လုၵ်ႈႁဵၼ်းၸၼ်ႉငဝ်ႈ(မူႇလ) 5 ၵေႃႉ ၼႂ်းဢိူင်ႇမိူင်းပေႃႈ ၸႄႈဝဵင်းမူႇၸေႊ ၺႃးမၢၵ်ႇႁိမ်းၶၢင်ႈတၢင်းတႅၵ်ႇသႂ်ႇၶဝ်သေ လူႉတၢႆထင်တီႈ 1 ၵေႃႉ မၢတ်ႇၸဵပ်း 4 ၵေႃႉ ဝႃႈၼႆ။

ဝၼ်းတီႈ 19/12/2017 ယၢမ်းဝၢႆးဝၼ်း ၼႂ်းၵႄႈ 3:30-4:00 မူင်းၼၼ်ႉ ၶၢဝ်းလူင်းႁူင်းႁဵၼ်း လုၵ်ႈဢွၼ်ႇႁဵၼ်း ဢွၼ်ၵၼ်ပွၵ်ႈႁိူၼ်းၼၼ်ႉ ၺႃးမၢၵ်ႇဢၼ်မီးဝႆႉၶၢင်ႈတၢင်းတႅၵ်ႇသႂ်ႇ ၼႂ်းၵႄႈႁူင်းႁဵၼ်းလႄႈ ဝၢၼ်ႈႁူဝ်ၼႃး ၼႂ်းဢိူင်ႇ မိူင်းပေႃႈ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။

ၸၢႆးႁိၼ်လဵၵ်း ထုင်ႉႁူၺ်ႈလီမူႇၸေႊ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ လုၵ်ႈဢွၼ်ႇ ၸိုဝ်ႈႁွင်ႉ တၢၼ်ႇမႆႇ ထူပ်းႁၼ်မၢၵ်ႇၼၼ်ႉ မီးႁိမ်းၶၢင်ႈတၢင်းသေ သမ်ႉႁွင်ႉဢူၺ်းၵေႃႉမၼ်း ၸိုဝ်ႈႁွင်ႉ ဢွင်ႇလိၼ်း ထုၼ်းမႃးတူၺ်း။ ၵမ်းၼႆႉ ၸိုဝ်ႈႁွင်ႉ ဢွင်ႇလိၼ်းထုၼ်းၼၼ်ႉသမ်ႉဢဝ် မၢၵ်ႇႁိၼ်သေ သိုင်းသႂ်ႇမၢၵ်ႇၼၼ်ႉ ဢဝ်မၢၵ်ႇၼၼ်ႉ တႅၵ်ႇသႂ်ႇၶဝ် ၵေႃႉဢဝ်မၢၵ်ႇႁိၼ်သိုင်းသႂ်ႇ ဢွင်ႇလိၼ်းထုၼ်းၼၼ်ႉ လူႉတၢႆ ထင်တီႈၵမ်းလဵဝ်။ လိူဝ်ၼၼ်ႉ ၸၢႆးတၢၼ်ႇမႆႇၼၼ်ႉ တိူဝ်ႉၺႃးၸွမ်း မိုဝ်းၾၢႆႇသၢႆႉၶႂႃ၊ ၶႃလူင်လႄႈ မၢၵ်ႇၵၢဝ်ႈမၼ်းၸၢႆးတင်းသွင်ႇၾၢႆႇ။ ယဝ်ႉၵေႃႈ ထႅင်ႈၵေႃႉၼိုင်ႈ ၶၢၼ်ႉလိၼ်းထုၼ်းၵေႃႈ တိူဝ်ႉၺႃးမၢတ်ႇၸဵပ်းႁၢဝ်ႈႁႅင်း မိူၼ်ၵၼ်၊ သွင်ၵေႃႉၼႆႉ လႆႈသူင်ႇယႃ တီႈဝဵင်းလႃႈသဵဝ်ႈ ယၢမ်းၵၢင်ၶမ်ႈ 9 မူင်းၶိုင်ႈ” ဝႃႈၼႆ။

သိုပ်ႇလၢတ်ႈဝႃႈ မိူဝ်ႈၼႆႉၵၢင်ၼႂ် လုၵ်ႈဢွၼ်ႇသွင်ၵေႃႉ ၸၢႆးဢၢႆႈထုၼ်းလႄႈ ၸၢႆးဢၢႆႈဢုင်း ဢၼ်ၶိုၼ်ႈႁူင်းယႃ ဝႆႉ တီႈမူႇၸေႊၼၼ်ႉ ယူႇတီႈမေႃယႃဝဵင်းမူႇၸေႊ လႆႈသူင်ႇၵႂႃႇထႅင်ႈ တီႈႁူင်းယႃလႃႈသဵဝ်ႈ တႃႇၽႃႇတတ်း ဝႃႈၼႆ။

လုၵ်ႈႁဵၼ်း 5 ၵေႃႉၼႆႉ ၵေႃႉဢၼ်လႆႈလူႉတၢႆထင်တီႈ ၸိုဝ်ႈႁွင်ႉ ဢွင်ႇလိၼ်းထုၼ်း ယူႇၸၼ်ႉသၢမ်၊ ဢၼ် မၢတ်ႇ ၸဵပ်း 2 ၵေႃႉ ၸၢႆးတၢၼ်ႇမႆႇ ဢႃယု 11 ယူႇၸၼ်ႉသၢမ်၊ ၶၢၼ်ႉလိၼ်းထုၼ်း ယူႇၸၼ်ႉသွင်၊ ထႅင်ႈသွင်ၵေႃႉ ၸၢႆးဢၢႆႈထုၼ်း ၸၼ်ႉသွင် ဢႃယု 10 ပီလႄႈ ၸၢႆးဢၢႆႈဢုင်း ၸၼ်ႉၼိုင်ႈ ဢႃယု 9 ပီ ဝႃႈၼႆ။

ၼႂ်းပီ 2016-2017 ၶၢဝ်းတၢင်းသွင်ပီမႃးၼႆႉ တၢင်းၼႂ်းမိူင်းပေႃႈ ၸႄႈဝဵင်းမူႇၸေႊၼႆႉ မၢၵ်ႇတႅၵ်ႇ/ ဢမ်ႇႁူႉၵေႃႉၵၢင် ဢမ်ႇယွမ်း 3 ပွၵ်ႈယဝ်ႉ ဝႃႈၼႆ။

တၢင်းပွတ်းတွၼ်ႈၼၼ်ႉ မီးၸုမ်းယိပ်းၵွင်ႈၵၢင်ႇတူင်ႉၼိုင်ၵႂႃႇမႃး မိူၼ် တပ်ႉသိုၵ်းလူင်ပွင်ၸိုင်ႈမၢၼ်ႈ၊ တပ်ႉသိုၵ်းၶၢင် KIA တင်း ၸုမ်းပျီႇတူႉၸိတ်ႉ သိုၵ်းလွႆ TNLA ၸဵမ်ၸိူဝ်းၼႆႉ ဝႃႈၼႆ။