ၾၢႆႇၸၢၼ်းဝဵင်းလႃႈသဵဝ်ႈ တၢင်းထုင်ႉၼမ်ႉပွင်ႈၼၼ်ႉ သိုၵ်းလူင်ပွင်ၸိုင်ႈမၢၼ်ႈ တင်းၸုမ်းဢူၺ်းလီ 3 ၸုမ်း သိုပ်ႇပဵၼ် ပၢင်တိုၵ်း ၵူၼ်းဝၢၼ်ႈလႆႈပၢႆႈမႃးတီႈဝတ်ႉသႃသၼႃႁူမ်ႈယဵၼ် လႃႈသဵဝ်ႈ။

ဝၼ်းတီႈ 29/8/2019 ယၢမ်းၵၢင်ၼႂ် 9:10 မူင်း ထိုင် 10:00 မူင်း သိုၵ်းလူင်ပွင်ၸိုင်ႈမၢၼ်ႈ ၶယလ 291 တင်း တပ်ႉ မ 99 ႁူမ်ႈၵၼ်သေ လမ်းလိုပ်ႈလေႃႇတိုၵ်း ၸုမ်းဢူၺ်းလီ 3 ၸုမ်း ထုင်ႉၸဵင်ႇႁွင်ႇဝၼ်းဢွၵ်ႇၼမ်ႉပွင်ႈ တီႈႁူၺ်ႈၼဵင်ႈ ဝၢၼ်ႈ ၵုင်းပဝ်း ႁဵတ်းႁႂ်ႈၵူၼ်းဝၢၼ်ႈလႆႈပၢႆႈယၢၼ်ႁိူၼ်းယေးတီႈယူႇ။

ၵူၼ်းမိူင်းပိုၼ်ႉတီႈ ၽူႈၸၢႆး ဢႃယု မွၵ်ႈ 40 ပၢႆ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ မိူဝ်ႈၼႆႉ သဵင်ၵွင်ႈတႅၵ်ႇထႅင်ႈၶႃႈ။ တၢင်းပွတ်းဝၢၼ်ႈၵုင်းပဝ်း။ တေႃႈလဵဝ် ၵူၼ်းဝၢၼ်ႈၵုင်းပဝ်ႈ လႆႈပၢႆႈၵႂႃႇသွၼ်ႈဝႆႉတီႈဝတ်ႉသႃသၼႃႁူမ်ႈယဵၼ်ဝႆႉ။ ပၢင်တိုၵ်း ဢၼ်ၶဝ်ပဵၼ်ၵၼ် မိူဝ်ႈၼႆႉ တေပဵၼ်တၢင်းၾၢႆႇလင်တပ်ႉ ၶယလ 291 ၼၼ်ႉၶႃႈ မိူဝ်ႈၵူႈပွၵ်ႈႁဝ်းၶႃႈ ႁွင်ႉဝႃႈ ႁူၺ်ႈၼဵင်ႈ ၼႆၶႃႈ တီႈၼၼ်ႈ” ဝႃႈၼႆ။

“မိူဝ်ႈၼႆႉ 29/8/2019 သဵၼ်ႈတၢင်း တၢင်ႉယၢၼ်း – လႃႈသဵဝ်ႈ လႆႈပိၵ်ႉၵိုတ်းၵႂႃႇၵမ်းၼိုင်ႈ။ တေႃႈလဵဝ်ၵႂႃႇမႃးၶိုၼ်း မိူၼ်ၵဝ်ႇ ၼႆ သေတႃႉ ပၢင်တိုၵ်းတိုၵ်ႉယဵၼ်ၵႂႃႇ 10 မူင်းပၢႆၵူၼ်းမိူင်း တိုၵ်ႉၵူဝ်ႁႄဢမ်ႇႁတ်းၵႂႃႇလႂ်။ ငဝ်းလၢႆးၼႂ်းၼမ်ႉပွင်ႈၵေႃႈ ဢွၼ် ၵၼ်ပိၵ်ႉၽၵ်းတူႁိူၼ်းၽႂ်မၼ်းသေ မူၵ်းႁိူၼ်းယူႇၼႆၵူၺ်းၶႃႈ” ၵူၼ်းမိူင်းပိုၼ်ႉတီႈၼမ်ႉပွင်ႈတႄႉ လၢတ်ႈၼႄၼင်ႇၼႆ။

ဢိင်ၼိူဝ်လွင်ႈပဵၼ်ပၢင်တိုၵ်းၼႆႉသေ သဵၼ်ႈတၢင်း တၢင်ႉယၢၼ်း – လႃႈသဵဝ်ႈ လႆႈပိၵ်ႉဢိုတ်းဝႆႉၵမ်းၼိုင်ႈ ဝႃႈၼႆ။

ၵူၼ်းမိူင်းပိုၼ်ႉတီႈ ၽူႈၸၢႆး ဢႃယု မွၵ်ႈ 40 ပၢႆ သိုပ်ႇလၢတ်ႈဝႃႈ “ မိူဝ်ႈၼႆႉ ၵူၼ်းငိူင်ႉဝႄႈၽေးသိုၵ်း တီႈဝတ်ႉဝေႇလုဝၼ်ႇ တင်း ဝတ်ႉၵၢင်ဝဵင်းတႄႉ ဢွၼ်ၵၼ်ပွၵ်ႈႁိူၼ်းၸဵမ်ၸဝ်ႉ။ ၽိူဝ်ႇသဵင်ၵွင်ႈတႅၵ်ႇထႅင်ႈၵေႃႈ ဢွၼ်ၵၼ်ပွၵ်ႈမႃး ၶိုၼ်ႈတီႈ ဝတ်ႉ။ တေလႆႈဝႃႈ ၵႂႃႇၵႂႃႇမႃးမႃးၶႃႈဢေႃႈ ၵူၼ်းမိူင်းႁဝ်းတႄႉ ယွၼ်ႉလူဝ်ႇႁႃၵိၼ်လဵင်ႉတွင်ႉၵၼ်ၶႃႈၼႃႇ။ မိူဝ်ႈဝႃးတႄႉ ဝႃႈသိုၵ်းဢူၺ်းလီ ၶဝ်ထွၼ်ၶိုၼ်းယဝ်ႉဢၼ်ဝႃႈၼၼ်ႉ ၶဝ်ထွၼ်ၵႂႃႇမူၵ်းဝႆႉတၢင်းၽႄၵဝ်ႇ တၢင်းၶိုၼ်ႈ ဝၢၼ်ႈပၢင်ႇတီႈလွႆ မၢၵ်ႇႁိၼ်။ မိူဝ်ႈၼႆႉမႃး သဵင်ၵွင်ႈတႅၵ်ႇထႅင်ႈ။ လႆႈငိၼ်းတႄႉ သိုၵ်းမၢၼ်ႈ တပ်ႉမ 99 မႃးၽိူမ်ႉႁႅင်းသိုၵ်းၸွႆႈၶလယ 291” ဝႃႈၼႆ။

ဝၼ်းတီႈ 15/8/2019 ၼၼ်ႉ ၸုမ်းဢူၺ်းလီပွတ်းႁွင်ႇ 3 ၸုမ်း TNLA သိုၵ်းလွႆ၊ MNDAA ၶႄႇၵဝ်ႈၵၢင်ႉ၊ AA သိုၵ်းရၶႅင်ႇ ႁူမ်ႈၵၼ်သေ လေႃႇတိုၵ်း တပ်ႉသိုၵ်းလူင်ပွင်ၸိုင်ႈမၢၼ်ႈ ၼႂ်းၸႄႈဝဵင်းပၢင်ႁူႈ/ ၼွင်ၶဵဝ်/ ၵျွၵ်ႉမႄး ၸိူဝ်းၼႆႉ 5 တီႈ။ ဝၢႆး ၼၼ်ႉသိုၵ်းလူင်ပွင်ၸိုင်ႈမၢၼ်ႈ လေႃႇတိုၵ်းၶဝ် 3 ၸုမ်းႁၢဝ်ႈႁႅင်း ပၢင်တိုၵ်းသိုပ်ႇၽႄႈၵႂႃႇ ၼႂ်းၸိုင်ႈတႆးပွတ်းႁွင်ႇ လၢႆၸႄႈ ဝဵင်း။ ၵူၼ်းမိူင်းလႆႈလူႉတၢႆယွၼ်ႉပၢင်တိုၵ်း ဢမ်ႇယွမ်း 11 ၵေႃႉ။ မၢတ်ႇၸဵပ်း 25 ၵေႃႉ လႄႈ ၵူၼ်းမိူင်းပၢႆႈၽေး ဢမ်ႇယွမ်း 5,000 ၵေႃႉ။