ရူတ်ႉၵႃးၵူၼ်းမိူင်း ၺႃးယိုဝ်း တီႈႁိမ်းလၢၼ်ႇၵဵပ်းငိုၼ်း ၵူတ်ႉၶၢႆ ၵူၼ်းၶပ်းရူတ်ႉ မၢတ်ႇၸဵပ်း တီႈဝႂ်ႁူ ၼႂ်းၸိုင်ႈတႆးပွတ်းႁွင်ႇ ယင်းတိုၵ်ႉမီးလွင်ႈၶဵင်ႈၶႅင်ၵၢၼ်သိုၵ်းယူႇ။
မိူဝ်ႈၼႆႉ ဝၼ်းတီႈ 27/8/2019 ယၢမ်းၵၢင်ၼႂ် မွၵ်ႈ 10 မူင်းၶိုင်ႈၼၼ်ႉ ရူတ်ႉၵႃး Crown လမ်းၼိုင်ႈ ၺႃးယိုဝ်း တီႈႁိမ်း လၢၼ်ႇၵဵပ်းငိုၼ်း (တူဝ်းၵဵတ်ႉ) ၸႄႈဝဵင်းၵူတ်ႉၶၢႆ ၼိူဝ်သဵၼ်ႈတၢင်း မူႇၸေႊ – ၵူတ်ႉၶၢႆ ၸိုင်ႈတႆးပွတ်းႁွင်ႇ။ တိူဝ်ႉၺႃး ၵူၼ်းႁေႃႈၵႃး မၢတ်ႇၸဵပ်းတီႈဝႂ်ႁူ ဝႃႈၼႆ။
ၵူဝ်ႇၼေႇမဵဝ်း ၵူၼ်းမိူင်းလႃႈသဵဝ်ႈ ဢၼ်ႁွတ်ႈထိုင်ၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ “ မၢၵ်ႇၵွင်ႈၼႆႉ ယိုဝ်းမၢၼ်ႇၵႃးတၢင်း လင်ၶဝ်ႈမႃးတၢင်းၼႃႈ တိူဝ်ႉၺႃးတီႈဝႂ်ႁူၵူၼ်းႁေႃႈၵႃး။ ၵတ်ႉၵႃႈဢမ်ႇတိူဝ်ႉၺႃးတီႈၵွၵ်းႁူဝ်လႃႈ။ တေႃႈလဵဝ်တႄႉ လႆႈ သူင်ႇယူတ်းယႃတီႈႁူင်းယႃၵူတ်ႉၶၢႆဝႆႉယဝ်ႉ။ ၵူၺ်းၵႃႈ သဵၼ်ႈတၢင်းၼႆႉ ငဝ်းလၢႆးယင်းပႆႇလီ” ဝႃႈၼႆ။
မၼ်းၸၢႆးလၢတ်ႈဝႃႈ “ ယၢမ်းလဵဝ် သိုၵ်းလူင်ပွင်ၸိုင်ႈမၢၼ်ႈတင်း ၸုမ်းသိုၵ်းဢူၺ်းလီပွတ်းႁွင်ႇ 3 ၸုမ်း တိုၵ်ႉပဵၼ်ပၢင် တိုၵ်း ၵၼ်ႁၢဝ်ႈႁႅင်းယူႇ ၵူၼ်းမိူင်း ၵႂႃႇမႃးႁႂ်ႈၾၢင်ႉတူဝ်ၵၼ်”ဝႃႈၼႆ။
ၸၢႆးၵွၼ်း ၸဝ်ႈၵႃး မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၸဝ်ႈၵႃး ၺႃးယိုဝ်းတိူဝ်ႉသႂ်ႇတီႈ ဝႂ်ႁူၵူၺ်း ယင်းၶႅၼ်း၊ ရူတ်ႉၵႃး မၼ်းတႄႉ မၢၼ်ႇၵွႆတၢင်းၼႃႈတၢင်းလင်၊ မၢၵ်ႇၵႃးၵေႃႈၺႃးယိုဝ်းဝႆႉ တေလႆႈဝႃႈၵၢမ်ႇလီတႄႉ။ တေႃႈလဵဝ် ၵႃးတိုၵ်ႉၵိုတ်း ဝႆႉတီႈလၢၼ်ႇၵဵပ်းငိုၼ်းၼၼ်ႉယူႇ” ဝႃႈၼႆ။
မိူဝ်ႈဝႃး ယၢမ်းႁူဝ်ၶမ်ႈ 5 မူင်း ၼိူဝ်သဵၼ်ႈတၢင်း မူႇၸေႊ – ၵူတ်ႉၶၢႆ ၼႂ်းၵႄႈ မၢၼ်ႈလွႆ တင်းၼမ်ႉ ၽၵ်းၵႃၼၼ်ႉၵေႃႈ ၵႃး 8 လမ်း မႃးၸွမ်းၵၼ်သေၵေႃႈ ၺႃးယိုဝ်းတီႈမၢၵ်ႇရူတ်ႉၵႃး။
ၸဝ်ႈၵႃး ဢၼ်လႅၼ်ႈတၢင်း မူႇၸေႊ – ဝဵင်းလိူဝ်ႇ ဢွၼ်ၵၼ်တုၵ်းယွၼ်း ဢၼ်ပဵၼ်ပၢင်တိုၵ်းယူႇတၢင်းပွတ်းႁွင်ႇၼၼ်ႉ ၶႅၼ်းတေႃႈၵိုတ်းသေ ယွၼ်ႉဝႃႈ မၼ်းတုမ်ႉတိူဝ်ႉၵူၼ်းမိူင်း ဢွၵ်ႇတႃႈပႆတၢင်း လႄႈ လွင်ႈတေႃႉသူင်ႇၶူဝ်းၵုၼ်ႇ ၶဝ်ႈဢွၵ်ႇ ၸိူဝ်းၼႆႉ ဝႃႈၼႆ။
မိူဝ်ႈဝၼ်းတီႈ 25/8/2019 ၼၼ်ႉၵေႃႈ ယူႇတီႈၸုမ်းဢူၺ်းလီပွတ်းႁွင်ႇ 3 ၸုမ်း ႁူမ်ႈၵၼ်သေ ဢွၵ်ႇၶေႃႈပိုၼ်ၽၢဝ်ႇ ပၼ် ၾၢင်ႉထိုင် ၵူၼ်းမိူင်းဢွၵ်ႇတႃႈပႆတၢင်း ႁႂ်ႈဢွၼ်ၵၼ်လဵပ်းႁဵၼ်း ႁူႉငဝ်းလၢႆးလီလီသေ ၾၢင်ႉၵၼ်ၵႂႃႇမႃး ယွၼ်ႉဝႃႈ တေႃႈ လဵဝ် တပ်ႉသိုၵ်းလူင်ပွင်ၸိုင်ႈမၢၼ်ႈလႄႈ တင်းၸုမ်းဢူၺ်းလီပွတ်းႁွင်ႇ 3 ၸုမ်း ပဵၼ်ပၢင်တိုၵ်းၵၼ်မႃး ဝၼ်းၼိုင်ႈလႄႈ ဝၼ်းၼိုင်ႈ သိုပ်ႇပဵၼ်ပၢင်တိုၵ်းၵၼ်မႃး ႁၢဝ်ႈႁႅင်းယူႇၵူႈဝၼ်း ဝႃႈၼႆ။
