ၶူးသွၼ်ၵေႃတႆး ဢၼ်ၺႃးသိုၵ်းတီႉဝႆႉတီႈပၢင်ႁူႈၼၼ်ႉ ၵေႃႉၼွင်ႉဢမ်ႇယူႇလီ

ၶူးသွၼ် ၸၢႆးၶုၼ်မိူင်းလႄႈ ၸၢႆးလႅင်းၸိုၼ်ႈသွင်ပီႈၼွင်ႉ ဢၼ်ၺႃးသိုၵ်းလူင်ပွင်ၸိုင်ႈၸီႉၼႄးဝႃႈ ၵဵဝ်ႇၶွင်ႈတင်းၸုမ်းမႃးယိုဝ်းၸၼ်ႉၸွမ်ပၢႆးၸၢၵ်ႈသိုၵ်း DSTA ပၢင်ႁူႈၼၼ်ႉၼႆသေ တီႉၺွပ်းယဵတ်ႈၶွၵ်ႈ ဝႆႉၼၼ်ႉ ၵေႃႉၼွင်ႉ ပၢႆးယူႇလီဢမ်ႇပေႃးၶႅမ်ႉဝႃႈၼႆ။

ဝၼ်းတီႈ 2/9/2019 ဝၼ်းမိူဝ်ႈၼႆႉ ၾၢႆႇပလိၵ်ႈမၢၼ်ႈ ဢဝ် ၶႃပီႈၼွင်ႉ ၶိုၼ်ႈလုမ်းတြႃး ၼႆလႄႈ ပေႃႈမႄႈ ပီႈၼွင်ႉလႄႈၵူၼ်းၼုမ်ႇဢူၺ်းၵေႃႈဢူၺ်းသႄႈ ၵႂႃႇႁူပ်ႉထူပ်းတီႈ တပ်ႉပလိၵ်ႈၸေႈဝဵင်း။

ၸၢႆးၼုမ်ႇ ၵူၼ်းၼုမ်ႇပၢင်ႁူႈ လၢတ်ႈတီႈၽူႈတွႆႇႁွၵ်ႈဝႃႈ – မိူဝ်ႈၼႆႉလႆႈႁူပ်ႉၶႃမိူဝ်ႈၶၢဝ်းယၢမ်းၵၢင်ဝၼ်း 1 မူင်း ၼႆႉလႆႈႁူပ်ႉထူပ်း ဢုပ်ႇၵုမ်ၵၼ် တၢင်း ၼႃႈပလိၵ်ႈဢေႃႈ။ ၶဝ်တဵင်ဝႆႉႁႂ်ႈဢုပ်ႇ ၵၼ်တၢင်းၵႂၢမ်းမၢၼ်ႈၵူၺ်း။ ဢမ်ႇလႆႈဢုပ်ႇၵၼ်တၢင်းၵႂၢမ်းတႆး။ ၶူးသွၼ်ၸၢႆးလႅင်းၸိုၼ်ႈၼၼ်ႉ ဢမ်ႇယူႇလီ  ပဵၼ်လိူင်ဝႆႉ  မီးမွၵ်ႈၼိုင်ႈ ဝူင်ႈယဝ်ႉၼႆဝႃႇ။   လႆႈၵိၼ်ယႃႈယႃ တႆးဝႆႉၼႆဢေႃႈ– ဝႃႈၼႆ။

တေႃႇထိုင်ယၢမ်းလဵဝ် ပေႃႈမႄႈပီႈၼွင်ႉလႄႈဢူၺ်းၵေႃႈ ၵႂႃႇပႂ်ႉတီႈလုမ်းတြႃးပလိၵ်ႈ ယွၼ်ႉဝႃႈ ၽူႈတၢင်ၼႃႈ (သျေႉၼေႇ) ပႆႇႁွတ်ႈထိုင်လႄႈ  ၸဝ်ႈၼႃႈတီႈပႆႇဢဝ် ၶႃပီႈၼွင်ႉ  ဢွၵ်ႇမႃး- ဝႃႈၼႆ။

ယူႇတီႈပလိၵ်ႈမၢၼ်ႈ တေၸွႆးတြႃး ဢဝ်လိူင်ႈၶႃပီႈၼွင်ႉ လူၺ်ႈၶေႃႈႁႃမၢႆမီႈဢၼ်လႂ်ၼႆ ထိုင်ယၢမ်းလဵဝ်ပေႃႈ မႄႈၶဝ်ယင်းပႆႇလႆႈႁူႉ ၼႆ ၵူၼ်းၼုမ်ႇ ပၢင်ႁူႈလၢတ်ႈ။

ၶူးသွၼ်သွင်ပီႈၼွင်ႉၼႆႉ ပဵၼ်ၶူးသွၼ်တီႈ ႁူင်းႁဵၼ်းၵေႃတႆး ။ ၺႃးတီႉမိူဝ်ႈဝၼ်းတီႈ 17/8/2019 ။  ၵူတ်ႇထတ်းႁၼ် ၸၢၵ်ႈလၢတ်ႈလႄႈ ၽႃႈတီႈၼွၼ်း ဢၼ်မီးလၢႆးမိူၼ်လၢႆးသိုၵ်းၼႆလႄႈ ၼႄးဝႃႈၵဵဝ်ႇၶွင်ႈၵၼ်တင်း ၸုမ်းသိုၵ်း ဢၼ်ၶဝ်ႈလူမ်ႈယိုဝ်းၸၼ်ႉၸွမ်သိုၵ်း DSTA ပၢင်ႇႁူႈ မိူဝ်ႈဝၼ်းတီႈ 15/8/2019 ၼၼ်ႉ ဝႃႈၼႆ။