မၢၵ်ႇလူင်တူၵ်းသႂ်ႇၼႂ်းဝၢၼ်ႈ ၵူၼ်းၵူတ်ႉၶၢႆလႆႈလူႉတၢႆ 5 ၵေႃႉၼၼ်ႉ ၸုမ်း ယိပ်းၵွင်ႈၵၢင်ႇတၢင်း 2 ၾၢႆႇၵုမ်ႇၼႄးၵၼ် ဢမ်ႇယွမ်းႁပ်ႉဝႃႈ ပဵၼ်မၢၵ်ႇၽႂ်။
မၢၵ်ႇလူင်တူၵ်းသႂ်ႇၼႂ်းဝၢၼ်ႈ ဝၢၼ်ႈမေႃႇႁဵၵ်ႇ ၸႄႈဝဵင်းၵူတ်ႉၶၢႆ ၸိုင်ႈတႆး ပွတ်းႁွင်ႇ မိူဝ်ႈဝၼ်းတီႈ 31/8/2019 ယၢမ်းၵၢင်ၼႂ် 9 မူင်းၼၼ်ႉ ၵူၼ်းဝၢၼ်ႈလႆႈလူႉတၢႆ 5 ၵေႃႉ။ ႁွင်ႈၵၢၼ်ၾၢႆႇပိုၼ်ၽၢဝ်ႇတပ်ႉသိုၵ်းလူင်ပွင်ၸိုင်ႈမၢၼ်ႈ ဢွၵ်ႇၶေႃႈပိုၼ် ၽၢဝ်ႇဝႃႈ ပဵၼ်ၼမ်ႉမိုဝ်းၸုမ်းဢူၺ်းလီ 3 ၸုမ်း ပွႆႇသႂ်ႇ ဝႃႈၼႆ။
ယူႇတီႈၸုမ်းဢူၺ်းလီ 3 ၸုမ်းၵေႃႈ ပိုၼ်ၽၢဝ်ႇဝႆႉဝႃႈ “မိူဝ်ႈဝၼ်းတီႈ 31/8/2019 ယၢမ်းၵၢင်ၼႂ် 9 မူင်း 11 မိၼိတ်ႉၼၼ်ႉ ငဝ်ႈငုၼ်း တပ်ႉၵွင်ၶဝ် 2 တီႈၺႃးယိုဝ်း။ မၢၵ်ႇလူင်ဢၼ်ၼၼ်ႉ ပူၼ်ႉၵႂႃႇတူၵ်းသႂ်ႇတီႈဝၢၼ်ႈမေႃႇႁဵၵ်ႇ တႅၵ်ႇတိူဝ်ႉသႂ်ႇၼၢင်း ယိင်း တင်းလုၵ်ႈဢွၼ်ႇလႆႈလူႉတၢႆ 5 ၵေႃႉ မၢတ်ႇၸဵပ်း 3 ၵေႃႉ”ဝႃႈၼႆ။
ႁွင်ႈၵၢၼ်ပိုၼ်ၽၢဝ်ႇ တပ်ႉသိုၵ်းတဢၢင်းၵေႃႈ ပိုၼ်ၽၢဝ်ႇဢွၵ်ႇဝႆႉ မိူဝ်ႈဝၼ်းတီႈ 2/9/2019 ၼႆႉဝႃႈ “တပ်ႉသိုၵ်းမၢၼ်ႈ ၶလရ 241 ၵူတ်ႉၶၢႆ မၢၵ်ႇသႅၼ်း မမ 122 ယိုဝ်းသႂ်ႇၼႂ်းဝၢၼ်ႈ မေႃႇႁဵၵ်ႇ တႅၵ်ႇတိူဝ်ႉသႂ်ႇ ၵူၼ်းဝၢၼ်ႈလႆႈလူႉတၢႆၵႂႃႇ 5 ၵေႃႉ” ဝႃႈၼႆ။
ဢူးၸေႃႇထေး ၽူႈၶၢၼ်ပၢၵ်ႇ လုမ်းလူင်ပွင်ၸိုင်ႈ မိူင်းႁူမ်ႈတုမ် သပ်းၸႅင်ႈၶၢဝ်ႇမိူဝ်ႈ 31/8/2019 ဝႃႈ “ သင်တူၺ်းတီႈမၢၵ်ႇ ၼၼ်ႉၵေႃႈႁူႉ လႆႈယဝ်ႉ ဝႃႈပဵၼ်ၶွင်ၸုမ်းလႂ်ယိုဝ်း။ ၶႅပ်းႁၢင်ႈ၊ ဝီႊတီႊဢူဝ်ႊၵေႃႈမီးဝႆႉယူႇ။ ပေႃးတူၺ်းၸိုင် ႁူႉလႆႈၵမ်းလဵဝ် ဝႃႈ ပဵၼ်ၸုမ်း လႂ် ပွႆႇသႂ်ႇ/ ယိုဝ်းဢၼ်ဝႃႈၼၼ်ႉ” ဝႃႈၼႆ။
Dr. ၺဵဝ်ႇထုၼ်းဢွင်ႇ ၵႅမ်ၽူႈၵွၼ်းသိုၵ်း AA ရၶႅင်ႇ တွပ်ႇလၢတ်ႈတီႈၽူႈသိုဝ်ႇၶၢဝ်ႇ တီႈၵဵင်းတုင် မိူဝ်ႈဝၼ်းတီႈ 31/8/2019 ၼၼ်ႉဝႃႈ “ ႁဝ်းၶႃႈ ဢမ်ႇႁဵတ်းႁႂ်ႈၵူၼ်းမိူင်းလႆႈယၢပ်ႇၽိုတ်ႇ။ ၼႂ်းၸႄႈမိူင်းရၶႅင်ႇၼႆၵေႃႈ ပဵၼ်ၵူၼ်းၸၢဝ်းရၶႅင်ႇ။ တဢၢင်း ၼႆၵေႃႈ ပဵၼ်ၵူၼ်းၸၢဝ်းတဢၢင်း။ ၶၢင်ၵေႃႈ ပဵၼ်ၸၢဝ်းၶၢင်။ ၸုမ်းသိုၵ်းႁဝ်းၶႃႈၼႆႉ ႁဝ်းၶႃႈဢမ်ႇၶႃႈႁႅမ်ၶိူဝ်းၵူၼ်း ႁဝ်းၶႃႈ ၶိုၼ်းလေႃႇ” ဝႃႈၼႆ။
ယူႇတီႈၸုမ်း ၵၢၼ်ၵူၼ်းတေႃႇၵူၼ်း ၸွႆႈထႅမ်ၵၼ်ၼၼ်ႉ ပိုၼ်ၽၢဝ်ႇဢွၵ်ႇဝႆႉဝႃႈ “ ပဵၼ်ပၢင်တိုၵ်းလႄႈ ၵူၼ်းမိူင်းလႆႈလူႉတၢႆ မၢတ်ႇၸဵပ်းၸွမ်း တင်းၼမ်။ ယွၼ်ႉၼၼ် တပ်ႉသိုၵ်းတင်းသွင် ၾၢႆႇတၵ်းတေလႆႈႁပ်ႉပုၼ်ႈၽွၼ်း ပၼ်ၶိုၼ်း” ဝႃႈၼႆ။
မၢၵ်ႇဢၼ်မႃးတူၵ်းၼႂ်းဝၢၼ်ႈ ၵူၼ်းမိူင်းတၢႆမၢတ်ႇ ယွၼ်ႉၼႆႉ သိုၵ်းၾၢႆႇလႂ်ၵေႃႈ ဝႃႈဢမ်ႇၸႂ်ႈ ၶွင်ၶဝ်ၼႆတႄႉ ပဵၼ်မၢၵ်ႇဢမ်ႇ မီးၸဝ်ႈႁိုဝ် ၼႆၵူၼ်းမိူင်းၵူတ်ႉၶၢႆ မီးၶေႃႈထၢမ်ဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ