တိူင်းသိုၵ်းၶူဝ်လမ် ႁႅင်းသိုၵ်း ႁိမ်းပၢၵ်ႇ ၶဝ်ႈငဝ်ႈငုၼ်း  တပ်ႉပီႇတူႉၸိတ်ႉ 758 ၼႃးပွႆး  မိူဝ်ႈဝႃး သေ ၵၵ်းၶင် သႅၼ်းၽူႈၼမ်းဝႆႉ၊ သႅၼ်းၽူႈၼမ်း ပၢၼ်ၵၢင် ၵမ်ႈၽွင်ႈ ငိူင်ႉဝႄႈဝႆႉၵေႃႈမီး။

ဝၼ်းတီႈ 22/8/2019  ယၢမ်းႁူဝ်ၶမ်ႈ တူဝ်ၽူႈၵွၼ်းတိူင်းသိုၵ်းၶူဝ်လမ် ၸွမ်ႁၢၼ် မိၼ်ႉလၢႆႇ ၵုမ်းႁႅင်းသိုၵ်း ႁိမ်းပၢၵ်ႇသေ ၽႅဝ်ၵႂႃႇၼမ်ႉႁူးၽရႃးထမ်ႈ  ဢၼ်မီး ၸဵင်ႇႁွင်ႇဝၼ်းဢွၵ်ႇ ဝဵင်းလၢႆးၶႃႈ၊ ၸမ်တၢင်းဝဵင်းၶူဝ်လမ်။ ၵၵ်းၶင်တူဝ်ၽူႈၼမ်း ၸဝ်ႈတႃႉ၊ ၽူႈၵွၼ်းသိုၵ်း ၶူးတေႃးၼ ဝႆႉ ႁၢၼ်ႉတေႃႇထိုင် ဝၼ်းမိူဝ်ႈၼႆႉ။

ၵဵဝ်ႇၵပ်းလွင်ႈၼႆႉ ၽူႈမီးပုၼ်ႈၽွၼ်း ၼႂ်းတပ်ႉပီႇတူႉၸိတ်ႉ  ၵေႃႉၼိုင်ႈလၢတ်ႈတီႈ ၽူႈတွႆႇႁွၵ်ႈဝႃႈ -“ တေႃႇထိုင်ႁူဝ်ၶမ်ႈၼႆႉ ၽူႈၵွၼ်းတိူင်း တိုၵ်ႉမႃးယူႇတီႈ ၼမ်ႉႁူးၼႆႉဢေႃႈ။ လႅပ်ႈၵဵဝ်ႇၵပ်း ဢၼ်ၶဝ် တီႉလႆႈ တီႈလွႆလႅမ်ၼၼ်ႉဝႃႈၼႆၶႃႈၼေႈ” – ဝႃႈၼႆ။

ၶၢဝ်ႇဢမ်ႇပႆႇယိုၼ်ယၼ်တႄႉလၢတ်ႈဝႃႈ – ယၢမ်းလဵဝ် တပ်ႉသိုၵ်းလူင်ပွင်ၸိုင်ႈမၢၼ်ႈ ထႅမ်ႁႅင်းသိုၵ်း ဝႅတ်ႉလွမ်ႉ ဝႆႉ တပ်ႉငဝ်ႈငုၼ်းပျီႇတူႉၸိတ်ႉ ၼႃးပွႆးဝၢၼ်ႈၼမ်ႉႁူး ၽရႃးထမ်ႈ သေ ၸႂ်ႉပျီႇတူႉၸိတ်ႉ ဝၢင်းၶိူင်ႈသဵင်ႈသဵင်ႈ – ဝႃႈၼႆ။

ဝၼ်းတီႈ 16/8/2019 ၼၼ်ႉ ပလိၵ်ႈမၢၼ်ႈၾၢႆႇယႃႈမဝ်းၵမ်တီႈလႆႈ ယႃႈမဝ်းၵမ် ၵႃႈၶၼ်ငိုၼ်းမၢၼ်ႈ သႅၼ်သွင်မိုၼ်ႇ သႅၼ်ပျႃး။   ဢၼ်ၼၼ်ႉ ၾၢႆႇတပ်ႉပလိၵ်ႈယႃႈမဝ်းၵမ်ႈလႆႈငိူၼ်ႈဝႃႈ လုၵ်ႉတၢင်းၼၼ်ႉ မႃးၼႆ လႄႈ မႃးၵူတ်ႇထတ်း- လႅင်ႇၶဝ်ႇဢၼ်ဢမ်ႇၶႂ်ႈဢွၵ်ႇၸိုဝ်ႈလၢတ်ႈ။

ပီႇတူႉၸိတ်ႉ တပ်ႉၸုမ်း 758 ၼႆႉ  မီးသွင်တီႈ ။ တီႈၼိုင်ႈၼႆႉ မီးတီႈ ဝၢၼ်ႈၼမ်ႉႁူး ဢိူင်ႇၼႃးပွႆး ႁိမ်းၶူဝ်လမ်။ ထႅင်ႈတီႈၼိုင်ႈၼႆႉမီးတီႈဝၢၼ်ႈပၢင်ႈ ဢိူင်ႇဝၢၼ်ႈႁႅင်ႈ ၸေႈဝဵင်းလၢႆးၶႃႈ။ ဢၼ်တပ်ႉတိူင်းသိုၵ်း ယလၶ ၶဝ်ႈယိုတ်းၼႆႉပဵၼ် တပ်ႉဢၼ်မီးတီႈ ၼႃးပွႆး ။

ပီႇတူႉၸိတ်ႉ 758  တပ်ႉၼႃးပွႆးတင်းဝၢၼ်ႈပၢင်ႇၼႆႉ ယၢမ်ႈပဵၼ် တပ်ႉၸုမ်း တႂ်ႈၶွင်ႊသီႊဢဝ်ၶိုၼ်း ၸိုင်ႈ တႆး၊ ၸဝ်ႈမိူင်းၸိုၼ်ႈၽိုၼ်ႉဝၢႆႇၽၢတ်ႇယၢၼ်ၸဝ်ႈယွတ်ႈသိုၵ်း မိူဝ်ႈပီ 2005 သေ ဝၢင်းၶိူင်ႈပၼ် လူင်ပွင်ၸိုင်ႈသိုၵ်းမၢၼ်ႈ  လႅၵ်ႈႁဵတ်းတပ်ႉပီတူႉ ၸိတ်ႉ၊ တူဝ်ၽူႈၵွၼ်းတပ်ႉၸုမ်း ၸဝ်ႈမိူင်းၸိုၼ်ႈ ၺႃးယိုဝ်းၸွမ်းသိုၵ်းမၢၼ်ႈ (ၽွင်းၶီႇၵႃးၵႂႃႇၸွမ်းၵၼ် ပဵၼ်ထႅဝ်) သေ လႆႈတၢႆၸွမ်းၵၼ် ပဵၼ်မူႇ မိူဝ်ႈ 24/5/2009 ။

ဝၢႆးၸဝ်ႈမိူင်းၸိုၼ်ႈတၢႆ   ၸဝ်ႈတႃႉ ႁပ်ႉပုၼ်ႈၽွၼ်း။ ၵႃႇလိင်ႇထွႆႉ ဢၼ်ပဵၼ်ၵႅမ်ၸဝ်ႈတႃႉ သမ်ႉၺႃးယိုဝ်းတၢႆမိူဝ်ႈပီ 2016။  ၶူးတေႃးၼ ၵေႃႉပဵၼ်ၼွင်ႉၸၢႆးၸဝ်ႈမိူင်းၸိုၼ်ႈသမ်ႉ ပုတ်ႈတႅၼ်းႁပ်ႉပုၼ်ႈၽွၼ်းတီႈယူႇ ၵႃႇလိင်ႇထွႆႉ။