သိုၵ်းလူင်ပွင်ၸိုင်ႈမၢၼ်ႈ ပိုတ်ႇၼႃႈသိုၵ်းၽိူမ်ႉႁႅင်းလိုပ်ႈတိုၵ်းၸုမ်းဢူၺ်းလီ 3 ၸုမ်း ၶူဝ်ၼႃးတီးဝူင်ႈၵၢင်ၵုၼ်လူင် – သႅၼ်လီ ၵူၼ်ႇပင်းၵူၼ်းမိူင်းဢမ်ႇၸၢင်ႈၵႂႃႇမႃးၵႃႉၶၢႆ ၵူၼ်းပိုၼ်ႉတီႈၵေႃႈႁူပ်ႉတၢင်းယၢပ်ႇဝႆႉ ဝႃႈၼႆ။

ဝၼ်းတီႈ 28/8/2019 ၶူဝ်ၼႃးတီး ဢၼ်မီးဝူင်ႈၵၢင် သႅၼ်ဝီ – ၵုၼ်လူင်ၼႆႉ ၺႃးမၢၵ်ႇၵၢင်ပွႆႇလူႉၵွႆၵူၼ်ႇပင်းၵႂႃႇလႄႈ ရူတ်ႉ ၵႃး တၢင်ႇၵုၼ်ႇ/ တေႃႉၵူၼ်း ၵႃးလူင်၊ ၵႃးဢွၼ်ႇ ဢမ်ႇၸၢင်ႈၵႂႃႇမႃး တၢင်းၵုၼ်လူင်ၵေႃႈ မႃးၽႅဝ်တီႈၶူဝ်ၼႃးတီႈသေ ပွၵ်ႈ ၶိုၼ်း။ ၵႃးဢၼ်လုၵ်ႉတၢင်း သႅၼ်ဝီ ၶိုၼ်ႈၵုၼ်လူင်ၼၼ်ႉၵေႃႈ ၽႅဝ်တီႈၶူဝ်ၼႃးတီးသေ လႆႈပွၵ်ႈၶိုၼ်း ဝႃႈၼႆ။

ပႃႈပီး ၵူၼ်းၵႃႉ သႅၼ်ဝီ ၼမ်ႉၸလၢပ်ႈ သႅၼ်ဝီ လၢတ်ႈဝႃႈ “ တီႈသႅၼ်ဝီ – ၼမ်ႉၸလၢပ်ႈၼႆႉ ၵူႈပွၵ်ႈၶဝ်ႈသၢၼ် ႞ ထူင် 35,000 ပျႃး – 38,000 ပျႃး တေႃႈလဵဝ် ၶိုၼ်ႈထိုင် 45,000 ပျႃး တီႈၵုၼ်လူင်ႁူဝ်ပၢင်ႇ ႞ ထူင် ႞ သႅၼ် ဢမ်ႇမီးၵူၼ်းၶၢႆယဝ်ႉၶႃႈ။ မိူၼ်ၼင်ႇ ယႃႈႁူဝ်ၶႆႈ ၵူႈပွၵ်ႈ ႞ ဢႅပ်ႇ 500 ပျႃး တေႃႈလဵဝ် 1,200 ပျႃး ၶႃႈၼႃႇ” ဝႃႈၼႆ။

ၼႂ်းၵႄႈသႅၼ်ဝီ – ၵုၼ်လူင် ၶူဝ်ဢုတ်ႇယၢဝ်း 10 ထတ်း၊ 10 ထတ်းပၢႆ – 20 ထတ်း ၸိူဝ်းၼႆႉ မီးလၢႆတီႈ၊ ၶူဝ်ၼႃးတီးၼႆႉ ၺႃးယႃႉလၢႆၵမ်း ဢမ်ႇၵွႆ၊ ဢမ်ႇမီးၸုမ်းဢဝ်ႁူမ်ႇလူမ်ႈပၼ်တႄႉတႄႉလႄႈ ၶူဝ်ၼႃးတီးၸင်ႇၺႃးယႃႉၵွႆ ဝႃႈၼႆ။

ၸၢႆးဢူးၶမ်း ၽူႈတႅၼ်းသၽႃးၵူၼ်းမိူင်း ၸႄႈဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “ ၶူဝ်တီႈၼႃးတီးၼႆႉ ၶဝ်ယႃႉၸဵမ် မိူဝ်ႈသိုၼ်း ယၢမ်းၵၢင်ၶမ်ႈၼၼ်ႉ ၶဝ်ယႃႉဢမ်ႇၵွႆၵမ်းလဵဝ်လႄႈ သိုပ်ႇယႃႉထႅင်ႈ ထိုင်မိူဝ်ႈဝႃး ၵၢင်ၼႂ်ၸဝ်ႉ ၸင်ႇၵွႆ” ဝႃႈၼႆ။

ဝၢႆးသိုၵ်းဢူၺ်းလီ 3 ၸုမ်း ၶဝ်ႈလူမ်ႇယိုဝ်းတီႈၸၼ်ႉၸွမ်သိုၵ်း DSTA တီႈပၢင်ႁူႈ(မေႇမဵဝ်ႉ) လႄႈ ၼႂ်းၸႄႈဝဵင်းၼွင်ၶဵဝ် လူမ်ႇယႃႉပႃး ၶူဝ်ႁူၺ်ႈၵိုတ်ႈသေ ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ ၽိူမ်ႉႁႅင်းသိုၵ်း ၶိုၼ်ႈၸူးၸိုင်ႈတႆးပွတ်းႁွင်ႇထႅင်ႈ။ သွင်ၾၢႆႇပဵၼ် ပၢင်တိုၵ်းၵၼ် ႁၢဝ်ႈႁႅင်း တေႃႇထိုင်ဝၼ်းမိူဝ်ႈၼႆႉ သဵၼ်ႈတၢင်းဝဵင်းလိူဝ်ႇ – မူႇၸေႊ တၼ်းပိၵ်ႉ ဢမ်ႇၸၢင်ႈ ၵႂႃႇမႃး။ သႅၼ်ဝီ ၵုၼ်လူင် ႁူဝ်ပၢင်ႇ ဝဵင်းၼမ်ႉၽႃ (သျိင်ႊသူၺ်ႇႁေႃႇ) ၵေႃႈၶူဝ်ၶၢတ်ႇ/ ၵွႆ ဢမ်ႇၸၢင်ႈၵႂႃႇမႃး ၵူၼ်းၵႃႉၶၢႆသၢႆ ၼၼ်ႉ ႁူပ်ႉတၢင်း ယၢပ်ႇ။

ၸၢႆးထုၼ်းဝိၼ်း ၽူႈတႅၼ်းသၽႃး ၸႄႈမိူင်းၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ တႃႇ တေၵႄႈလိတ်ႈၵၼ်ၼႆႉ လူဝ်ႇလႆႈမီးပၢင်ဢုပ်ႇဢူဝ်းၵၢၼ်မိူင်း၊ ပေႃးဢမ်ႇၵႄႈလိတ်ႈတင်းၵၢၼ်မိူင်းလႆႈ ဝၢၼ်ႈမိူင်းတေ ဢမ်ႇၼိမ်သဝ်း။ ပၢင်တိုၵ်းသိုၵ်းသိူဝ်တေလိူင်ႇ။ ၵွပ်ႈၼၼ် ပိူင်လူင်မၼ်း တၵ်းလႆႈမူၼ်ႉမႄးပိူင်ပိုင်းလၵ်းမိူင်း 2008။ ပေႃးတိုၵ်ႉတႅမ်ႈလၵ်းမိူင်း ဢၼ်မီးလွင်ႈၽဵင်ႇပဵင်း ၵူႈၸၢဝ်းၶိူဝ်းတႄႉ ပၼ်ႁႃၸိူဝ်းၼႆႉ တေဢမ်ႇၵိူတ်ႇၶိုၼ်ႈ” ဝႃႈၼႆ။