ၵူၼ်းမိူင်းလႆႈလူႉတၢႆ၊ မၢတ်ႇၸဵပ်း ၸွမ်းၼႂ်းပၢင်တိုၵ်းပွတ်းႁွင်ႇၼၼ်ႉ ၸုမ်းတူင်ႇဝူင်းၵူၼ်း ၸိုင်ႈတႆးပွတ်းႁွင်ႇ တုၵ်းယွၼ်း ဝႃႈ ႁႂ်ႈတပ်ႉသိုၵ်းလူင်ပွင်ၸိုင်ႈမၢၼ်ႈလႄႈ ၸုမ်းဢူၺ်းလီ 3 ၸုမ်း ဢဝ်ပုၼ်ႈၽွၼ်းတူၺ်းလူၶိုၼ်း ဝႃႈၼႆ။
တႄႇဢဝ်ဝၼ်းတီႈ 15/8/2019 ၼႆႉမႃး တပ်ႉသိုၵ်းလူင်ပွင်ၸိုင်ႈမၢၼ်ႈ တင်း ၸုမ်းဢူၺ်းလီ 3 ၸုမ်း ပိုတ်းယိုဝ်းၵၼ် ႁၢဝ်ႈ ႁႅင်း ၼႂ်းၸိုင်ႈတႆးပွတ်းႁွင်ႇသေ တုမ်ႉတိူဝ်ႉၵူၼ်းမိူင်း လႆႈလူႉတၢႆၸွမ်းမွၵ်ႈ 17 ၵေႃႉ လႄႈ မၢတ်ႇၸဵပ်း မွၵ်ႈ 30 ၵေႃႉ။ ၵဵဝ်ႇ လူၺ်ႈလွင်ႈၼႆႉ ၸုမ်းယိပ်းၵွင်ႈၵၢင်ႇ တၢင်းသွင်ၾၢႆႇ တၵ်းလႆႈဢဝ်ပုၼ်ႈၽွၼ်း ပၼ်ၶိုၼ်း ဝႃႈၼႆ။
ဢူးႁွင်းတွင်ႇ ၽူႈၶၢၼ်ပၢၵ်ႇ ၸုမ်းၸွႆႈထႅမ် ၵၢၼ်ၵူၼ်းတေႃႇၵူၼ်း လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းမိူင်းဢၼ်လႆႈလူႉတၢႆ ၼႂ်းပၢင်တိုၵ်းၼႆႉ တေမီးမွၵ်ႈ 20 ၵေႃႉ။ ဢၼ်ႁဝ်းၶႃႈ ယိုၼ်းထိုင်လႆႈသေ ၵဵပ်းၶေႃႈမုလ်းလႆႈၼၼ်ႉ မီးမွၵ်ႈ 17 ၵေႃႉ။ ဢၼ်လႆႈမၢတ်ႇၸဵပ်းသမ်ႉ မွၵ်ႈ 30 ၵေႃႉ။ ဢၼ်ပဵၼ်ပၢင်တိုၵ်းယူႇတေႃႈလဵဝ်ၼႆႉ မၼ်းတုမ်ႉတိူဝ်ႉၵူၼ်းမိူင်းၼမ်တႄႉ။ ၵႃးၵေႃႈ ၺႃးၾႆးၽဝ်။ ႁဝ်းၶႃႈၶႂ်ႈတိုၵ်းသူၼ်ဝႃႈတႄႉ တပ်ႉသိုၵ်းတၢင်းသွင်ၾၢႆႇၼႆႉ လူဝ်ႇလႆႈၾၢင်ႉ၊ ပိုတ်းယိုဝ်းၵၼ်ယႃႇႁႂ်ႈ တုမ်ႉတိူဝ်ႉၵူၼ်းမိူင်း” ဝႃႈၼႆ။
ၵဵဝ်ႇလူၺ်ႈလွင်ႈၼႆႉ ၸုမ်းၸွႆႈထႅမ်ၵူၼ်းတေႃႇၵူၼ်းဢွၵ်ႇၶေႃႈ ပိုၼ်ၽၢဝ်ႇတုၵ်းယွၼ်းဝႃႈ “ ပၢင်တိုၵ်းဢၼ်ပဵၼ်ယူႇၼႆႉ မၼ်း တုမ်ႉတိူဝ်ႉၵူၼ်းမိူင်းလႆႈလူႉသုမ်းတႄႉတႄႉ။ တွၼ်ႈတႃႇတေၵေႃႇတင်ႈၶိုၼ်းၽဝႃႉ မၼ်းလမ်ႇလွင်ႈ။ ဢၼ်ၸုမ်း ယိပ်းၵွင်ႈၵၢင်ႇ 2 ၸုမ်း ၽၢမ်းႁဵတ်းပၢင်တိုၵ်းပွမ်သေ ယိုဝ်းၵႃႈဝႃႈ ၵႃႈပဵၼ်သေ တုမ်ႉတိူဝ်ႉၵူၼ်းမိူင်းၼၼ်ႉ ၶဝ်တၢင်းသွင် တၵ်းလႆႈဢဝ်ပုၼ်ႈၽွၼ်းပၼ်ၶိုၼ်းၵူၼ်းမိူင်း။ ပိူင်လူင်ယႃႇႁႂ်ႈပဵၼ်ပၢင်တိုၵ်းၵၼ်ႁိမ်းၸမ် ဝၢၼ်ႈၵူၼ်း ၸဵမ်ၸိူဝ်းၼႆႉ”။
ဢူးႁွင်းတွင်ႇ လၢတ်ႈဝႃႈ “ လွင်ႈၽဝ်ရူတ်ႉၵႃး ၵူၼ်းမိူင်းၼိူဝ်သဵၼ်ႈတၢင်းမိူင်းႁူမ်ႈတုမ် ၵူတ်ႉၶၢႆ – မူႇၸေႊၼၼ်ႉ ၵိုတ်း ယိုတ်း ပၼ်ၵမ်းလဵဝ်။ ဢၼ်ယိုဝ်းၸဝ်ႈၵႃး ၸိူဝ်းၼႆႉ ယႃႇႁႂ်ႈလႆႈမီးထႅင်ႈ ၸဵမ်ၸိူဝ်းၼႆႉ”ဝႃႈၼႆ။
ၸၢႆးၼေႃႇသႅင် ၵေႃႁူမ်ႈသၢင်ႈၵူၼ်းၼုမ်ႇတႆး TYN လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈႁဝ်းၶႃႈ ၶႂ်ႈတုၵ်းယွၼ်းထိုင်တႄႉ မိူဝ်ႈၽွင်းပဵၼ်ပၢင်တိုၵ်းၵၼ်ယူႇၼၼ်ႉ ယႃႇပေပွႆႇမၢၵ်ႇလူင် ၶဝ်ႈၼႂ်းဝၢၼ်ႈၵူၼ်း။ သင်ဝႃႈ ပဵၼ်ပၢင်တိုၵ်းၵႂႃႇၸိုင် ၸုမ်း ဢၼ်ပွႆႇမၢၵ်ႇသႂ်ႇၼၼ်ႉ တေလႆႈဢဝ်ပုၼ်ႈၽွၼ်း ႁႂ်ႈတပ်ႉသိုၵ်းတင်းသွင်ၾၢႆႇ သၢႆႈတႅၼ်းၶိုၼ်း ၸွမ်းၼင်ႇၵႃႈၶၼ် ၶူဝ်းၶွင် ၵူၼ်းမိူင်းဢၼ်လႆႈလူႉသုမ်း” ဝႃႈၼႆ။
မိူဝ်ႈဝၼ်းတီႈ 31/8/2019 ယွၼ်ႉသိုၵ်းလူင်ပွင်ၸိုင်ႈမၢၼ်ႈလႄႈ ၸုမ်းဢူၺ်းလီ 3 ၸုမ်းပဵၼ်ပၢင်တိုၵ်းၵၼ်သေ မၢၵ်ႇလူင် တူၵ်းသႂ်ႇၵူၼ်းဝၢၼ်ႈမေႃႇႁဵၵ်ႇ ၵူၼ်းဝၢၼ်ႈလႆႈလူႉတၢႆ 5 ၵေႃႉ။ ၼႂ်း 5 ၵေႃႉၼၼ်ႉ ပႃးၼၢင်းယိင်း၊ လုၵ်ႈ ဢွၼ်ႇလႅင်လႄႈ လုၵ်ႈဢွၼ်ႇ ၸဵမ်ၸိူဝ်းၼႆႉ။
