ပၢင်တိုၵ်းၼႂ်းၸိုင်ႈတႆးပွတ်းႁွင်ႇ ႁဵတ်းႁႂ်ႈၵူၼ်းမိူင်းလႆႈလူႉတၢႆၸွမ်း 11 ၵေႃႉ မၢတ်ႇၸဵပ်း 25 ၵေႃႉ ၸုမ်းတူင်ႉ ၼိုင် တူင်ႇဝူင်းတႆး ပွတ်းႁွင်ႇ လၢတ်ႈ။
တႄႇဢဝ် ဝၼ်းတီႈ 15-27/8/2019 ၼႂ်းၶၢဝ်းတၢင်း 13 ဝၼ်းမႃးၼႆႉ ၵူၼ်းမိူင်း လႆႈလူႉတၢႆလႄႈ မၢတ်ႇၸဵပ်း ယွၼ်ႉပၢင်တိုၵ်း ၸိုင်ႈတႆးတၢင်းပွတ်းႁွင်ႇ၊ ၵမ်ႈၼမ် တေၺႃးၸၢၵ်ႇမၢၵ်ႇလူင်တူၵ်းသႂ်ႇလႄႈ ယဵပ်ႇၺႃးမၢၵ်ႇမႅင်း ၸိူဝ်းၼႆႉ။
ဢူးႁွင်းတွင် ၽူႈၶၢၼ်ပၢၵ်ႇ ၸုမ်းၸွႆႈထႅမ်ၵၢၼ်ၵူၼ်းတေႃႇၵူၼ်း ၸိုင်ႈတႆးပွတ်းႁွင်ႇ လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းၶၢဝ်း တၢင်း 13 ဝၼ်းမႃး ၼႆႉ ၵူၼ်းမိူင်းလႆႈလူႉတၢႆၵႂႃႇ မီး11 ၵေႃႉယဝ်ႉ။ ဢၼ်တိူဝ်ႉၺႃးမၢတ်ႇၸဵပ်းသမ်ႉမီး 25 ၵေႃႉ။ ၶေႃႈမုလ်း ၼႆႉ ၸွမ်းၼင်ႇ ႁဝ်းၶႃႈ ယိုၼ်ႈထိုင် ၵဵပ်းတွမ်လႆႈၵူၺ်းၶႃႈ။ ဢၼ်ႁဝ်းၶႃႈ ဢမ်ႇယိုၼ်းထိုင်/ ဢမ်ႇႁူႉၸွမ်းၵေႃႈ တေမီးထႅင်ႈ ယူႇ” ဝႃႈၼႆ။
ၵူၼ်းမိူင်းလူႉတၢႆယွၼ်ႉပၢင်တိုၵ်း 11 ၵေႃႉၼႆႉ ၵမ်ႈၼမ် တေပဵၼ်ၽူႈၸၢႆး။ ဢၼ်လႆႈမၢတ်ႇၸဵပ်း 25 ၵေႃႉသမ်ႉ ၵမ်ႈၼမ်ပဵၼ်ၼၢင်းယိင်း ဝႃႈၼႆ။
ဢူးႁွင်းတွင် လၢတ်ႈဝႃႈ “ ၵူၼ်းမိူင်းဢၼ်လႆႈလူႉတၢႆလႄႈ မၢတ်ႇၸဵပ်းၼၼ်ႉ ၵမ်ႈၼမ်တေတိူဝ်ႉၺႃးၸၢၵ်ႇမၢၵ်ႇလူင်တူၵ်း သႂ်ႇ။ ဢၼ်ယဵပ်ႇၺႃးမၢၵ်ႇတႄႉ တေမီးဢေႇ” ဝႃႈၼႆ။
ၸုမ်းဢူၺ်းလီပွတ်းႁွင်ႇလႄႈ တပ်ႉသိုၵ်းလူင်ပွင်ၸိုင်ႈမၢၼ်ႈ ပဵၼ်ပၢင်တိုၵ်းၵၼ် ၼႂ်းၸိုင်ႈတႆးပွတ်းႁွင်ႇၼၼ်ႉ ႁႂ်ႈၵိုတ်း ယင်ႉပၼ်ဝႆးဝႆး၊ သင်ဢမ်ႇၵိုတ်းယင်ႉပၼ်လႆႈၵေႃႈ ယႃႇႁႂ်ႈတုမ်ႉတိူဝ်ႉၵူၼ်းမိူင်းပႃးၼႆ ယူႇတီႈၸုမ်းၸွႆႈထႅမ် ၵၢၼ်ၵူၼ်း တေႃႇၵူၼ်း တုၵ်းယွၼ်းဝႆႉၼင်ႇၼႆ။
လိူဝ်ၼၼ်ႉ ယူႇတီႈၸုမ်းၸွႆႈထႅမ် ၵၢၼ်ၵူၼ်းတေႃႇၵူၼ်း ဢွၵ်ႇဝႆႉဝႃႈ “ ၼႂ်းၶၢဝ်းတၢင်း 13 ဝၼ်းမႃးၼႆႉ ၼိုင်ႈဝၼ်းလႂ် ၵူၼ်း မိူင်း လႆႈတိူဝ်ႉၺႃးမၢၵ်ႇသေ လူႉတၢႆ ဢမ်ႇယွမ်း 2 ၵေႃႉ ထိုင် 3 ၵေႃႉ။ ၼႂ်းၶၢဝ်းတၢင်း ပွတ်းဢွၼ်ႇတွၼ်ႈၼႆႉၵူၺ်း လႆႈတုမ်ႉ တိူဝ်ႉ ၵူၼ်းမိူင်း 11 ၵေႃႉ” ဝႃႈၼႆ။
ၵဵဝ်ႇလူၺ်ႈလွင်ႈပဵၼ်ပၢင်တိုၵ်း ၼႂ်းၸိုင်ႈတႆးပွတ်းႁွင်ႇၼႆႉသေ ၶူဝ်းၵုၼ်ႇသိၼ်ၵႃႉ ၼႂ်းၸိုင်ႈတႆးပွတ်းႁွင်ႇ ၶၼ်ၶူဝ်းပုင်ႈ ၶိုၼ်ႈ ႁၢဝ်ႈႁႅင်းသေ ၶၼ်ၵုၼ်ႇဢမ်ႇၼိမ် ၵဵဝ်ႇလူၺ်ႈလွင်ႈၼႆႉ ယူႇတီႈၸုမ်းၸွႆႈထႅမ် ၵၢၼ်ၵူၼ်းတေႃႇၵူၼ်း တုၵ်းယွၼ်း ထိုင်လူင် ပွင်ၸိုင်ႈ ၸႄႈမိူင်းတႆး ႁႂ်ႈၵုမ်းၵမ်ထိင်းပၼ် လွင်ႈၵႃႈၶၼ် ၶူဝ်းၵုၼ်ႇသိၼ်ၵႃႉ တၢင်းပွတ်းႁွင်ႇ ဝႃႈၼႆ။
