ဢိင်ၼိူဝ်လွင်ႈပဵၼ်ပၢင်တိုၵ်း ၼႂ်းၸိုင်ႈတႆးပွတ်းႁွင်ႇသေ ၽူႈတႅၼ်းသၽႃးသႅၼ်ဝီ မႆႈၸႂ်ၾၢင်ႉထိုင်လွင်ႈႁူမ်ႇလူမ်ႈ လွင်ႈ ၵႂႃႇမႃးၵူၼ်းမိူင်း ယၢမ်းၵၢင်ၶမ်ႈ- ၵၢင်ၶိုၼ်း။
ၸၢႆးၸိင်ႇလူႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 2 ၸႄႈဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈၽူႈၵွၼ်း ၸႄႈဝဵင်းသႅၼ်ဝီ လႆႈပွင်ႇၶၢဝ်ႇၸူး တီႈၽူႈၵွၼ်းပွၵ်ႉ/ ဢိူင်ႇ ႁႂ်ႈမွၵ်ႇလၢတ်ႈပၼ်ၾၢင်ႉထိုင်ၵူၼ်းဝၢၼ်ႈ ၵူၼ်းဢိူင်ႇႁဝ်း တႄႇဢဝ်ယၢမ်းၵၢင်ၶိုၼ်း 10 မူင်း တေႃႇထိုင် 6 မူင်းၵၢင်ၼႂ် ယႃႇပေဢွၵ်ႇၵႂႃႇတၢင်းလႂ်ၵၼ်။ ယႃႇပေၶီႇၵႃး၊ ၶီႇရူတ်ႉၶိူင်ႈၶိုၼ်ႈၶိုၼ်ႈ လူင်းလူင်း။ လိူဝ်ၼၼ်ႉ သင်ဝႃႈ လွင်ႈပဵၼ်လွင်ႈလူႉ ဢမ်ႇလိူဝ်လႆႈလႃးလႃးၸိုင် ၸင်ႇၵွႆႈၵႂႃႇ” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၽူႈၵွၼ်းၸႄႈဝဵင်း ၾၢႆႇႁူမ်ႇလူမ်ႈ ၸႄႈဝဵင်းသႅၼ်ဝီတႄႉ ဢမ်ႇႁၼ်ဢွၵ်ႇၽိုၼ်လိၵ်ႈပဵၼ်တၢင်း ၵၢၼ်သေတႃႉ မီးလွင်ႈပွင်ႇလႅင်းၸူးထိုင် တီႈၽူႈၵွၼ်းပွၵ်ႉ/ ဢိူင်ႇ ၵူႈတီႈယူႇ ၸၢႆးၸိင်ႇလူႇ ၽူႈတႅၼ်းသၽႃးၸႄႈဝဵင်း သႅၼ်ဝီ လၢတ်ႈၼႄၼင်ႇၼႆ။
“ ၼွၵ်ႈလိူဝ်ၼၼ်ႉ ၶႂ်ႈၾၢင်ႉထိုင်ပၼ်တွၼ်ႈတႃႇ ပီႈၼွင်ႉၵူၼ်းမိူင်းႁဝ်းၶႃႈ ထႅင်ႈလွင်ႈၼိုင်ႈတႄႉ ၵႂႃႇလႂ်မႃးလႂ်ၵေႃႈယဝ်ႉ ယႃႇပေၵႂႃႇၵိုတ်း ယူႇၸွမ်းၶူဝ်လႃးလႃး ၵူဝ်ၺႃးယိုဝ်း ယွၼ်ႉဝႃႈ ၸွမ်းၶူဝ်ဢၼ်ၵၢႆႇၸွမ်းသဵၼ်ႈတၢင်းလူင် ၸိူဝ်းၼၼ်ႉ မၼ်းမီးၾၢႆႇႁူမ်ႇလူမ်ႈၶဝ် ဢဝ်ႁူမ်ႇလူမ်ႈဝႆႉလႄႈ ၵူဝ်ႁဝ်းၶႃႈ ၵူၼ်းမိူင်းၺႃးယိုဝ်း” ဝႃႈၼႆ။
တေႃႈလဵဝ် တၢင်းၸႄႈဝဵင်းသႅၼ်ဝီတႄႉ ငဝ်းလၢႆးပၢင်တိုၵ်း သိုၵ်းသိူဝ်ယဵၼ်ၵႂႃႇယဝ်ႉၼႆ ၵူၼ်းမိူင်းသႅၼ်ဝီၵေႃႉၼိုင်ႈတႄႉ လၢတ်ႈၼႄၽူႈတွႆႇႁွၵ်ႈၼင်ႇၼႆ။
“တၢင်းသႅၼ်ဝီႁဝ်းၶႃႈတႄႉ ယဵၼ်ၵႂႃႇၶႃႈယဝ်ႉ ဢမ်ႇမီးပၢင်တိုၵ်းသင်။ မိူဝ်ႈပူၼ်ႉမႃး 2-3 ဝၼ်းၼၼ်ႉ ႁဝ်းၶႃႈ ဢမ်ႇပေႃး ႁတ်းဢွၵ်ႇၵႂႃႇတၢင်းလႂ်ၶႃႈ။ ယေးငိုၼ်းၵေႃႈ ပိၵ်ႉၶႃႈဢေႃႈ”ဝႃႈၼႆ။
တႄႇဢဝ် ဝၼ်းတီႈ 15/8/2019 ယၢမ်းၵၢင်ၼႂ် 5 မူင်းၼၼ်ႉ သိုၵ်းဢူၺ်းလီပွတ်းႁွင်ႇ 3 ၸုမ်း တပ်ႉသိုၵ်းတဢၢင်း၊ တပ်ႉ သိုၵ်းၵဝ်ႈၵၢင်ႉလႄႈ တပ်ႉသိုၵ်းရၶႅင်ႇ ႁူမ်ႈၵၼ်လူမ်ႇယိုဝ်း တီႈၸၼ်ႉၸွမ်သိုၵ်းမၢၼ်ႈၾၢႆႇပၢႆးၸၢၵ်ႈ DSTA ပၢင်ႇႁူႈလႄႈ ၼႂ်းၸႄႈဝဵင်းၼွင်ၶဵဝ်ထႅင်ႈ 5 တီႈ။ ၼႂ်းၼၼ်ႉ ပွႆႇမၢၵ်ႇယႃႉ တီႈၶူဝ်ႁူၺ်ႈၵိုတ်ႈထႅင်ႈ။ ဝၢႆးသေပဵၼ်ပၢင်တိုၵ်းၵၼ်မႃးယဝ်ႉၼၼ်ႉ သိုပ်ႇၵႂႃႇယႃႉပႅတ်ႈထႅင်ႈ ၶူဝ်ၼႂ်းၵႄႈသႅၼ်ဝီ – ၵုၼ်လူင်ထႅင်ႈ 2 တီႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ