သိုၵ်းလူင်ပွင်ၸိုင်ႈမၢၼ်ႈ ၶလယ 68 ယူႇၼႂ်းဝတ်ႉသေ ယိုဝ်းမၢၵ်ႇလူင် သႂ်ႇၵူၼ်းဝၢၼ်ႈၵုင်းသႃႇ ၸႄႈဝဵင်းလႃႈသဵဝ်ႈ တိူဝ်ႉ သႂ်ႇလုင်းဢေးၵေႃႉပဵၼ်ပေႃႈၸဝ်ႈသၢင်ႇဢွၼ်ႇလူႉတၢႆၵႂႃႇၼၼ်ႉ တုၵ်းယွၼ်းႁႂ်ႈပဵၼ်လွင်ႈမၢၼ်ႇမႅၼ်ႈပဵၼ်ထမ်း တႃႇၵူၼ်း ၵိုတ်းတၢင်းလင် ဝႃႈၼႆ။
မိူဝ်ႈၼႆႉ ဝၼ်းတီႈ 29/8/2019 ယူႇတီႈၵဝ်ႉငဝ်ႈသုၼ်ႇလႆၵူၼ်း ၸိုင်ႈတႆး SHRF ဢွၵ်ႇၽိုၼ်တၢမ်းငဝ်းလၢႆး ဢိင်ၼိူဝ် သိုၵ်း လူင်ပွင်ၸိုင်ႈမၢၼ်ႈ တင်း ၸုမ်းဢူၺ်းလီ 3 ၸုမ်း ပဵၼ်ပၢင်တိုၵ်းၵၼ် ၼႂ်းၸိုင်ႈတႆးပွတ်းႁွင်ႇသေ ယူႇတီႈသိုၵ်းလူင်ပွင် ၸိုင်ႈမၢၼ်ႈ ဢဝ်မၢၵ်ႇလူင်ပွႆႇသႂ်ႇ ၸွမ်းႁိူၼ်းယေးၵူၼ်းဝၢၼ်ႈ တိူဝ်ႉၺႃးလုင်းဢေး ဢႃယု 50 ပီပၢႆ (ပေႃႈၸဝ်ႈသၢင်ႇဢွၼ်ႇ ၸၼ်တႃဝရ) ၼႂ်းဝၢၼ်ႈၵုင်း သႃႇ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ လႆႈလူႉတၢႆထင်တီႈၵေႃႉၼိုင်ႈ ဝႃႈၼႆ။
ၸၢႆးႁေႃသႅင် ၽူႈၶၢၼ်ပၢၵ်ႇ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး SHRF လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ ၶႂ်ႈတုၵ်းယွၼ်း လွင်ႈပဵၼ်ထမ်း တႃႇၼႃႈႁိူၼ်း လုင်းဢေး ၵေႃႉဢၼ်လႆႈၺႃးၸၢၵ်ႇမၢၵ်ႇ တၢႆၵႂႃႇၼၼ်ႉ။ ၵွပ်ႈဝႃႈ တၢင်းၼွင်ႈတၢင်းလင် ၵိုတ်းဝႆႉၼၢင်းမေးလႄႈ လုၵ်ႈဢွၼ်ႇၶဝ် ဢၼ်ယင်းပႆႇပေႉတူဝ်ပေႉႁၢင်ႈ သင်ၼၼ်ႉယဝ်ႉ။ လူင်ပွင်ၸိုင်ႈ ထုၵ်ႇလႆႈၸွႆႈ တူၺ်းလွမ်လုမ်းလႃးၼႃႈႁိူၼ်းၶဝ် လႄႈၵူၼ်းဝၢၼ်ႈၸိူဝ်းၶူဝ်းၶွင်ႁိူၼ်းယေးလူႉလႅဝ်ပႃးၼၼ်ႉသေပၼ်တၢမ်ႇသိုၵ်း မၢၼ်ႈ ၸိူဝ်းပူၼ်ႉပႅၼ်ၼၼ်ႉ” ဝႃႈၼႆ။
ၼႂ်းၽိုၼ်တၢမ်းငဝ်းလၢႆး SHRF ဢွၵ်ႇဝႆႉဝႃႈ “ သိုၵ်းမၢၼ်ႈၶလယ 68 မွၵ်ႈ 50 ၵေႃႉ ဢၼ်ၸဝ်ႈႁၢၼ် ဢွင်ႇၵျီးဢွၼ်ႁူဝ် ၶဝ်ႈၵႂႃႇ ပၵ်းလိုဝ်ႈသဝ်းၼႂ်းဝတ်ႉ/ၵျွင်း တီႈဢၼ်ၵူၼ်းဝၢၼ်ႈ ဢွၼ်ၵၼ်ပၢႆႈမႃးပိုင်ႈႁူမ်ႈလိုဝ်ႈသဝ်းယူႇၼၼ်ႉယဝ်ႉ။ ၽွင်း ၶၢဝ်းယၢမ်း မွၵ်ႈ 6 မူင်းႁူဝ်ၶမ်ႈသိုၵ်းမၢၼ်ႈၸုမ်းၼၼ်ႉ တႄႇယိုဝ်းမၢၵ်ႇ 60 mm ၶဝ်ၶဝ်ႈၼႂ်း ဝၢၼ်ႈၵုင်းသႃႇ”ဝႃႈၼႆ။
မၢၵ်ႇလုၵ်ႈၼိုင်ႈတူၵ်းႁိမ်း လုင်းဢေး ဢႃယု 52 ပီ ၸၢၵ်ႇမၢၵ်ႇ ၽူင်ႉသႂ်ႇတီႈၼႃႈဢူၵ်းမၼ်းၸၢႆးသေ လႆႈလူႉတၢႆ ထင်တီႈ။ ထိုင်မႃး ထႅင်ႈဝၼ်းၼိုင်ႈ ယူႇတီႈၸုမ်းတူင်ႇဝူင်း ၵူၼ်းလႃႈသဵဝ်ႈ လႆႈၵႂႃႇဢဝ်ၶၢပ်ႈတူဝ်တၢႆမၼ်းၸၢႆး မႃးတီႈႁူင်းယႃလႃႈ သဵဝ်ႈသေ လုမ်းလႃးပူၼ်ႉၶၢပ်ႈတူဝ်တီႈၼၼ်ႈ ဝႃႈၼႆ။
ၸၢႆးႁေႃသႅင် လၢတ်ႈဝႃႈ “ လွင်ႈမႃးတင်ႈ ပၢင်သဝ်းၼႂ်းဝတ်ႉ/ၵျွင်းသေယိုဝ်းလူင်ၵႂႃႇ ၵူႈႁူး ၵူႈတၢင်း ယိုဝ်းၶဝ်ႈ ၼႂ်းဝၢၼ်ႈ ၵူၼ်းမိူင်းယူႇသဝ်းႁဵတ်းႁႂ်ႈႁိူၼ်းၵူၼ်းမီးလွင်ႈလူႉၵွႆၸွမ်းၸိူဝ်းၼႆႉ မၼ်းပူၼ်ႉ ပႅၼ်ပိူင်သိုၵ်းတႄႉတႄႉ။ ၵွပ်ႈၼၼ် ၶႂ်ႈ တုၵ်းယွၼ်းပၼ်လွင်ႈပဵၼ်ထမ်း တႃႇၵူၼ်းဝၢၼ်ႈ ၸိူဝ်းၺႃးၸၢၵ်ႇ မၼ်းၸွမ်း” ဝႃႈၼႆ။
လုင်းဢေးၼႆႉ ပဵၼ်ၵူၼ်းဝၢၼ်ႈၸဝ်ႈၼႃးၵေႃႉၼိုင်ႈ။ တၢင်းၼွင်ႈတၢင်းလင် ၵိုတ်းဝႆႉၵေႃႉပဵၼ်ၼၢင်းမေးမၼ်း ၼၢင်းၵဵင် လႄႈ လုၵ်ႈၽႃၽႄၶဝ်သွင်ၵေႃႉဢၼ်ဢႃယုၸင်ႇႁႃလႆႈ 13 ၶူပ်ႇ၊ လုၵ်ႈၸၢႆးမၼ်း ၸၢႆးၸၢမ်ႇပုၼ်ႉ ၸဝ်ႈသၢင်ႇၸၼ်တႃဝရ (ၵေႃႉပဵၼ်ၸဝ်ႈသၢင်ႇ ယူႇတီႈ ဝတ်ႉ/ၵျွင်းၵုင်းသႃႇ) လႄႈလုၵ်ႈယိင်းမၼ်း ၼၢင်းၸၢမ်ၺူဝ်ႇ။
“လိူဝ်ၼၼ်ႉယင်း ပူၼ်ႉပႅၼ်ပႃး ၶေႃႈတူၵ်းလူင်း ဢၼ်ပႃးၼႂ်း ၶေႃႈလူင်းလၢႆးမိုဝ်းၵိုတ်းယိုဝ်းတူဝ်ႈမိူင်း NCA ဢၼ်ပႃးဝႆႉ ၼႂ်းတွၼ်ႈၵၼ် ႁူမ်ႇလူမ်ႈၵူၼ်းမိူင်း ဢၼ်ဝႃႈ သိုၵ်းၸုမ်းလႂ်တၵ်းတေလႆႈငိူင်ႉဝႄႈလွင်ႈ ယႃႉလူႉလႅဝ် ၶူဝ်းၶွင်ၵူၼ်းမိူင်း လႄႈ တၵ်းလႆႈငိူင်ႉဝႄႈလွင်ႈဢဝ် ႁူင်းႁဵၼ်း၊ ႁူင်းယႃ၊ ဢွင်ႈပၼ်ယႃ၊ ဢွင်ႈတီႈၵိူဝ်းယမ် သႃသၼႃ ဝတ်ႉဝႃးၽႃသိူဝ်ႇ ၸိူဝ်း ၼႆႉ ပဵၼ်တီႈတင်ႈပၢင်သဝ်းသိုၵ်း” ၸၢႆးႁေႃသႅင် လၢတ်ႈၼႄၼင်ႇၼႆ။
မိူဝ်ႈဝၼ်းတီႈ 19/8/2019 ၼၼ်ႉ ၽွင်းသိုၵ်းလူင်ပွင်ၸိုင်ႈမၢၼ်ႈ ၶလယ 68 ဢွၵ်ႇဝၢၼ်ႈၵုင်းသႃႇၵႂႃႇၼၼ်ႉ ႁွင်ႉဢဝ် တင်း ၽူႈၵွၼ်းဢိူင်ႇ (ဢုၵ်ႉၵထ) ၵႂႃႇၸွမ်းသူင်ႇတၢင်းၶဝ်သေလၢတ်ႈတီႈ ၽူႈၵွၼ်းဝၢၼ်ႈဝႃႈ ပေႃးၶၢဝ်ႇလိူင်ႈမိူဝ်ႈ ၶမ်ႈဝႃးဢွၵ်ႇၵႂႃႇ တႄႉ တေလႆႈဢုပ်ႇၵၼ်တင်းသူထႅင်ႈ ၼႂ်းၽိုၼ်တၢမ်းငဝ်းလၢႆး SHRF ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ