မၢၵ်ႇလူင်တူၵ်းသႂ်ႇၼႂ်းဝၢၼ်ႈပၢၼ်းသေး ဢိူင်ႇၵႃလႅင် ၸႄႈဝဵင်းၵူတ်ႉၶၢႆ ၽူႈၸၢႆးဢႃယု မွၵ်ႈ 50 ပီ ၵေႃႉၼိုင်ႈ တိူဝ်ႉ ၺႃးၸၢၵ်ႇမၢၵ်ႇ လႆႈလူႉတၢႆထင်တီႈ။
ဝၼ်းတီႈ 26/8/2019 ယၢမ်းၵၢင်ၶမ်ႈ မွၵ်ႈ 6 မူင်းၼၼ်ႉ မၢၵ်ႇလူင်တူၵ်းၼႂ်းဝၢၼ်ႈပၢၼ်းသေး ဢၼ်မီးႁိမ်းဝတ်ႉ ပွၵ်ႉ 5 ဢိူင်ႇၵႃလႅင် ၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်း ႁွင်ႇၼၼ်ႉၸၢႆးဢၢႆႈငူဝ်ႇ(ႁွင်ႉ) ၵုၼ်းထေး တိူဝ်ႉၺႃး ၸၢၵ်ႇမၢၵ်ႇသေ လႆႈလူႉတၢႆ ဝႃႈၼႆ။
မၢႆးဢၢႆႈမူၼ်း ႁူဝ်ပဝ်ႈၵေႃလိၵ်ႈလၢႆးလႄႈ ၾိင်ႈငႄႈတဢၢင်း လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃး ယၢမ်းႁူဝ်ၶမ်ႈ မွၵ်ႈ 6 မူင်း ၼၼ်ႉ မၢၵ်ႇလူင်တူၵ်းမႃးၼႂ်းဝၢၼ်ႈထပ်းၵၼ် လၢႆလၢႆလုၵ်ႈ။ မိူဝ်ႈၽွင်းၼၼ်ႉ လုင်းၵုၼ်းထေး တိုၵ်ႈႁၢင်ႈႁႅၼ်းတေဝႆႈ ၽြႃးယူႇ။ ၸၢၵ်ႇမၢၵ်ႇလူင်တိူဝ်ႉသႂ်ႇမၼ်းၸၢႆးသေ လႆႈလူႉတၢႆထင်တီႈၵမ်းလဵဝ်။ မေးၼၢင်းမၼ်းသမ်ႉၸၢၵ်ႇမၢၵ်ႇ တိူဝ်ႉ ၺႃးတီႈၶႃသေ လႆႈမၢတ်ႇၸဵပ်း။ ဢိင်ၼိူဝ်မၢၵ်ႇလူင်တူၵ်းသႂ်ႇၼႂ်းဝၢၼ်ႈၼႆႉသေ ၵူၼ်းဝၢၼ်ႈ ဢွၼ်ၵၼ်ပၢႆႈမႅပ်ႉၼႂ်းလုၵ်း ထၢင်/ လုၵ်းလိၼ်” ဝႃႈၼႆ။
ၽူႈၸၢႆးၵေႃႉၼိုင်ႈ ၵူၼ်းဝၢၼ်ႈပၢၼ်းသေး လၢတ်ႈဝႃႈ “ မၢၵ်ႇလူင်ဢၼ်တူၵ်းမႃးၼႂ်းဝၢၼ်ႈမိူဝ်ႈဝႃးၼၼ်ႉ ၶၢတ်ႈလၢမ်းတႄႉ တေမီးမွၵ်ႈ 8 လုၵ်ႈၼႆႉ။ ႁိူၼ်းလင်ၼိုင်ႈ လႆႈလူႉလႅဝ်။ မၢၵ်ႇလူင်ဢၼ်တူၵ်းမႃးၼၼ်ႉ လႅပ်ႈတေပဵၼ်မၢၵ်ႇတပ်ႉသိုၵ်းလူင် ပွင်ၸိုင်ႈမၢၼ်ႈၵူၺ်း” ဝႃႈၼႆ။
တီႈဝၢၼ်ႈပၢၼ်းသေးၼႆႉ မီးတပ်ႉသိုၵ်းလူင်ပွင်ၸိုင်ႈမၢၼ်ႈ တပ်ႉၶလယ 242 ပၵ်းတပ်ႉဝႆႉ ဝႃႈၼႆ။
ၼႂ်းၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇၼႆႉ တပ်ႉသိုၵ်းလူင်ပွင်ၸိုင်ႈမၢၼ်ႈတင်း ၸုမ်းဢူၺ်းလီပွတ်းႁွင်ႇ 3 ၸုမ်း ပဵၼ် ပၢင်တိုၵ်းၵၼ်ႁၢဝ်ႈႁႅင်း တေႃႇထိုင်ယၢမ်းလဵဝ် လွင်ႈသဵၼ်ႈတႃႈသၢႆတၢင်းတေႃႉ သူင်ႇၶူဝ်းၵုၼ်ႇၶဝ်ႈဢွၵ်ႇၶႄႇၵေႃႈ လႆႈႁူပ်ႉ ထူပ်းလွင်ႈယၢပ်ႇၽိုတ်ႇလိူဝ်ႁႅင်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ