ၸုမ်းဢူၺ်းလီပွတ်းႁွင်ႇ 3 ၸုမ်း ၶဝ်ႈလူမ်ႇယိုဝ်းတပ်ႉသိုၵ်းလူင်ပွင်ၸိုင်ႈမၢၼ်ႈ တီႈဢိူင်ႇၼမ်ႉပွင်ႈ ၸႄႈဝဵင်းလႃႈသဵဝ်ႈ ၼၼ်ႉ ၵူၼ်းဝၢၼ်ႈ 700 ပၢႆ ဢွၼ်ၵၼ်ငိူင်ႉဝႄႈပၢင်တိုၵ်းၵႂႃႇသွၼ်ႈဝႆႉ ၸွမ်းဝတ်ႉဝႃး။

မိူဝ်ႈၼႆႉ ဝၼ်းတီႈ 28/8/2019 ယၢမ်းၵၢင်ၼႂ် မွၵ်ႈ 5 မူင်းၶိုင်ႈပၢႆၼၼ်ႉ ၸုမ်းဢူၺ်းလီပွတ်းႁွင်ႇ 3 ၸုမ်း သိုၵ်းတဢၢင်း၊ ၵဝ်ႈ ၵၢင်ႉလႄႈ ရၶႅင်ႇ ႁူမ်ႈၵၼ် ၶဝ်ႈယိုဝ်း တပ်ႉသိုၵ်းလူင်ပွင်ၸိုင်ႈမၢၼ်ႈ ၶလယ 291 တီႈဢိူင်ႇၼမ်ႉပွင်ႈ ဢၼ်မီးၾၢႆႇၸၢၼ်း ဝဵင်းလႃႈသဵဝ်ႈ။ ၵူၼ်းမိူင်းလႆႈဢွၼ် ၵၼ်ငိူင်ႉပၢႆႈ ၵႂႃႇသွၼ်ႈဝႆႉတီႈဝတ်ႉဝေႇလုဝၼ်ႇ မွၵ်ႈ 500 ၵေႃႉ လႄႈ ဝတ်ႉၵျွင်းၵၢင်ဝဵင်း ၼမ်ႉပွင်ႈ မွၵ်ႈ 200 ပၢႆ ၼႂ်းဢိူင်ႇ ၼမ်ႉပွင်ႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

ၸၢႆးႁၢၼ်ႇ ႁူဝ်ပဝ်ႈ ၸုမ်းၵူၼ်းၼုမ်ႇတႆး TYO ၸိုင်ႈတႆးပွတ်းႁွင်ႇ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းပၢႆႈၽေးသိုၵ်းၼႆႉ ပဵၼ် ၵူၼ်းၼႂ်းဢိူင်ႇၼမ်ႉပွင်ႈၶႃႈ။ ယၢမ်းလဵဝ်တႄႉ တီႈဝတ်ႉၵျွင်းလဵင်ႉလူၶဝ်ႈၽၵ်းၶဝ်ဝႆႉၶႃႈဢေႃႈ။ ဢၼ်ႁၢင်ႈႁႅၼ်းဝႆႉတႃႇ ပူႇသိၼ်ၼၢႆးသိၼ် မိူဝ်ႈၽုၵ်ႈၼၼ်ႉၶႃႈၼႃႇ” ဝႃႈၼႆ။

တေႃႈလဵဝ် ရူတ်ႉၵႃး ဢၼ်လႅၼ်ႈ တၢင်းတၢင်ႉယၢၼ်း – လႃႈသဵဝ်ႈတႄႉ ၶိုၼ်းၵႂႃႇမႃး မိူဝ်ႈၵဝ်ႇယဝ်ႉ။

“ယၢမ်းလဵဝ်ၼႆႉ ပၢင်တိုၵ်းယဵၼ်ၵႂႃႇယဝ်ႉ။ ရူတ်ႉၵႃး ၶိုၼ်ႈလူင်း တၢင်ႉယၢၼ်း – လႃႈသဵဝ်ႈၵေႃႈ ၵႂႃႇမႃးၶိုၼ်းမိူၼ်ၵဝ်ႇယဝ်ႉ။ လိူဝ်ၼၼ်ႉ ၵူၼ်းတီႈၼမ်ႉပွင်ႈႁဝ်းၶႃႈၵေႃႈ ၵႂႃႇမႃးမိူၼ်ၵဝ်ႇယဝ်ႉ။ ၵူၼ်းမိူင်းဢၼ်ငိူင်ႉဝႄႈၽေးသိုၵ်းဝႆႉၸူဝ်ႈၶၢဝ်းတႄႉ ပဵၼ်ၵူၼ်းၼမ်ႉပွင်ႈ ၵူၺ်းၼင်ႇၵဝ်ႇၶႃႈ။ တၢင်းထိူၼ်ႇတၢင်းလွႆယင်းတိုၵ်ႉငိၼ်းသဵင်မၢၵ်ႇ သဵင်ၵွင်ႈယူႇလႄႈ ပႆႇႁတ်းပွၵ်ႈ မိူဝ်းဝၢၼ်ႈၶႃႈ” ၵူၼ်းၼမ်ႉပွင်ႈၵေႃႉၼိုင်ႈလၢတ်ႈၼႄၼင်ႇၼႆ။

မိူဝ်ႈၼႆႉ ယၢမ်းၵၢင်ၼႂ် မွၵ်ႈ 6 မူင်းၼၼ်ႉ သိုၵ်းဢူၺ်းလီပွတ်းႁွင်ႇ 3 ၸုမ်း ယူႇတီႈႁူင်းႁဵၼ်းၸၼ်ႉသုင် ၼမ်ႉပွင်ႈသေ ယိုဝ်းမၢၵ်ႇၶဝ်ႈၵႂႃႇတၢင်းၼႂ်းတပ်ႉသိုၵ်းလူင်ပွင်ၸိုင်ႈမၢၼ်ႈ သွင်ၾၢႆႇလႆႈပဵၼ်ပၢင်တိုၵ်းၵၼ် မၢၵ်ႇလူင်တူၵ်းသႂ်ႇ ႁိမ်းႁွမ်း ႁိူၼ်းၵူၼ်းဝၢၼ်ႈ ဢမ်ႇယွမ်း 3 လုၵ်ႈ ဝႃႈၼႆ။

ၸၢႆးႁၢၼ်ႇ လၢတ်ႈဝႃႈ “ မၢၵ်ႇလူင် တူၵ်းသႂ်ႇႁိမ်းဝၢၼ်ႈၵူၼ်း တီႈပွၵ်ႉ 2 ၼမ်ႉပွင်ႈ 3 လုၵ်ႈ။ တႃႇ 2 လုၵ်ႈတႄႉတႅၵ်ႇ။ တႃႇ ၼိုင်ႈလုၵ်ႈသမ်ႉ ဢမ်ႇတႅၵ်ႇ။ ယွၼ်ႉၼၼ် ၵူၼ်းမိူင်းဢွၼ်ၵၼ်ၵူဝ်သေ ပႆႇႁတ်းပွၵ်ႈႁိူၼ်းၵၼ်ၶႃႈ” ဝႃႈၼႆ။

တႄႇဢဝ် ဝၼ်းတီႈ 15/8/2019 ယၢမ်းၵၢင်ၼႂ် မွၵ်ႈ 5 မူင်းပၢႆၼၼ်ႉမႃး ၸုမ်းဢူၺ်းလီပွတ်းႁွင်ႇ 3 ၸုမ်း ၶဝ်ႈလူမ်ႇယိုဝ်း တီႈၸၼ်ႉ ၸွမ်သိုၵ်းမၢၼ်ႈၾၢႆႇပၢႆးၸၢၵ်ႈ (DSTA) တီႈပၢင်ႇႁူႈ လႄႈ ၼႂ်းၸႄႈဝဵင်းၼွင်ၶဵဝ် 5 တီႈ။ ဝၢႆးၼၼ်ႉ သိုၵ်းလူင်ပွင် ၸိုင်ႈ ႁႅၼ်းသိုၵ်းၶဝ်ႈၸူး ၸိုင်ႈတႆးပွတ်းႁွင်ႇသေ သွင်ၾၢႆႇ လႆႈပဵၼ်ပၢင်တိုၵ်းၵၼ် ႁၢဝ်ႈႁႅင်း ႁၢၼ်ႉတေႃႇထိုင်ယၢမ်းလဵဝ်။