ၸၢႆးၸွမ်ၾႃႉ(ၵဵင်းတုင်)လႄႈ ၵူဝ်ႇဢွင်ႇၵျေႃႇဝိၼ်း (ဝဵင်းလိူဝ်ႇ) 2 ၵေႃႉ ၶီႇလူတ်ႉၶိူင်ႈ ပၼ်ႇလုမ်ႈၾႃႉ Motourlogue ႁိုင်ၶၢဝ်းတၢင်း 3 လိူၼ် ယၢမ်းလဵဝ်ထိုင်မိူင်း ဢိင်းၵလဵတ်ႈ (UK )ယဝ်ႉဝႃႈၼႆ။
ၶဝ်သွင်ၵေႃႉၼႆႉ ဢွၵ်ႇမိူင်းမၢၼ်ႈ မိူဝ်ႈဝၼ်းတီႈ 26 လိူၼ်မေႊ။ ၶဝ်ႈမိူင်းထႆး ၶဝ်ႈမိူင်းလၢဝ်း ၊ ၶဝ်ႈမိူင်းၶႄႇ၊ မွင်ႊၵူဝ်းလီႊယႃႊ၊ ၶဝ်မိူင်းရတ်ႉသျႃး သိုပ်ႇၵႂႃႇမိူင်းၾိၼ်ႊလႅၼ်ႊ၊ သုၺ်ႇတိၼ်ႇ၊ မိူင်းၼေႃႊဝေႊ၊ လူင်းၸူး ၵျႃႊမၼီႊ ယဝ်ႉ ႁွတ်ႈထိုင်မိူင်းဢိင်းၵလဵတ်ႈ (UK) ဝဵင်းလူင်လၼ်ႊတၼ်ႊ မိူဝ်ႈဝၼ်းတီႈ 26 /8/2019။
ၸၢႆးၸွမ်ၾႃႉလၢတ်ႈတီႈ ၸုမ်းၶၢဝ်ႇပီႇပီႇသီႇလၢတ်ႈဝႃႈ -“ ၸဵမ်မိူဝ်ႈဢွၵ်ႇမႃး တိုၼ်းယိူင်းဢၢၼ်းဝႃႈတေႁႂ်ႈမၼ်းႁွတ်ႈမိူင်း UK ၼႆၼၼ်ႉၶႃႈယဝ်ႉ။ ၵွပ်ႈၼၼ်လႄႈ ၼႂ်းၶၢဝ်းတၢင်း 3 လိူၼ် ႁဝ်းၶႃႈသွင်ၵေႃႉ မိူဝ်ႈၶီၵေႃႈမီး မိူဝ်ႈလီၵေႃႈမီး။ တၢင်းယၢပ်ႇၽိုတ်ႇၵေႃႈမီး တၢင်းသိူဝ်းၸႂ်ၵေႃႈမီးၶႃႈဢေႃႈ။ ယၢမ်းလဵဝ်ႁွတ်ႈထိုင်တႃႈယိူင်းမၢႆႁဝ်းၶႃႈမိူင်း လၼ်ႊတၼ်ႊယဝ်ႉ။ တေလႆႈသိုပ်ႇၵႂႃႇလႂ်ထႅင်ႈတႄႉဢမ်ႇႁူႉၶႃႈၼေႃႈ။ တေမိူဝ်းၶိုၼ်းဢေႃႈ။ တေႁဵတ်းႁိုဝ်မိူဝ်းတေ မိူဝ်းမိူဝ်ႈလႂ်တႄႉပႆႇႁူႉ ” ဝႃႈၼႆ။
ၸၢႆးၸွမ်ၾႃႉၶႃသွင်ၵေႃႉၼႆႉ လုၵ်ႉမိူင်းႁူမ်ႈတုမ်မၢၼ်ႈၶပ်းလူတ်ႉၵႂႃႇထိုင်မိူင်းဢိင်းၵလဵတ်ႈ ဢဝ်ၶၢဝ်းယၢမ်း သၢမ်လိူၼ်၊ လတ်းၽၢၼ်ႇ 19 ၸိုင်ႈမိူင်း ၊ တၢင်းၵႆ 30000 ၵီႊလူဝ်ႊ။
ၵူဝ်ႇဢွင်ႇၵျေႃႇဝိၼ်းလၢတ်ႈဝႃႈ- “ပဵၼ်ၶၢဝ်းတၢင်းဢၼ်ဢမ်ႇၸၢင်ႈတႅပ်းတတ်းၵႃႈၶၼ်သေဢိတ်းၼၼ်ႉယဝ်ႉၶႃႈ။ ႁႅင်းၸႂ်ဢၼ်ဝႃႈ တေၵႂႃႇႁႂ်ႈထိုင် ၼႆၼၼ်ႉသေၵေႃႈ မႃးထိုင်ၵူၺ်းၶႃႈ။ ပၼ်ႁႅင်းၵၼ် ၸုင်ၸၼ်ၵၼ်ၶႃႈဢေႃႈ။ လႆႈဝႃႈၶဵင်ႇတႃႉၸႂ်ၸဝ်ႈၵဝ်ႇသေ မႃးႁွတ်ႈထိုင်ၵူၺ်းယဝ်ႉၶႃႈ။” – ဝႃႈၼႆ။
ၶၢဝ်းတၢင်းၸၢႆးၸွမ်ၾႃႉၶႃလႆႈလတ်းၽၢၼ်ႇမႃးၼၼ်ႉ ထိုင်မိူင်းလႂ်ၵေႃႈ မီးပီႈၼွင်ႉၵူၼ်းမိူင်းႁူမ်ႈတုမ်ပႂ်ႉႁူမ်ၸူမ်း ႁပ်ႉတွၼ်ႈ။ ၶၢဝ်းတၢင်းပွၵ်ႈၶိုၼ်းမိူင်းႁူမ်ႈတုမ်တႄႉ ယိူင်းဢၢၼ်းတေလတ်းၵွၼ်ၵၢင်လုမ်ႈၾႃႉမႃးၶိုၼ်းဝႃႈၼႆ။
ပဵၼ်ၵၢၼ်ၶတ်းၸႂ်ၵူၼ်းၼုမ်ႇ မိူင်းႁူမ်ႈတုမ် ၶီႇလူတ်ႉၶိူင်ႈ BMW ပၼ်ႇလုမ်ႈၾႃႉၵမ်းႁႅၵ်ႈ ၼႂ်းၶၢဝ်းတၢင်း 60 ပီမိူင်း။ မိူဝ်ႈပီ 1956 ၼီႈၼၼ်ႉတႄႉ မီးၼၢင်းယိင်း ၵူၼ်းမိူင်းႁူမ်ႈတုမ် ၸိုဝ်ႈ တေႃႇတိၼ်ႇတိၼ်ႇၸဵင်ႇ ၶီႇလူတ်ႉၶိူင်ႈ ပၼ်ႇလုမ်ႈၾႃႉယဝ်ႉပွၵ်ႈၼိုင်ႈ။
ၶၢဝ်းတၢင်း ၸၢႆးၸွမ်ၾႃႉၶဝ် ၶီႇလူတ်ႉၶိူင်ႈ ပၼ်ႇလုမ်ႈၾႃႉၼႆႉ တႃႇ တေလတ်းၶၢမ်ႈလႆႈ ၵူႈမိူင်းမိူင်း ၼၼ်ႉ ၶဝ်လႆႈႁၢင်ႈႁႅၼ်း ၽိုၼ်လိၵ်ႈ ၽိုၼ် လၢႆးမႃး ၶၢဝ်းတၢင်းပႅတ်ႇလိူၼ် ၼႆယူႇ။
ဢၼ်ၵမ်ႉၸွႆႈ ၶၢဝ်းတၢင်း Motorlogue ၶႃသွင်ၵေႃႉၼၼ်ႉတႄႉ ပဵၼ်ၶူင်းၵၢၼ်လူင် ၼမ်ႉမၼ်း MPRL E&P CO.,LTD လႆႈႁူႉၼင်ႇၼႆ။
ၶေႃႈမုၼ်း- BBC,VOA
