ၵေႃႁူမ်ႈသၢင်ႈၵူၼ်းၼုမ်ႇတႆး TYN ၸတ်းႁဵတ်းပၢင်ပၼ်ပိုၼ်ႉႁူႉ လၢႆးႁၢင်ႈႁႅၼ်းၽွင်းထူပ်းငဝ်းလၢႆးၶိုၵ်ႉၶၵ်ႉ မိူၼ်ၼင်ႇ ပေႃးပဵၼ်ပၢင်တိုၵ်း ထုၵ်ႇလီႁၢင်ႈႁႅၼ်းၸိူင်ႉႁိုဝ်လႄႈ ထုၵ်ႇလီငိူင်ႉဝႄႈၽေးၸိူင်ႉႁိုဝ် ၸဵမ်ၸိူဝ်းၼႆႉ။

ပၢင်သွၼ်ပၼ်ပိုၼ်ႉႁူႉၼႆႉ ၸတ်းႁဵတ်းတီႈ ဝတ်ႉသွၼ်ထမ်း ဝၢၼ်ႈၼႃးမၢၵ်ႇၶေႃ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ၼႂ်းဝၼ်းတီႈ 25-27/8/2019 တႃႇၶၢဝ်းတၢင်း 3 ဝၼ်း။

ဢၼ် TNY လႆႈပူင်သွၼ်ၵႂႃႇသမ်ႉ တင်းမူတ်းမီး 4 ႁူဝ်ၶေႃႈ။ မိူၼ်ၼင်ႇ လွင်ႈလုမ်းလႃးႁူဝ်တီး (First Aid)၊ ပိုၼ်ႉ ႁူႉၽေး ၶဵၼ်မၢၵ်ႇမႅင်း(Mine Risk Education)၊ သုၼ်ႇလႆႈသုၼ်ႇပဵၼ်ၵူၼ်း (Human Right) လႄႈ ပိုၼ်ႉႁူႉၵၢပ်ႈပၢၼ် မႂ်ႇဢၢႆႊထီႊ (Information Technology) ၸဵမ်ၸိူဝ်းၼႆႉ။

ၽူႈပူင်သွၼ်ၵၢၼ်ႁဵၼ်းသမ်ႉ ၸၢႆးၼေႃႇဢွၼ်ႇ (ၼမ်ႉလၼ်ႈ)၊ ၸၢႆးဢွင်ႇၶျုၼ်ႇ(ပၢင်လူင်)၊ ၸၢႆးဝၼ်းႁိူင်း(ၼႃးမၢၵ်ႇၶေႃ) လႄႈ ယိင်းဢေမူၺ်း (မိူင်းၶၢင်) ၸိူဝ်းၼႆႉ။ ၽူႈၶဝ်ႈႁူမ်ႈႁွတ်ႈလဵပ်ႈႁဵၼ်း တင်းသဵင်ႈမီး 55 ၵေႃႉ ပဵၼ်ၵူၼ်းၼုမ်ႇပိုၼ်ႉတီႈ ဢၼ်ၵႆႉလႆႈထူပ်းၽေးသိုၵ်းၼႂ်းဢိူင်ႇၼႃးမၢၵ်ႇၶေႃ ၵူႈဝၢၼ်ႈဝၢၼ်ႈ။

ၵေႃႁူမ်ႈသၢင်ႈၵူၼ်းၼုမ်ႇတႆးၼႆႉ ၸတ်းႁဵတ်းပၢင်သွၼ်ပၼ်ပိုၼ်ႉႁူႉလၢႆးႁၢင်ႈႁႅၼ်းၽွင်းထူပ်းလွင်ႈၶိုၵ်ႉၶၵ်ႉပွၵ်ႈဢွၼ် တၢင်းၼႆႉ လႆႈၸတ်းႁဵတ်းတီႈႁူင်းႁေႃၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းၵျွၵ်ႉမႄး။ လိူဝ်ၼၼ်ႉ လႆႈၸတ်းပၢင် သွၼ် ၽိုၵ်းလိုမ်ႉၼမ်ႉၵတ်ႉၵူၼ်းၼုမ်ႇၼႅၼ်ႈၼႃ (Intensive) ၶၢဝ်းတၢင်း 2 လိူၼ် တီႈဝတ်ႉႁူဝ်ပိုၵ်ႉ ၸႄႈဝဵင်းလႃႈသဵဝ်ႈ သေ ၶိုၼ်းလူင်းပိုၼ်ႉတီႈသိုပ်ႇပၼ်ပိုၼ်ႉႁူႉၵူႈတီႈထႅင်ႈ ဝႃႈၼႆ။

ၵေႃႁူမ်ႈသၢင်ႈၵူၼ်းၼုမ်ႇတႆးၼႆႉ ပၵ်းလုမ်းဝႆႉတီႈ ပွၵ်ႉ 5 ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇသေ တူင်ႉၼိုင်ၵွင်ႉသၢၼ် ပၼ်ပိုၼ်ႉႁူႉၵူၼ်းၼုမ်ႇၵူႈပိုၼ်ႉတီႈၽႅဝ်ထိုင်ထုင်ႉႁူဝ်ၵဵဝ်၊ ထုင်ႉပဵင်း ၸဵမ်ၸိူဝ်းၼႆႉပႃး ဝႃႈၼႆ။

 သူင်ႇၶၢဝ်ႇ – ယေႈသႅင်ၵေႃႇ