ႁွင်ႈၵၢၼ်ၾၢႆႇႁူမ်ႇလူမ်ႈ ပိုၼ်ၽၢဝ်ႇဢွၵ်ႇဝႆႉဝႃႈ တီႉလႆႈယႃႈၾိၼ်ႇၽိူၵ်ႇ တင်း ယႃႈဢႆႊသ် ၼႂ်းၸႄႈဝဵင်းမိူင်းပဵင်း ၸိုင်ႈတႆး ပွတ်းဢွၵ်ႇလႄႈ ၸႄႈဝဵင်းၼမ်ႉၶမ်း ၸိုင်ႈတႆး ပွတ်းႁွင်ႇ တင်းၼမ်လၢႆ။
ဝၼ်းတီႈ 25/8/2019 ယၢမ်းဝၢႆးဝၼ်းမွၵ်ႈ 4 မူင်း ယူႇတီႈၾၢႆႇႁူမ်ႇလူမ်ႈ ပလိၵ်ႈ ၵူတ်ႇထတ်းတီႉလႆႈ ယႃႈဢႆႊသ် 762 ၵီႊလူဝ်ႊ။ ၼႂ်းရူတ်ႉၵႃး Revo ဢၼ်မွင်ႇလီႁႃ ဢႃယု 36 ပီ ႁေႃႈမႃး။ ၸဝ်ႈၼႃႈတီႈတီႉတီႈ 16 လၵ်း ၼႂ်းၸႄႈဝဵင်းမိူင်းပဵင်း ၼိူဝ်သဵၼ်ႈတၢင်း ၵဵင်းတုင် – တူၼ်ႈတီး ၸိုင်ႈတႆးပွတ်းဢွၵ်ႇၶူင်း ၵႃႈၶၼ်ယႃႈတေမီးမွၵ်ႈ 190,000 သႅၼ်ပျႃး။
ၼႂ်းဝၼ်းလဵဝ်ၵၼ် ဝၼ်းတီႈ 25 ယၢမ်းၵၢင်ၶမ်ႈမွၵ်ႈ 6 မူင်းၶိုင်ႈၼၼ်ႉၵေႃႈ ၸဝ်ႈၼႃႈတီႈၶဝ်ႈၵူတ်ႇထတ်းသုမ်ႉဢၼ်မီး ၸွမ်းလႅၼ်ဝၢၼ်ႈပွၵ်ႉသႃႇယႃႇၵူင်း ဝဵင်းၼမ်ႉၶမ်း တီႉလႆႈထႅင်ႈယႃႈၾိၼ်ႇၽိူၵ်ႇ ၼမ်ႉၼၵ်း 220 ၵရမ်ႊလႄႈ ယႃႈမႃႉ 5,700 မဵတ်ႉ၊ ငိုၼ်း 5 မိုၼ်ႇပျႃး တီႈၸၢႆးယေႃးထူင်ႇ(ႁွင်ႇ) ဢွင်ႇၵျႃႇ လႄႈ ၽူႈၸၢႆး 4 ၵေႃႉ။
ၵဵဝ်ႇၵပ်းလွင်ႈၼႆႉ ယူႇတီႈၸဝ်ႈၼႃႈတီႈပလိၵ်ႈၶဝ် လႆႈပိုတ်ႇလိူင်ႈ ၸွႆးတြႃးၸွမ်းၼင်ႇပၵ်းပိူင်ဝၢၼ်ႈမိူင်းမီးၼၼ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ