ်းတဢၢင်း TNLA၊ သိုၵ်းၶႄႇ ၵဝ်ႈၵၢင်ႉ MNDAA လႄႈ သိုၵ်းရၶႅင်ႇ AA ႁူမ်ႈၵၼ် ၶဝ်ႈယိုဝ်း တပ်ႉၶလယ 291 တီႈၼမ်ႉပွင်ႈ ဢၼ်မီးၾၢႆႇၸၢၼ်း ဝဵင်းလႃႈ သဵဝ်ႈ။ ၵူၼ်းမိူင်းႁိမ်း 700 ၵေႃႉ လႆႈပၢႆႈယၢၼ်ႁိူၼ်းယေးတီႈယူႇ။ ဝႃႈၼႆ။
ဝၼ်းတီႈ 15/8/2019 တင်ႈတႄႇ သိုၵ်းဢူၺ်းလီ 3 ၸုမ်း ၶဝ်ႈယိုဝ်း တပ်ႉသိုၵ်းလူင်ပွင်ၸိုင်ႈမၢၼ်ႈၸၼ်ႉၸွမ်သိုၵ်း DSTA ၶူဝ်ႁူၺ်ႈၵိုတ်ႈ ၸိူဝ်းၼႆႉယဝ်ႉ သွင်ၾၢႆႇ ပဵၼ်ပၢင်တိုၵ်းၵၼ်ႁၢဝ်ႈႁႅင်း၊ ၽႄႈလမ်း ၼႂ်းၸိုင်ႈတႆးပွတ်းႁွင်ႇ ၵႂႃႇလၢႆလၢႆဝဵင်း တေႃႇထိုင်ဝၼ်းမိူဝ်ႈၼႆႉ။ ၵူၼ်းမိူင်းလႆႈလူႉတၢႆ ယွၼ်ႉပၢင်တိုၵ်း ဢမ်ႇယွမ်း 17 ပၢႆ။ မၢတ်ႇၸဵပ်း ႁိမ်း 30 ၵေႃႉ။ ရူတ်ႉၵႃး/ ရူတ်ႉၶိူင်ႈ ၺႃးၽဝ် ဢမ်ႇယွမ်း 10 လမ်းယဝ်ႉ ဝႃႈၼႆ။