သင်ၶၸဝ်ႈလႄႈ ၸုမ်းတူင်ႉၼိုင်တူင်ႇဝူင်းပၢႆးပၺ်ႇၺႃႇတႆး ႁူပ်ႉဢုပ်ႇၵၼ် ပွၵ်ႈၵမ်း 2 ႁူမ်ႈၵၼ် မၵ်းမၼ်ႈၵေႃႁူမ်ႈသၢင်ႈ ပၢႆးပၺ်ႇၺႃႇၸိူဝ်ႉၸၢတ်ႈတႆး တီႈဝဵင်းတူၼ်ႈတီး မီးၽူႈၶဝ်ႈႁူမ်ႈ ၸမ် 50 တူၼ်/ ၵေႃႉ။

ဝၼ်းတီႈ 24-25/8/2019 သင်ၶၸဝ်ႈလႄႈ ၸုမ်းတူင်ႉၼိုင်တူင်ႇဝူင်း ၾၢႆႇပၢႆးပၺ်ႇၺႃႇ လၢႆလၢႆတီႈ ႁူမ်ႈၵၼ်ၶွတ်ႇၽွတ်ႈ တႃႇပၢႆးပၺ်ႇၺႃႇၸိူဝ်ႉၸၢတ်ႈတႆး ပၢင်ၵုမ်ၼႆႉ ၸတ်းႁဵတ်းတီႈ ဝတ်ႉဝေႇလုဝၼ်ႇ ၸႄႈဝဵင်းတူၼ်ႈတီး ၸိုင်ႈတႆး ပွတ်းၸၢၼ်း။

ၸၢႆးသႅင်ဝၼ်း လုၵ်ႈႁဵၼ်းၸၼ်ႉၸွမ်ၵဵင်းမႆႇ ၸိုင်ႈထႆး/ ၽူႈၶဝ်ႈႁူမ်ႈပၢင်ၵုမ် လၢတ်ႈတီႈၽူႈတွႆႇႁွၵ်ႈဝႃႈ “ လႆႈဢုပ်ႇဢူဝ်း ၵၼ်ၵႂႃႇ တႃႇၶၢဝ်းတၢင်း 2 ဝၼ်း။ ပၢင်ၵုမ်ပွၵ်ႈၼႆႉ လႆႈမၵ်းမၼ်ႈၸုမ်းၶိုၼ်ႈမႃး ၵေႃႁူမ်ႈသၢင်ႈပၢႆးပၺ်ႇၺႃႇၸိူဝ်ႉၸၢတ်ႈ တႆး။ ၶွတ်ႇၽွတ်ႈဝႆႉ တေမီးၽူႈၼမ်းၼႃႈ၊ ႁူဝ်ပဝ်ႈ၊ ၵႅမ်ႁူဝ်ပဝ်ႈ၊ ၽူႈၼမ်းၼႂ်း၊ ၵႅမ်ၽူႈၼမ်းလႄႈ ႁွင်ႈၵၢၼ်လၢႆလၢႆၾၢႆႇ ”ဝႃႈၼႆ။

တီႈပၢင်ၵုမ်ၵေႃႁူမ်ႈသၢင်ႈပၢႆးပၺ်ႇၺႃႇၸိူဝ်ႉၸၢတ်ႈတႆးၼႆႉ ယိူင်းဢၢၼ်းႁႂ်ႈၸုမ်းပၢႆးပၺ်ႇၺႃႇၸိူဝ်ႉၶိူဝ်းတႆးၽွမ်ႉႁူမ်ႈၵၼ်သေ ၸွႆႈၵၼ်ယုၵ်ႉယွင်ႈပၢႆးပၺ်ႇၺႃႇၵူၼ်းမိူင်းတႆးႁႂ်ႈၶိုၼ်ႈယႂ်ႇၶိုတ်းၵၢပ်ႈ။ လိူဝ်ၼၼ်ႉ လၵ်းၼမ်းသမ်ႉ ၵူႈၸုမ်းႁႂ်ႈမီးလွင်ႈ လွတ်ႈလႅဝ်းႁင်းၽႂ်မၼ်း။ တေႁူမ်ႈတင်းလူင်ပွင်ၸိုင်ႈသေ ႁဵတ်းသၢင်ႈၵႂႃႇ။ တေလႆႈမၵ်းမၼ်ႈပၢႆးပၺ်ႇၺႃႇၵူႈၸုမ်းၸုမ်း ၸဵမ်ၸိူဝ်းၼႆ။

ၵေႃႁူမ်ႈသၢင်ႈပၢႆးပၺ်ႇၺႃႇၸိူဝ်ႉၸၢတ်ႈတႆးၼႆႉ ၽူႈၼမ်းၼႃႈ ပဵၼ်ၸဝ်ႈတူၼ်ႈၶူးလူင် ပၺ်ႇၺႃႇၼၼ်ႇတ ဝတ်ႉဝိႁၢရ် ထၢတ်ႈတေႃႇ လွႆလႅမ်၊ ၸဝ်ႈၶူးဢႃႇလေႃးၵ ဝတ်ႉဝိႁၢရ်သုၶိတႃႇယူင်ႇ ၼမ်ႉၸၢင်၊ ၸဝ်ႈၶူးၸေႃးတိၵ ၵဵင်းတုင်၊ ၸၢႆးၶမ်း မိူင်း၊ ၸဝ်ႈလႅင်းသႂ် ပၢင်ႇလႅင်း။ ၸၢႆးၶမ်းၸိုၼ်ႈ တူၼ်ႈတီး။ ႁူဝ်ပဝ်ႈသမ်ႉ Dr. ၶမ်းမၢႆ ထမ်ႇမသႃႇမိ၊ Dr. ၸၢႆးၼေႃႇၶိူဝ်း၊ ၵႅမ်ႁူဝ်ပဝ်ႈ ၶူးမေႃသၢႆလႅင်း။ ၽူႈၼမ်းၼႂ်းသမ်ႉ ၸဝ်ႈၶူးသီရိထမ်ႇမ ၽိပႃႇလ ဝတ်ႉဝေႇလုဝၼ်ႇ တူၼ်ႈတီး။ ၶူးၸၢႆးၼေႃႇၶမ်း ၼမ်ႉလၼ်ႈ။ ၵႅမ်ၽူႈၼမ်းၼႂ်းသမ်ႉ ၸဝ်ႈၶူးၸၼ်ႇတိမႃႇ ၸၼ်ႉၸွမ်ပုတ်ႉထမိူင်းတႆး၊ လုင်းထုၼ်းၸၢမ်ႇ ၸဵမ်ၸိူဝ်းၼႆႉ။

လိူဝ်ၼၼ်ႉ ပေႃးထိုင်မႃးပၢင်ၵုမ်ၵေႃႁူမ်ႈသၢင်ႈပၢႆးပၺ်ႇၺႃႇ ၸိူဝ်ႉၸၢတ်ႈတႆး ပွၵ်ႈၵမ်း 3 သမ်ႉ တေၸတ်းႁဵတ်းၼႂ်းဝၼ်းတီႈ 1-2/12/2019။ လုမ်းၵေႃႁူမ်ႈသၢင်ႈပၢႆးပၺ်ႇၺႃႇၸိူဝ်ႉၸၢတ်ႈတႆးၼႆႉ တေပိုတ်ႇ 2 တီႈ။ တေပိုတ်ႇဝႆႉတီႈ ၸႄႈဝဵင်းတူၼ်ႈတီးလႄႈ ၸႄႈဝဵင်းၼမ်ႉၸၢင် ဝႃႈၼႆ။