PPST တိုၵ်းသူၼ်းထိုင် တပ်ႉသိုၵ်းလူင်ပွင်ၸိုင်ႈမၢၼ်ႈလႄႈ ၸုမ်းဢူၺ်းလီ ပွတ်းႁွင်ႇ တင်းသွင်ၾၢႆႇ ႁႂ်ႈလူတ်းယွမ်း ပၢင်တိုၵ်း ဢၼ်ပဵၼ်ယူႇ ၼႂ်းၸိုင်ႈတႆးပွတ်းႁွင်ႇလႄႈ ၸႄႈမိူင်းရၶႅင်ႇ ဝႃႈၼႆ။
ဝၼ်းတီႈ 25/8/2019 ယူႇတီႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း 10 ၸုမ်း ဢၼ်လူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ၸတ်းႁဵတ်းပၢင်ၵုမ်ယဝ်ႉ ႁူမ်ႈၵၼ် ဢွၵ်ႇၶေႃႈပိုၼ်ၽၢဝ်ႇ တင်းမူတ်းမီး 6 ၶေႃႈ။ ၼႂ်းၼၼ်ႉ ၶေႃႈထီႉ 5 တႅမ်ႈဝႆႉဝႃႈ တပ်ႉသိုၵ်းလူင်ပွင်ၸိုင်ႈမၢၼ်ႈလႄႈ ၸုမ်းဢူၺ်းလီပွတ်းႁွင်ႇ 3 ၸုမ်း ႁႂ်ႈႁႃလၢႆးၵတ်းယဵၼ်သေ ဢုပ်ႇဢူဝ်းၵၼ်ၵႂႃႇ ဝႃႈၼႆ။
ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်း 2 / ၽူႈၶၢၼ်ပၢၵ်ႇ RCSS/SSA လၢတ်ႈတီႈၽူႈတွႆႇႁွၵ်ႈဝႃႈ “ပေႃးပဵၼ်ပၢင်တိုၵ်းၵၼ် မႃး ဢၼ်တေထူပ်းၽေးသိုၵ်း၊ ၺႃးတၢင်းယၢပ်ႇၽိုတ်ႇၼႆႉ တေပဵၼ်ၵူၼ်းမိူင်း။ ၵွပ်ႈၼႆလႄႈ ၵဵဝ်ႇၵပ်းလွင်ႈၼႆႉ လုၵ်ႉတီႈ ပၢင်ၵုမ် PPST သေတိုၵ်းသူၼ်းထိုင် ႁႂ်ႈတၢင်းသွင်ၾၢႆႇ ႁူပ်ႉထူပ်းဢုပ်ႇ ဢူဝ်းၵၼ်သေ လူတ်းယွမ်းပၢင်တိုၵ်းၽွင်ႈ၊ ၸႂ်ႉ လၢႆးဢုပ်ႇဢူဝ်းသေ ၵႄႈၶႆပၼ်ႁႃ၊ ယႃႇပေၸႂ်ႉဢဵၼ်ႁႅင်းသိုၵ်းသေၵႄႈၶႆ၊ ယႃႇပေၸႂ်ႉလၢႆးႁုၵ်းႁၢႆႉသေ ၵႄႈၶႆတေႃႇၵၼ် ႁႂ်ႈတူၺ်းတႃႇပေႃႈမႄႈပီႈၼွင်ႉၵူၼ်းမိူင်း၊ တူၺ်းတႃႇဝၢၼ်ႈမိူင်းၽွင်ႈ” ဝႃႈၼႆ။
ၵဵဝ်ႇၵပ်းလွင်ႈပဵၼ်ပၢင်တိုၵ်းၵၼ် ၼႂ်းၸိုင်ႈတႆးပွတ်းႁွင်ႇႁူဝ်ၵူၼ်း 5,000 ပၢႆလႄႈ တၢင်းၸႄႈမိူင်းရၶႅင်ႇၼၼ်ႉ ႁူဝ်ၵူၼ်း မိုၼ်ႇပၢႆလႆႈဢွၼ်ၵၼ်ပၢႆႈၽေးသိုၵ်း ယၢၼ်ႁိူၼ်းၽႂ်မၼ်း။
ပူၼ်ႉမႃး မိူဝ်ႈဝၼ်းတီႈ 15/8/2019 ယၢမ်းၵၢင်ၼႂ် 5 မူင်းၼၼ်ႉ ၸုမ်းဢူၺ်းလီပွတ်းႁွင်ႇ 3 ၸုမ်း တပ်ႉသိုၵ်းတဢၢင်း၊ ၵဝ်ႈ ၵၢင်ႉလႄႈ ရၶႅင်ႇ ႁူမ်ႈၵၼ်သေ လူမ်ႇယိုဝ်း တီႈၸၼ်ႉၸွမ်သိုၵ်းမၢၼ်ႈ ၾၢႆႇပၢႆးၸၢၵ်ႈ (DSTA) ပၢင်ႇႁူႈ လႄႈ ၼႂ်းၸႄႈဝဵင်း ၼွင်ၶဵဝ် ထႅင်ႈ 5 တီႈ။ ဝၢႆးပဵၼ်ပၢင်တိုၵ်းၵၼ်ယဝ်ႉၼၼ်ႉ ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ ၽိူမ်ႉထႅမ်ႁႅင်းသိုၵ်းၶိုၼ်ႈ ၸူးၼႂ်းၸိုင်ႈတႆးပွတ်းႁွင်ႇသေ သိုၵ်းလူင်ပွင်ၸိုင်ႈမၢၼ်ႈတင်း ၸုမ်းဢူၺ်းလီပွတ်းႁွင်ႇလႆႈပဵၼ်ပၢင်တိုၵ်းၵၼ်မႃးႁၢဝ်ႈႁႅင်း တေႃႇထိုင်ယၢမ်းလဵဝ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ