တႆးႁွတ်ႈၵဵင်းမႂ်ႇ ႁူမ်ႈၵၼ်တႆႈတဵၼ်း ယွၼ်းႁႂ်ႈ မေႃသွၼ် 2 ပီႈၼွင်ႉ ဢၼ်သိုၵ်းလူင်ပွင်ၸိုင်ႈမၢၼ်ႈ ၵုမ်းၶင်တူဝ်ဝႆႉၼၼ်ႉ ႁႂ်ႈၸဵဝ်းပွႆႇပၼ် တိူင်ႇၵၢဝ်ႇႁႂ်ႈၸိုင်ႈတႆးၵတ်းယဵၼ် ဝႃႈၼႆ။

ဝၼ်းတီႈ 29/8/2019 ယၢမ်းၵၢင်ၶမ်ႈ မွၵ်ႈ 8 မူင်း ၸုမ်းၼုမ်ႇႁၢႆးၸၢႆးယိင်းတႆး ၼႂ်းဝဵင်းၵဵင်းမႂ်ႇ ႁူမ်ႈၵၼ်တႆႈတဵၼ်းၶၢဝ်း ၵၢင် ဝႃႇသႃ ဝၼ်းလိူၼ်ၵဝ်ႈလပ်းလႄႈ ယွၼ်းသူးသူင်ႇမဵတ်ႉတႃႇထိုင် ၵူၼ်းမိူင်းဢၼ်လႆႈထူပ်းၽေးသိုၵ်း ၼႂ်းၸိုင်ႈတႆး ပွတ်း ႁွင်ႇ လႄႈ ၶူးသွၼ်တႆး 2 ၵေႃႉ ဢၼ်ထုၵ်ႇၺႃးတီႉၺွပ်းၵုမ်းၶင်တူဝ်ဝႆႉၼၼ်ႉ ႁႂ်ႈၵတ်းယဵၼ်၊ ၸဵဝ်းပူၼ်ႉၽေးၶဵၼ်။ ပၢင် ၼႆႉ ၸတ်းႁဵတ်းတီႈ ဝတ်ႉပႃႇပဝ်ႈ ဢိူင်ႇသီၽုမ်း ၸႄႈဝဵင်းၵဵင်မႂ်ႇ ၸိုင်ႈထႆး။

ၸၢႆးၸွမ်လႅင်း ၶူးသွၼ်တီႈ ပၢင်သွၼ်လိၵ်ႈတႆးဝတ်ႉပႃႇပဝ်ႈ/ ၽူႈဢွၼ်ႁူဝ်ၸတ်းႁဵတ်း ပၢင်တႆႈတဵၼ်း လၢတ်ႈ တီႈၽူႈတွႆႇ ႁွၵ်ႈဝႃႈ “ လွင်ႈၼႆႉ တေပဵၼ်ပၢႆးဝူၼ်ႉၵူၼ်းၼုမ်ႇ သႅၼ်းႁုၼ်ႈမႂ်ႇႁဝ်း တီႈလႆႈမႃးတူၵ်းယူႇမိူင်းၵႆၼႆႉသေ ၼင်ႇႁိုဝ် ႁဝ်းၶႃႈ ပေႃးတေႁၵ်ႉၾိင်ႈႁိတ်ႈႁွႆး ထုင်းႁဝ်းသေ ပေႃးၶၢဝ်းၵၢင်ဝႃႇၼႆ ႁဝ်းၶႃႈ ဢွၼ်ၵၼ်တႆႈတဵၼ်းႁဵင်မႃးၵူႈပီ။ လိူဝ်ၼၼ်ႉ ယိူင်း ၸူးထိုင် ႁႂ်ႈပေႃႈမႄႈၵူၼ်းမိူင်းႁဝ်း တီႈဢၼ်တူၵ်း တၢင်းယၢပ်ႇၽိုတ်ႇယူႇ ၼႂ်းမိူင်းတႆးပွတ်း ႁွင်ႇ ၵူႈတီႈတီႈ လႆႈလွတ်ႈ ၽေးၵၼ်” ဝႃႈၼႆ။

သိုပ်ႇလၢတ်ႈဝႃႈ “ၼွၵ်ႈလိူဝ်ၼၼ်ႉ ယိူင်းၸူးထိုင်ပၼ်မေႃသွၼ် ၽူႈသိုပ်ႇသၢႆၸႂ်ၸိူဝ်ႉၶိူဝ်းႁဝ်း 2 ၵေႃႉပီႈၼွင်ႉ ႁႂ်ႈလွတ်ႈ ၽေးၶဵၼ် ၸဵဝ်းပူၼ်ႉဢွၵ်ႇလွတ်ႈမႃး၊ ႁဝ်းၶႃး ၸိူဝ်းယူႇတီႈၵႆ ပဵၼ်ဢၼ်တိူဝ်ႉၸႂ်လႄႈ ၶေႃးၶူမ်ၸွမ်းၶႃႈယဝ်ႉ ၵွပ်ႈပိူဝ်ႈၼႆ လႄႈ ႁဝ်းၶႃႈ ဢွၼ်ၵၼ် ယွၼ်းသူးသေ ႁွင်ႉၽဵင်းၵႂၢမ်းသူင်ႇႁႅင်းၸႂ်ထိုင် ” ဝႃႈၼႆ။

ပၢင်တႆႈတဵၼ်းႁဵင် ၶၢဝ်းၵၢင်ဝႃႇ လိူၼ်ၵဝ်ႈလပ်း တီႈဝတ်ႉပႃႇပဝ်ႈ ဢိူင်ႇသီၽုမ်း ၸႄႈဝဵင်းၵဵင်းမႆႇၼႆႉ ဢွၼ်ႇႁၢႆးၸၢႆးယိင်းတႆး ႁူမ်ႈၵၼ်တႆႈတဵၼ်းႁဵင် ၶၢဝ်းၵၢင်ဝႃႇမႃးၵူႈပီ၊ ပီၼႆႉဢွၼ်ႇႁၢႆးၸၢႆးယိင်းတႆး ၶဝ်ႈႁူမ်ႈ ႁိမ်း 50 ပၢႆ။

ဝၼ်းတီႈ 17/8/2019 ပူၼ်ႉမႃးၼႆႉ ၾၢႆႇႁူမ်ႇလူမ်ႈသိုၵ်း ၸယၽ လူင်ပွင်ၸိုင်ႈ ၼေႇပျီႇတေႃႇ တီႉၺွပ်းၼုမ်ႇတႆး သွင်ပီႈ ၼွင်ႉ မၢပ်ႇၼႄးဝႃႈ ၵဵဝ်ႇၶွင်ႈၵၼ်တင်း ၸုမ်းဢူၺ်းလီသိုၵ်း သၢမ်ၸုမ်း ဢၼ်လူမ်ႇယိုဝ်း ၸၼ်ႉၸွမ်သိုၵ်း DSTA တီႈဝဵင်း ပၢင်ႁူႈ။

မိူဝ်ႈ 15/8/2019 ယၢမ်းၵၢင်ၼႂ် 5 မူင်း ၸုမ်းဢူၺ်းလီသိုၵ်း 3 ၸုမ်း – သိုၵ်းၶႄႇၵဝ်ႈၵၢင်ႉ MNDAA ၊ သိုၵ်းလွႆတ ဢၢင်း TNLA တင်း သိုၵ်းရၶႅင်ႇ AA ႁူမ်ႈၵၼ် လူမ်ႇယိုဝ်း ၸၼ်ႉၸွမ်သိုၵ်းၾၢႆႇပၢႆးၸၢၵ်ႈ DSTA လၢၼ်ႇၵူတ်ႇထတ်းယႃႈမဝ်းၵမ်၊ လၢၼ်ႇႁူဝ်ၵိုတ်ႈ၊ ၶူဝ်ႁူၺ်ႈၵိုတ်ႈ ၸိူဝ်းၼၼ်ႉ မိူဝ်ႈလဵဝ် ၵၼ် 5 တီႈ၊ ပႃးၵူၼ်းမိူင်းၵေႃႉၼိုင်ႈ တင်း သိုၵ်းမၢၼ်ႈ၊ ပလိၵ်ႈ မၢၼ်ႈ ႁူမ်ႈတင်းမူတ်း တၢႆ 14 ၵေႃႉ ။

ၾၢႆႇသိုၵ်းလူင်ပွင်ၸိုင်ႈမၢၼ်ႈၵေႃႈ ထႅမ်ႁႅင်းသိုၵ်း ႁဵတ်းပၢင်တိုၵ်းတေႃႇၸုမ်းဢူၺ်းလီ 3 ၸုမ်း ၼႂ်းၸႄႈဝဵင်း ၼမ်ႉၶမ်း၊ မူႇၸေႊ၊ ၵူတ်ႉၶၢႆ ၊ သႅၼ်ဝီ၊ ၵုၼ်လူင် တင်း လႃႈသဵဝ်ႈ ၸိူဝ်းၼႆႉလႄႈ ၵူၼ်းမိူင်း 7,000 ပၢႆ ၺႃးၽေးသိုၵ်း လႆႈပၢႆႈယၢၼ် ႁိူၼ်းယေးတီႈယူႇ။