ပၢင်တိုၵ်းယဵၼ်ယဝ်ႉၵေႃႈ ၵူၼ်းမိူင်းပၢႆႈၽေးသိုၵ်းပႆႇႁတ်းပွၵ်ႈႁိူၼ်း

ၵူၼ်းမိူင်း ၼႂ်းဢိူင်ႇၼမ်ႉပွင်ႈ ၵမ်ႈၽွင်ႈ ပႆႇႁတ်းပွၵ်ႈႁိူၼ်း ယင်းတိုၵ်ႉမႆႈၸႂ် ၵူဝ်ပဵၼ်ပၢင်တိုၵ်းထႅင်ႈယူႇ ဝႃႈၼႆ။

တႄႇဢဝ်ဝၼ်းတီႈ 28/8/2019 ၼႆႉမႃး တၢင်းဢိူင်ႇၼမ်ႉပွင်ႈ ၸႄႈဝဵင်းလႃႈသဵဝ်ႈ ယူႇတီႈၸုမ်းဢူၺ်းလီ 3 ၸုမ်း ႁူမ်ႈၵၼ် ယိုဝ်းတပ်ႉၶလယ 291 သေ သွင်ၾၢႆႇလႆႈပဵၼ်ပၢင်တိုၵ်းၵၼ်မႃးတေႃႇထိုင် ဝၼ်းမိူဝ်ႈၼႆႉ ၵူၼ်းဝၢၼ်ႈၼႂ်းဢိူင်ႇၼမ်ႉပွင်ႈ ၵမ်ႈၽွင်ႈ ပႆႇႁတ်းပွၵ်ႈႁိူၼ်း ၵူဝ်ပဵၼ်ပၢင်တိုၵ်းထႅင်ႈ ဝႃႈၼႆ။

ၵူၼ်းၼမ်ႉပွင်ႈ ၵေႃႉၼိုင်ႈ ဢႃယုမွၵ်ႈ 40 ပၢႆ လၢတ်ႈတီႈၽူႈတွႆႇႁွၵ်ႈဝႃႈ “ တၢင်းၼမ်ႉပွင်ႈႁဝ်းၶႃႈတႄႉ ပၢင်တိုၵ်းယဵၼ်ယူႇ သေတႃႉၵေႃႈ ၵူၼ်းဝၢၼ်ႈ ဢၼ်ႁိူၼ်းယူႇႁိမ်းၸမ်တပ်ႉ 291 ၼၼ်ႉ ပႆႇႁတ်းပွၵ်ႈႁိူၼ်းၶိုၼ်းၶႃႈ တိုၵ်ႉမီးယူႇတီႈဝတ်ႉ ၵၢင် ဝဵင်းလႄႈ ဝတ်ႉဝေႇလုဝၼ်ႇ ၼိုင်ႈတီႈလႂ် မွၵ်ႈ 40-50 ၵေႃႉၼႆႉၶႃႈ။ လိူဝ်ၼၼ်ႉတီႈဝတ်ႉႁူမ်ႈယဵၼ်လႃႈသဵဝ်ႈၵေႃႈ တိုၵ်ႉ မီးယူႇ 60 ပၢႆ ပဵၼ်ၵူၼ်းဝၢၼ်ႈၵုင်းပဝ်းၶႃႈ” ဝႃႈၼႆ။

ဢိင်ၼိူဝ်လွင်ႈပဵၼ်ပၢင်တိုၵ်းၵၼ်ၼႆႉသေ တပ်ႉမ 99 ၽိူမ်ႉႁႅင်းသိုၵ်း တူင်ႉၼိုင်ၵႂႃႇတၢင်းဝၢၼ်ႈၵုင်းပဝ်း ၶိုၼ်ႈၵႂႃႇတၢင်း ဝၢၼ်ႈပၢင်ႇထႅင်ႈ ဝႃႈၼႆ။

“မိူဝ်ႈၼႆႉ ဝၼ်းတီႈ 2/9/2019 တိုၵ်ႉလႆႈငိၼ်းသဵင်ၵွင်ႈတႅၵ်ႇၾၢႆႇလဵဝ်ယူႇ။ သိုၵ်းမၢၼ်ႈတပ်ႉမ 99 တႄႉ တိုၵ်ႉၽိူမ်ႉႁႅင်း သိုၵ်းၵႂႃႇတၢင်း ဝၢၼ်ႈၵုင်းပဝ်း ဝၢၼ်ႈပၢင်ႇထႅင်ႈ လႆႈငိၼ်းဝႃႈ မီးသိုၵ်းတဢၢင်း မူၵ်းယူႇဝႆႉ တၢင်းပွတ်းၼၼ်ႉ”ၵူၼ်း ပိုၼ်ႉတီႈ လၢတ်ႈၼႄၼင်ႇၼႆ။

တေႃႈလဵဝ် သဵၼ်ႈတၢင်း တၢင်ႉယၢၼ်း – လႃႈသဵဝ်ႈတႄႉ ရူတ်ႉၵႃး ၵူၼ်းၵႂႃႇမႃး မိူၼ်ၵဝ်ႇၶိုၼ်းယဝ်ႉ။ ၵူၼ်းဝၢၼ်ႈ တၢင်းပွတ်း ၼမ်ႉပွင်ႈၵေႃႈ ဢွၼ်ၵၼ်ပိုတ်ႇႁၢၼ်ႉၶၢႆၶွင်ၶိုၼ်းမိူၼ်ၵဝ်ႇယူႇ ဝႃႈၼႆ။

ၵူၼ်းၼမ်ႉပွင်ႈ လၢတ်ႈဝႃႈ “ လွင်ႈၵူၼ်းၵႂႃႇမႃးတၢင်းၼမ်ႉပွင်ႈတႄႉ ၵႂႃႇမႃးမိူၼ်ၵဝ်ႇယဝ်ႉ။ ႁၢၼ်ႉၶၢႆၶူဝ်းၵေႃႈ ပိုတ်ႇၶိုၼ်း ယဝ်ႉ။ ၵူၺ်းၵႃႈ ဢမ်ႇပေႃးမီးၵူၼ်းၼမ်ၵႃႈႁိုဝ်။ ရူတ်ႉၵႃးဢၼ်လႅၼ်ႈတၢင်း တၢင်ႉယၢၼ်း – လႃႈသဵဝ်ႈ ၵေႃႈ ၵႂႃႇမႃး မိူၼ် ၵဝ်ႇယူႇ” ဝႃႈၼႆ။

မိူဝ်ႈဝၼ်းတီႈ 31/8/2019 ၼၼ်ႉ သိုၵ်းမၢၼ်ႈ တပ်ႉၶလယ 291 ၼႆႉ ယိုဝ်းမၢၵ်ႇလူင် ၵႂႃႇတၢင်းလင်တပ်ႉၶဝ် တီႈႁူၺ်ႈၼဵင်ႈ ဢမ်ႇယွမ်း 13-14 ၵမ်း။ ပဵၼ်လွင်ႈယိုဝ်းၾၢႆႇလဵဝ်ၵူၺ်း ၵူၼ်းပိုၼ်ႉတီႈၼမ်ႉပွင်ႈ လၢတ်ႈၼႄၼင်ႇၼႆ။

ဝၼ်းတီႈ 31/8/2019 ဝၼ်းဢၼ်ၽူႈၼမ်း 2 ၾၢႆႇ ဢုပ်ႇၵၼ်တီႈၵဵင်းတုင်ၼၼ်ႉ မၢၵ်ႇလူင်တူၵ်းတႅၵ်ႇသႂ်ႇၼႂ်းဝၢၼ်ႈမေႃႇ ႁဵၵ်ႇ၊ ၸႄႈဝဵင်းၵူတ်ႉၶၢႆ တိူဝ်ႉသႂ်ႇၵူၼ်းဝၢၼ်ႈတၢႆ 5 ၵေႃႉ ပႃးလုၵ်ႈဢွၼ်ႇ 2 ၵေႃႉ။