မိူဝ်ႈၼႆႉ ဝၼ်းတီႈ 30/8/2019 ယၢမ်းၵၢင်ၼႂ် 6 မူင်း ၸုမ်းဢူၺ်းလီ 3 ၸုမ်း တင်း တပ်ႉသိုၵ်းလူင်ပွင်ၸိုင်ႈမၢၼ်ႈ ပဵၼ်ပၢင် တိုၵ်းၵၼ် တၢင်းဢွၵ်ႇဝၢၼ်ႈပၢင်ၽၢတ်ႇ ဢိူင်ႇမိူင်းလီ ၸႄႈဝဵင်းသႅၼ်ဝီ ၸိုင်ႈတႆးပွတ်းႁွင်ႇ၊ ရူတ်ႉၵႃး 3 လမ်းလႄႈ ရူတ်ႉ ၶိူင်ႈလမ်းၼိုင်ႈ ၺႃးၽဝ်။

ၸဝ်ႈၵႃး ဢၼ်ႁၼ်သိုဝ်ႈၼႃႈတၼ်းတႃ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ 6 မူင်း ပဵၼ်ပၢင်တိုၵ်းၵၼ် တီႈတၢင်းဝၢၼ်ႈ ပၢင်ၽၢတ်ႇ။ ယဝ်ႉၵေႃႈ ၽဝ်ပႅတ်ႈၵႃး မၢၼ်ႇလူင်လမ်းၼိုင်ႈလႄႈ ရူတ်ႉၶိူင်ႈလမ်းၼိုင်ႈ။ လိုပ်ႈၵူၼ်း လူင်းၵႃးသဵင်ႈသဵင်ႈသေ ၽဝ်ပႅတ်ႈၵႃး” ဝႃႈၼႆ။

ၸၢႆးဢူးၶမ်း ၽူႈတႅၼ်းသၽႃးၵူၼ်းမိူင်း ၸႄႈဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ တေႃႇထိုင်ယၢမ်းၵၢင်ၼႂ် 9 မူင်းပၢႆ ၵႃးၵူၼ်းမိူင်းၺႃးၽဝ်ၵႂႃႇ 3 လမ်း။ ယဝ်ႉၵေႃႈ ရူတ်ႉၶိူင်ႈၼိုင်ႈလမ်း” ဝႃႈၼႆ။

ၵူၼ်းၵႂႃႇတႃႈပႆတၢင်းလႄႈ ၵူၼ်းၼႂ်းပိုၼ်ႉတီႈလၢတ်ႈဝႃႈ “ ဢၼ်ၽဝ်ၵႃးၼၼ်ႉ ၼုင်ႈၶူဝ်းၸုမ်းသိုၵ်းဢူၺ်းလီ ဝႃႈၼႆသေ တႃႉ”။ ၽူႈတွႆႇႁွၵ်ႈတႄႉ ပႆႇၸၢင်ႈယိုၼ်ယၼ်လႆႈ။

မိူဝ်ႈဝႃး ဝၼ်းတီႈ 29/8/2019 ယၢမ်းၵၢင်ၶမ်ႈ 7 မူင်းၼၼ်ႉၵေႃႈ ၵႃးလမ်းၼိုင်ႈ ၺႃးၾႆးၽဝ် တီႈၼမ်ႉၵူတ်ႉ ၸႄႈဝဵင်းၵူတ်ႉ ၶၢႆ။ ထိုင်မႃး ယၢမ်းၵၢင်ဝၼ်း 11 မူင်းသမ်ႉ ၵႃးလူင် 12 လေႃႉ ၺႃးၾႆးၽဝ် တီႈသူႉၶိၼ်းတႃႇ ၵူတ်ႉၶၢႆ ထႅင်ႈလမ်းၼိုင်ႈ။

ဝၼ်းတီႈ 28/8/2019 ၼၼ်ႉ ၸုမ်းဢူၺ်းလီ သၢမ်ၸုမ်း ဢွၵ်ႇလိၵ်ႈပိုၼ်ၽၢဝ်ႇဝႆႉဝႃႈ ၵူၼ်းမိူင်းၾၢင်ႉယႃႇၵႂႃႇတႃႈပႆတၢင်း ၼႂ်းၵႄႈပၢင်တိုၵ်း ၵူဝ်မီးၽေး ဝႃႈၼႆဝႆႉ။